«QAZAQSTAN» تەلەكورپوراسياسىنا قاراستى 14 ايماقتىق تەلەارنالاردىڭ اتاۋلارى وزگەردى. بۇرىن «قازاقستان - پاۆلودار»، «قازاقستان - قاراعاندى»، «قازاقستان - قىزىلوردا» دەپ اتالىپ كەلگەن وڭىرلىك تەلەارنالار ەندى «ERTIS»، «SARYARQA»، «QYZYLORDA» بولىپ وزگەردى. 

بۇل تۋرالى بۇگىن «QAZAQSTAN» رترك» اق باسقارما ءتوراعاسى ەرلان قارين ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا ءمالىم ەتتى، دەپ حابارلايدى Qamshy.kz اقپارات اگەنتتىگى قازاقپارات مالىمەتىنە سۇيەنىپ.

«بارلىق ارنالاردىڭ لوگوتيپتەرىنە وزگەرىس ەنگىزىپ، ءار ءوڭىردىڭ وزىنە عانا ءتان تابيعي-گەوگرافيالىق اتاۋلارىن قولدانۋدى ءجون كوردىك. مىسالى، بۇرىن «قازاقستان - پاۆلودار»، «قازاقستان - قاراعاندى»، «قازاقستان - قىزىلوردا» جانە ت.ب بولىپ اتالسا، ەندى «ERTIS»، «SARYARQA»، «QYZYLORDA» بولىپ وزگەردى. جاڭا ماۋسىم اياسىندا ايماقتىق تەلەارنالاردا ءبىرقاتار جاڭا باعدارلامالار شىعا باستادى. ستۋديالاردىڭ ديزاينى جاڭارىپ، ءارتۇرلى جوبالاردىڭ سانى ارتتى. جالپى، بۇل باستاما ايماقتارداعى تەلەارنالارعا جاڭا لەپ، جاڭا سەرپىلىس قانا بەرىپ قويماي، قازاق تەليەۆيزياسىنىڭ زاماناۋي ۇردىستەرگە بەيىمدەلىپ، ءارى قاراي دامۋىنا جول اشادى» -دەدى ە.قارين.

باسقارما ءتوراعاسىنىڭ ايتۋىنشا، جاڭا اتاۋلار جەرگىلىكتى زيالى قاۋىممەن، ارنا ۇجىمىمەن ۇزاق تالقىلاۋدان كەيىن بەكىتىلگەن.

سونداي-اق، جاڭا ماۋسىم اياسىندا بارلىق ايماقتاعى تەلەارنالاردا ءتۇرلى باعىتتاعى 96 باعدارلاما شىعىپ ۇلگەردى. ولاردىڭ قاتارىندا ءبىلىم سالاسىنداعى رەسپۋبليكالىق، حالىقارالىق وليمپيادالارعا قاتىسىپ، جەتىستىككە جەتكەن جاستار جايلى «ەرتىس ءوڭىرىنىڭ ەرەندەرى»، قازاقتىڭ ۇلتتىق قولونەرىنە ارنالعان «تالعام مەن تانىم»، اۋىل مەن قالانىڭ تىنىس-تىرشىلىگىن سالىستىرا وتىرىپ، ۇمىت بولىپ بارا جاتقان مال سويۋ، جىلىكتەۋ، تاباق تارتۋ، قىمىز ءپىسىرۋ سياقتى قازاقى تۇرمىستى ناسيحاتتايتىن «بۇك-شىك» جانە وزگە دە قىزىقتى جوبالار بار.

 «QAZAQSTAN» وڭىرلىك تەلەارنالارىنىڭ جاڭا اتاۋلار ءتىزىمى:

1. «قازاقستان-قىزىلوردا» - QYZYLORDA
2. «قازاقستان-پەتروپاۆل» - QYZYLJAR
3. «قازاقستان-قاراعاندى» - SARYARQA
4. «قازاقستان-اقتوبە» - AQTO`BE
5. «قازاقستان-اتىراۋ» - ATYRAY`
6. «قازاقستان-ورال» - AQJAI`YQ
7. «قازاقستان-تاراز» - JAMBYL
8. «قازاقستان-كوكشەتاۋ» - KO`KS`E
9. «قازاقستان-پاۆلودار» - ERTIS
10. «قازاقستان-اقتاۋ» - MAN`G`YSTAY`
11. «قازاقستان-وسكەمەن» - ALTAI`
12. «قازاقستان-سەمەي» - SEMEI`
13. «قازاقستان-قوستاناي» - QOSTANAI`
14. «قازاقستان-شىمكەنت» - ON`TU`STIK