قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا «ەكسپو-2017» كورمەسىنىڭ رەسمي ءىس-شارالارى اياسىندا ءوتىپ جاتقان دۇنيەجۇزىلىك كارديوۆاسكۋليارلىق جانە توراكالدىق حيرۋرگتەر قاۋىمداستىعىنىڭ 27ء-شى كونگرەسىنە قاتىستى، دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ.

كونگرەسكە دەنساۋلىق ساقتاۋ ءمينيسترى ە.ءبىرتانوۆ، كورنەكتى الەمدىك دەڭگەيدەگى جانە قازاقستاندىق كارديوحيرۋرگتەر مەن عالىمدار، دەنساۋلىق ساقتاۋ سالاسىنىڭ ۇيىمداستىرۋشىلارى، وتاندىق جانە شەتەلدىك ساراپشىلار، مەديسينا قىزمەتكەرلەرى قاتىستى.

مەملەكەتتىك حاتشى كونگرەستىڭ اشىلۋ راسىمىندە قازاقستان پرەزيدەنتىنىڭ فورۋمعا قاتىسۋشىلارعا ارناعان قۇتتىقتاۋىن وقىپ بەردى. وندا حالىق دەنساۋلىعى مەن دەنساۋلىق ساقتاۋ سالاسىن دامىتۋ مەملەكەتىمىزدىڭ باسىم باعىتتارىنىڭ ءبىرى ەكەنى اتاپ وتىلگەن. قازاقستان – بۇكىل حالىق جوعارى مامانداندىرىلعان تەگىن مەديسينالىق كومەككە قول جەتكىزە الاتىن الەمدەگى از عانا مەملەكەتتىڭ ءبىرى. ۇلتتىق عىلىمي كارديوحيرۋرگيا ورتالىعىندا كارديوحيرۋرگيالىق وپەراسيانىڭ بارلىق ءتۇرى جاسالادى. ول ەلىمىزدىڭ عانا ەمەس، الەمدىك كارديوحيرۋرگيانىڭ كوشباسشىسىنىڭ بىرىنە اينالدى. ادامزاتتىڭ دەنساۋلىعىن جاقسارتۋ جولىندا ءوز ءبىلىمى مەن كاسىبيلىگىن ىسكە اسىرۋعا دايىن جەتەكشى مامانداردىڭ باسىن قوسقان جاھاندىق فورۋم – سونىڭ ايقىن دالەلى.

بۇگىندە «دەنساۋلىق» باعدارلاماسىنىڭ ارقاسىندا قازاقستاننىڭ كارديوحيرۋرگيالىق قىزمەتى قارقىندى دامىپ كەلەدى. ەگەر 90-شى جىلداردىڭ باسىندا ەلدە جۇرەككە جاسالاتىن اشىق وپەراسيا سانى جىلىنا 500-دەن ارتپاسا، 2016 جىلى 12 مىڭنان اسىپ ءتۇستى. قازاقستان كارديوحيرۋرگيانىڭ دامۋ دەڭگەيى جونىنەن وزىق 30 ەلدىڭ تىزىمىنە كىرەدى.

2010 جىلى قۇرىلعان ۇلتتىق عىلىمي كارديوحيرۋرگيا ورتالىعى وتاندىق كارديوحيرۋرگيانىڭ كوشباسشىسى بولىپ سانالادى. بۇگىنگە جۇرەك-قان تامىرلارى اۋرۋلارىن دياگنوستيكالاۋعا جانە ەمدەۋگە ارنالعان 18 يننوۆاسيالىق تەحنولوگيا ەنگىزىلدى، الەمنىڭ تەك 20 ەلىندە عانا جۇرگىزىلەتىن 2050 بىرەگەي وتا جاسالدى. ورتالىق جۇرەك الماستىرۋعا ارنالعان 55 وپەراسيانى تابىستى ىسكە اسىردى.