«ازاماتتارعا ارنالعان ۇكىمەت» مەملەكەتتىك كورپوراسياسى استاناداعى مەملەكەتتىك قىزمەت سالاسىنداعى وڭىرلىك حابپەن بىرگە  ۇيىمداستىرعان «قازاقستاننىڭ مەملەكەتتىك قىزمەتتى دامىتۋ سالاسىنداعى تاجىريبەسى. يننوۆاسيالىق تاسىلدەر: سىن-تەگەۋرىندەر مەن شەشىمدەر» اتتى حالىقارالىق كونفەرەنسيا بارىسىندا باسقا ەلدەردەن كەلگەن قاتىسۋشىلار قازاقستاننىڭ مەملەكەتتىك قىزمەت كورسەتۋ سالاسىنداعى تاجىريبەسىمەن تانىسىپ، يننوۆاسيالىق جوبالاردى مەملەكەتتىك باسقارۋ سەكتورىنا ەنگىزۋ مۇمكىندىكتەرىن تالقىلادى دەپ حابارلايدى Qamshy.kz اقپارات اگەنتتىگى.

كونفەرەنسيانىڭ اشىلۋ سالتاناتىندا قازاقستان رەسپۋبليكاسى اقپارات جانە كوممۋنيكاسيالار ءمينيسترىنىڭ ورىنباسارى قايرات بالىقبايەۆ، استاناداعى مەملەكەتتىك قىزمەت سالاسىنداعى وڭىرلىك حابتىڭ باسقارۋشى كوميتەت ءتوراعاسى ءاليحان بايمەنوۆ،  قازاقستان رەسپۋبليكاسى پارلامەنت ءماجىلىسىنىڭ دەپۋتاتى مايرا ايسينا، سينگاپۋرداعى مەملەكەتتىك قىزمەتتى جەتىلدىرۋ جونىندەگى بۇۇ «دامۋ» باعدارلاماسى عالامدىق ورتالىعىنىڭ ديرەكتورى ماكس ەۆەرەست فيلليپس جانە ت.ب. ءسوز سويلەدى.

سپيكەرلەردىڭ ايتۋىنشا، ءقازىر قازاقستان UNDESA ەلەكتروندىق ۇكىمەتتى دامىتۋ يندەكسى اياسىندا 27ء-شى ورىندا، ياعني بۇل ۇكىمەتتىڭ حالىققا مەملەكەتتىك قىزمەتتەردى ۇسىنۋ ءتارتىبىن جەڭىلدەتۋگە باعىتتالعان بەلسەندى جۇمىسىنىڭ كورسەتكىشى.

بۇگىنگى تاڭدا مەملەكەتتىك قىزمەتتەر بىرنەشە ءتاسىل بويىنشا كورسەتىلەدى: ەلەكتروندىق ۇكىمەت پورتالى ارقىلى (700-دەن استام قىزمەتتەر مەن سەرۆيستەر)، حالىققا قىزمەت كورسەتۋ ورتالىقتارى (548 مەمقىزمەت)، Mgov ءموبيلدى قوسىمشا (80-نەن استام قىزمەت پەن سەرۆيستەر). ايتا كەتەيىك، حالىقارالىق ۇكىمەتتىك سامميتتە Mgov موبيلدىك ۇكىمەتتىڭ ۇزدىك قوسىمشاسى بوپ تانىلدى. مەمكورپوراسياعا كەلسەك، ءقازىر 723 مەملەكەتتىك قىزمەتتىڭ 548ء-ى «ازاماتتارعا ارنالعان ۇكىمەتتىڭ 349 فرونت-وفيستەرى ارقىلى ۇسىنىلادى. جانە بۇل كورسەتكىش جىلدان-جىلعا ۇلعايىپ كەلەدى (2011 جىلى حقكو ارقىلى 51 مەمقىزمەت ۇسىنىلعان). ءقازىر قىزمەتتەر تولىق سيكلمەن كورسەتىلگەندىكتەن، سۇراتىلاتىن قۇجاتتار مولشەرى ازايدى. ال قىزمەتتەر ەلەكتروندى تۇرگە كوشىرىلگەندىكتەن، مەملەكەتتىك كورپوراسياعا كەلۋشىلەر سانى قىسقاردى.

حقكو-نىڭ ساپاسىن كوتەرگەن باستى ەرەكشەلىك – ءتۇرلى ورگانداردىڭ قۇجاتتارىن «ءبىر تەرەزە» قاعيداتى بويىنشا دايىنداپ بەرۋ. مىسالى، ءازىربايجان، مالايزيا، سينگاپۋر جانە تاعى باسقا ەلدەردە ءتۇرلى ورگانداردىڭ قۇجات دايىنداۋشى وكىلدەرى ءبىر عيماراتتا بولعانىمەن، بولەك بۇرىشتاردا قىزمەت كورسەتەدى. ال قازاقستاندىقتار ءتۇرلى ورگاننىڭ قۇجاتتارىن الۋ ءۇشىن ءار بۇرىشقا بارىپ كەزەك تۇرمايدى، «ءبىر تەرەزە» ارقىلى حقكو-نىڭ كەز-كەلگەن قىزمەتكەرىنەن الا الادى.

كونفەرەنسياعا قاتىسۋشى ەلدەردىڭ وكىلدەرى قازاقستاننىڭ تاجىريبەسىن زەرتتەۋ رەفورمالار وتكىزۋ كەزىندەگى اقپاراتتىق-ساراپتامالىق جۇمىستىڭ بازاسىن كۇشەيتۋگە سەپتىگىن تيگىزەتىنىنە، سونىمەن قاتار مەمقىزمەتتەردى كورسەتۋ سالاسىندا تاجىريبە الماسۋ بارىسىندا ءتيىمدى ديالوگ ورناتاتىنىنا سەنىمدى.