ەكرانعا جول تارتقانىنا كوپ ۋاقىت بولماسا دا «حابار» تەلەارناسىنان كورەرمەن جۇرەگىنە جول تاپقان وتباسىلىق-تانىمدىق «انا مەن بالا» باعدارلاماسى وتباسى، وشاق قاسىنداعى تىرلىكتەن وركەنيەتتىڭ وزىنە دەيىنگى ءتۇيىندى ماسەلەردى قاۋزايدى. قازىرگى الماعايىپ قوعامدا وتباسىلىق تانىم، بالاعا دەگەن سۇيىسپەنشىلىك پەن تۇسىنىك جالپى العاندا وتباسى ماسەلەسى قاي تۇرعىدان قاراساق تا كۇن تارتىبىنەن تۇسپەك ەمەس. سەبەبى، ءار ادامدى تۇلعا رەتىندە قالىپتاستىرىپ، ءومىر جولىنىڭ سوقپاعىنا سالىپ تا بەرەتىن، ونىڭ تاڭداۋىنا، ارمانىنا تىكەلەي ىقپال ەتەتىن ول – وتباسى، وتباسىندا العان تاربيە. حالىق دانالىعى «وتان وتباسىنان باستالادى» دەپ تەگىن ايتپاسا كەرەك-تى. وسىنىڭ ءبارىن ءبىر ۇددەگە سىيدىراتىن «انا مەن بالا» باعدارلاماسى وتاندىق تەلەارناداعى قازىرگى تاڭدا كوشباسشى دەپ ايتساق تا قاتە ايتقاندىق ەمەس. سەبەبى، ول قوعامعا قاجەت، ونىڭ سۇرانىسىن تۋدىرىپ وتىر.
اسىرەسە قازىرگىدەي بالاعا اكە مەن انانىڭ مەيىرىمىنەن گورى كومپيۋتەر مەن سمارتفوننىڭ ىقپالى كۇشەيىپ تۇرعان ۋاقىتتا ب ا ق تاراپىنان ءجون سىلتەر كومەكشى دۇنيەلەر كەرەك-اق. ويتكەنى تەحنولوگيا قارىشتاعان وسىناۋ جانتالاس زاماندا بالاعا كوڭىل ءبولۋ، ونىڭ جان دۇنيەسىنە ءۇڭىلۋ، بالانىڭ ءتىلىن تابۋ ءار ادامنىڭ وڭاي اتقارىپ تاستايتىن شارۋاسى بولماي تۇر. ۋاقىت جەتپەۋشىلىك، جۇمىسباستىلىق، سترەسس وسىنىڭ ءبارى ۇلكەندەرگە بالانىڭ قابىلەتىن باعامداپ، وعان جول كورسەتۋگە كەدەرگىلەر كەلتىرىپ وتىرعان فاكتورلار. وسى تۇرعىدا ەرەكشە دارىنى بار بالالاردى تاۋىپ، ولاردى كوپكە تانىتىپ، بالانىڭ قابىلەتىن ەرتە قالاي بايقاۋعا بولاتىنى جايلى كەڭەستەردى دە "انا مەن بالادان" كورىپ ءجۇرمىز.
ماسەلەن، اتالعان باعدارلامىنىڭ كەزەكتى ءبىر سانىندا ءتورت ءتىلدىڭ ءالىپبيىن جاتقا بىلەتىن بەيبارىس دۇيسەن ەسىمدى 4 جاستاعى بالا اناسىمەن بىرگە ستۋديا قوناعى بولدى. بالا قابىلەتى كوگىلدىر ەكران الدىندا كەڭىنەن اشىلدى. بار-جوعى 4 جاستا بولسا دا، قازاق، ورىس، اعىلشىن جانە اراب تىلدەرىنىڭ ءالىپبيىن جاتقا بىلەتىن ءارى ونى اسا ۇلكەن جىلدامدىقپەن اسپەتتەپ جازا الاتىن «ۆۋندەركيند» بالانىڭ قابىلەتى جۇرتتى ءسۇيسىندىردى. اناسى بوتاگوزدىڭ ايتۋىنشا، بەيبارىس العاشقىدا اعىلشىن ءتىلىنىڭ ءالىپبيىن مەڭگەرگەن. وعان اسەر ەتكەن Youtube جەلىسىندەگى ءالىپبي ۇيرەتەتىن بەينەجازبالار بولسا كەرەك. كەيىننەن قازاق ءتىلىنىڭ ءالىپبيىن مەڭگەرگەن جەتكىنشەك، تىلدە 42 ءارىپ بارىن ايتىپ، ونى ستۋديا تاقتاسىنا ەش كىدىرمەستەن جازىپ بەردى. الەمدەگى قيىن ءتىل ءارى ءالىپبيى دە مەيلىنشە كۇردەلى سانالاتىن اراب الىپبيىندەگى 28 تاڭبانى ەش قينالماستان اتاپ، جازىپ بەرگەن بەيبارىستىڭ قابىلەتى اقيقاتىندا تاڭ قالىپ، تاڭداي قاعۋعا تۇرارلىق. اناسى بوتاگوزدىڭ ايتۋىنشا، اراب ءتىلىنىڭ ءالىپبيىن ۇيرەنۋگە مەيلىنشە سەبەپ بولعان، «اسىل ارنا» تەلەارناسى ەكەن. بالاعا تەلەارنانى، Youtube جەلىسىن قوسىپ بەرەتىن اتا-انا بەيبارىستىڭ ءالىپبيدى ءوز بەتىنشە بىردەن ويعا توقىپ الاتىنىن ايتىپ اعىنان جارىلدى.
وتاندىق تەلەارنادا وتباسىلىق-تانىمدىق باعدارلاما رەتىندە كوش ىلگەرى كەلە جاتقان "انا مەن بالا" باعدارلاماسى بۇگىندە بەيبارىس سياقتى تالاي بالانىڭ تالانتىن تانىتىپ قانا قويماي، قازاق حالقىنىڭ سالت-سانا، مادەنيەتىن تۋ عىپ ۇستاپ، وتباسىلىق قۇندىلىقتاردى تەلەەكران ارقىلى ناسيحاتتايدى، انا مەن بالاعا قاجەت كەڭەستەر ايتىلىپ، تاجىريبەلەر كورسەتىلەدى. ءار اپتانىڭ سەيسەنبى، سارسەنبى جانە بەيسەنبى كۇندەرى «حابار» تەلەارناسىنان ەكرانعا جول تارتاتىن بەرەرى مول باعدارلاما كەز كەلگەن اتا-اناعا بالا تاربيەسىندە كومەكشى، كەز كەلگەن كورەرمەنگە تۇرمىستىق ماسەلەلەردىڭ جاي-كۇيىنەن بارىنشا كەڭ اقپار بەرەتىن، تانىم كوكجيەگىن ارتتىراتىن تىڭ جوبا. وتباسىلىق قۇندىلىقتاردى ناسيحاتتاي جۇرەيىك!
قازىرگى بۇقارالىق مادەنيەت كەڭ ەتەك جايلاعان زاماندا وتباسى، اتا-نا مەن بالا قاتىناسىن، قوعامداعى زەرەك بالالاردىڭ تالانتىن ەلگە تانىتۋدى ماقسات تۇتقان اتالمىش باعدارلاما قوعامعا كەرەك-اق. جەڭىل ازىلگە، ارزان كۇلكىگە نەگىزدەلگەن جوبالاردان شارشاعان كورەرمەن مۇنداي باعدارلاماعا شولدەدى. قازىرگى نارىق زامانىنىڭ جەتەگىندە كەتىپ وتباسى قۇندىلىعى، ماحاببات، قامقورلىق سەكىلدى جىلى سەزىمدەرگە ءزارۋ حالىققا «انا مەن بالا» سەكىلدى جوبا اۋاداي قاجەت. اتاۋىنىڭ وزىنەن ومىردەگى ەڭ اسىل ادامداردىڭ بىر-بىرىنە دەگەن شەكسىز ماحابباتىنىڭ لەبى ەسىپ تۇرعانداي. تۇپتەپ كەلگەندە ومىردەگى ەڭ ىستىق تا، ماحابباتقا تولى پانا ول - وتباسى. ال انا سول وتباسى اتتى كىشىگىرىم الەمنىڭ بەرەكەسى.
