ريو وليمپياداسىنىڭ چەمپيونى دانيار ەلەۋسىنوۆ استانادا بوكس كۇنىنە ارنالعان شارادا ءوزىنىڭ ارىپتەستەرىن قۇتتىقتاپ، الداعى جوسپارىمەن ءبولىستى، دەپ حابارلايدى  Qamshy.kz اقپارات اگەنتتىگى sports.kz-كە سىلتەمە جاساي وتىرىپ.

«بارلىق سپورتشىلاردى بوكس كۇنىمەن شىن جۇرەكتەن قۇتتىقتايمىن. بارلىقتارىڭىز وليمپيادا مەن الەم چەمپيوناتتارىندا توپ جارىپ، جەڭىس تۇعىرىنا كوتەرىلۋلەرىڭىزگە تىلەكتەسپىن»، - دەدى بوكسشى.

ءوزىنىڭ جوسپارىمەن بولىسە كەلە، دانيال ەلەۋسىنوۆ دايىندىعى تۋرالى ايتىپ بەردى. «مەنىڭ شارشى الاڭعا شىقپاعانىما ءبىرشاما ۋاقىت بولىپ قالدى. ەكى نەمەسە ءۇش چەمپيوناتقا قاتىسىپ، كەلەسى جىلى شەتەلگە شىقسام دەيمىن»، - دەيدى ريو وليمپياداسىنىڭ چەمپيونى. 

«قازىرگى ۋاقىتتا ماعان ءبىراز ۇسىنىستار كەلىپ ءتۇسىپ جاتىر. ءبىراق اۋەسقوي بوكسقا قايتىپ ورالعاندىقتان، ول ۇسىنىستاردىڭ بارلىعىن قاراپ جاتقان جوقپىن. مەنىڭشە، بۇل ۇسىنىستاردى ەكىنشى جوسپارعا قالدىرا تۇرسام دەيمىن. اۋىسىپ جاتسام، ول تۋرالى ايتاتىن بولامىن»، - دەيدى ەلەۋسىنوۆ.