25 تامىزدا «AgroInvest Forum 2017»  اگروونەركاسىپتىك ينۆەستيسيالىق فورۋمى  اۋىل شارۋاشىلىعى ءونىمىن وندىرۋشىلەر مەن ينۆەستورلاردىڭ باسىن قوسپاق. حالىقارالىق شاراعا جۇڭگو، يران، ءباا، ۆەنگريا، پولشا، رەسەي، يسپانيا، تۇركيا ەلدەرىنەن 100-دەن اسا ادام قاتىسادى، دەپ حابارلايدى Qamshy.kz.

بۇگىن «قازاگرو» ۇلتتىق باسقارۋشى حولدينگى» اق باسقارما ءتورايىمى گۇلناز اتامقۇلوۆا ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسيادا اگروونەركاسىپتىك ينۆەستيسيالىق فورۋمنىڭ ماقسات-مىندەتتەرى تۋرالى ايتتى. فورۋم ق ر اۋىل شارۋاشىلىعى مينيسترلىگىنىڭ قولداۋىمەن وتپەك.

- اۋىل شارۋاشىلىعىنداعى جوبالاردى بىرلەسىپ ىسكە اسىرۋ مەن ازىق-تۇلىك تاۋارلارىن ءوندىرۋ سالاسىنا سەرىكتەستەردى تارتۋ ارقىلى قازاقستاندىق بيزنەستى قولدايمىز. حالىقارالىق ارىپتەستەرىمىزبەن سالاعا ينۆەستيسيالىق كاپيتالدى تارتۋ، اگروونەركاسىپتىك كەشەندەگى بيزنەستىڭ جاڭا ترەندتەرى مەن پەرسپەكتيۆالارىن قالىپتاستىرۋعا مۇمكىندىك تۋادى، - دەدى گۇلناز اتامقۇلوۆا.

وسىنىڭ ناتيجەسىندە سوڭعى 5 جىلدا حولدينگ جانە ونىڭ ەنشىلەس كومپانيالارى اگروونەركاسىپتىك كەشەن سالاسىنا جالپى كولەمى 375 ميلليارد تەڭگەدەن اساتىن شەتەلدىك ينۆەستيسيانى تارتىپ ۇلگەرگەن. قازىرگى تاڭدا 10 جىلعا 100 ميلليون ەۆرو الۋ ءۇشىن ەۋروپالىق ينۆەستيسيالىق بانكىمەن كەلىسسوزدەر جۇرگىزىلۋدە. بۇل قارجى ءبىرقاتار جوبالاردى قارجىلاندىرۋ ءۇشىن جۇمسالادى.

سونىمەن قاتار، سپيكەرلەردىڭ ايتۋىنشا اگروونەركاسىپتىك كەشەنگە ينۆەستيسيا تارتۋدىڭ ءبىر ءتۇرى – تىكەلەي ينۆەستيسيالار قورىن قۇرۋ.  كاپيتاليزاسياسى 40 ميلليون دوللاردى قۇرايتىن قازاق-ۆەنگەر تىكەلەي ينۆەستيسيالىق قورى جۇمىسىن باستاپ تا كەتكەن. قور اگروونەركاسىپتىك كەشەنىنىڭ ىسكە اسقان، ءبىراق قازىرگى تاڭدا قارجى تاپشىلىعىن تارتىپ وتىرعان جوبالارىن دامىتۋدى، مال، قۇس، بالىق شارۋاشىلىقتارى مەن جەمىس-كوكونىس،  ءسۇت ءوندىرىسى، ءداندى جانە مايلى داقىلداردى اۋىل شارۋاشىلىعى تەحنيكاسىن قۇراستىرۋ باعىتىنداعى جاڭا جوبالاردى قارجىلاندىرۋدى كوزدەيدى. ال قوسىمشا ينۆەستورلاردى تارتۋ ارقىلى قور كاپيتاليزاسيا كولەمىن 150 ميلليون دوللارعا دەيىن ۇلعايتۋدى جوسپارلادى.