بۇگىن ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسيادا «KAZENERGY» قاۋىمداستىعى ءتوراعاسىنىڭ ورىنباسارى  ۇزاقباي قارابالين وسىنداي بولجام جاسادى دەپ حابارلايدى Qamshy.kz اقپارات اگەنتتىگى. ەل ەكونوميكاسىنىڭ تىرەگى مۇناي ءوندىرىسى بولعاندىقتان، قازاقستان الەمدە الدىڭعى قاتاردا تۇرعانىن ايتتى.  

"ءار ادامنىڭ ءوز پىكىرى بار، دەگەنمەن ءبىز اناليتيكالىق كومپانيالاردىڭ ساراپشى ماماندارىنىڭ پىكىرىنە قۇلاق سالعانىمىز دۇرىس. مۇناي سالاسىنداعى بارلىق مامانداردىڭ پىكىرىن تۇجىرىمدايتىن بولساق، مۇناي باعاسى ءالى دە تۇسەدى دەگەنگە سايادى. ءبىر باررەلى 50 دوللار بولادى دەگەن بولجام بار"، – دەدى سپيكەر.

ۇزاقباي قاراباليننىڭ پىكىرىنشە، الداعى 4-5 جىلدا مۇناي باعاسى قايتا كوتەرىلۋى مۇمكىن.  شارىقتاۋ شەگى 100 دوللاردان اسپايدى، 80 دوللارعا دەيىن بارادى دەگەن ساراپشىلار بولجامىن العا تارتتى.

"الايدا ءقازىر تەحنولوگيالاردىڭ تەز دامىپ، اقپاراتتىڭ لەزدە تارالۋىن ەسكەرە كەلە، بولاشاققا بولجام جاساۋ قيىن. الداعى 10 جىلدا ءومىر قالاي وزگەرەتىنىن بىلە المايمىز دەدى"، – ۇزاقباي قارابالين.