وڭتۇستىك كورەيادا جىل سايىن ەلدە تىنىشتىق ورنايتىن ۋاقىت بولادى. ەلەكتريچكالار ۋاقىتشا توقتايدى، بيرجا ساۋدانى كەيىنگە شەگەرەدى، ۇشاقتارعا ۇشىپ، قونۋعا تىيىم سالىنادى.

سەبەبى بۇل كۇنى وقۋشىلار ەمتيحان تاپسىرادى دەپ جازادى Qamshy.kz اقپارات اگەنتتىگى BBC-گە سىلتەمە جاساپ. ءدال وسى كۇنى وقۋشىلاردىڭ تاعدىرى شەشىلەدى. ەگەر ەمتيحاندى جاقسى تاپسىرسا ەلدىڭ ەڭ وزىق ۋنيۆەرسيتەتتەرىنىڭ بىرىندە وقي الادى. بۇل – ساپالى ءبىلىم الىپ، بولاشاقتا مول قاراجات تابۋعا جول اشادى.

وسى جىلى ءبىرىڭعاي تەست 16-شى قاراشادا ءوتۋ كەرەك بولعان. الايدا جەر سىلكىنىسى سالدارىنان ول ءبىر اپتاعا شەگەرىلدى. ايتا كەتەيىك، ماگنيتۋداسى 5،4 جەر سىلكىنىسى كورەيانىڭ وڭتۇستىك-شىعىس بولىگىندە بولدى.

تاريحتا العاش رەت تەست ۋاقىتى توتەنشە جاعدايعا بايلانىستى كەيىنگە شەگەرىلگەن. ءبىلىم جانە عىلىم مينيسترلىگى جەر سىلكىنىسى بولعان جەردەگى مەكتەپتە وتىرۋ ءقاۋىپتى دەپ شەشكەن.

ادەتتە بيلىك جەر سىلكىنىسى بولماي-اق ەمتيحان ۋاقىتىندا وقۋشىلار ءۇشىن بارلىق جاعدايدى جاسايدى. ەلدىڭ بارلىق مەملەكەتتىك مەكەمەسى بۇل كۇندەرى ەرەكشە رەجيمدە جۇمىس ىستەيدى.

وڭتۇستىك كورەياداعى تەست الەمدەگى ەڭ قاتال ەمتيحان بولىپ سانالادى. وقۋشىلار ءبىر كۇندە بارلىق پاننەن ەمتيحان تاپسىرادى.

ەمتيحان – تۇلەكتەردىڭ بولاشاعىن شەشەدى

24ء-شى قاراشادا 593 مىڭ وقۋشى 1180 ەمتيحان وتكىزەتىن ورتالىققا كەلدى. ءارقايسىسى تاماق، جىلۋ، قاۋىپسىزدىك جانە تىنىشتىقتى قامتاماسىز ەتۋ كەرەك.

ەمتيحان ۋاقىتىنداعى ەڭ راديكالدى شارا – ۇشاقتاردىڭ توتەنشە جاعدايدان تىس ۇشۋعا جانە قونۋعا تىيىم سالىنۋى. وقۋشىلار اۋديو تىڭداعان 35 مينۋتتا ەلدە تولىق تىنىشتىق ورنايدى.

كولىك مينيسترلىگىنىڭ بۇيرىعىمەن وسى ۋاقىتتا اۋەدە بولعان ۇشاقتار اۋەدەن جەرگە 3 شاقىرىمعا تومەندەۋگە تىيىم سالىندى.

سەۋل نوتام (Notice to Airmen) جۇيەسى ارقىلى بارلىق اۋە كومپانيالارىن شەكتەۋ تۋرالى ەسكەرتەدى.

ەمتيحان تاپسىرمالارىن قالاي قۇپيادا ۇستايدى؟

جىل سايىن تەست سۇراقتارىن دايىندايتىنداردى ۋاقىتشا سىرتقى الەمنەن وقشاۋلايدى. ەمتيحان سۇراقتارى دايىندالىپ جاتقان عيمارات قاتاڭ قۇپيادا ساقتالادى. تاپسىرمانى دايىنداعاندارعا قىزمەت كورسەتەتىندەر دە عيماراتتان شىعارىلمايدى.   

اقپارات جاريا بولماۋى ءۇشىن، تەست تاپسىرمالارى دايىندالىپ جاتقان عيماراتتا بارلىق كوممۋنيكاسيا قۇرالى وشىرىلەدى. عيماراتتان تەك توتەنشە جاعدايدا عانا شىعۋعا بولادى. ماسەلەن، جاقىنى قايتىس بولعاندا. ءتىپتى ەدەن جۋۋشىلارعا دەيىن عيماراتتان شىعۋعا رۇقسات بەرىلمەيدى. جەرلەۋ راسىمىنە بارعاننىڭ وزىندە ونى ارنايى اگەنتتەر اپارىپ، اكەلەدى.

وسى جىلى ەمتيحان سۇراقتارىن دايىنداۋ 13ء-شى قازاندا باستالدى.  ونى 700 ادام دايىندادى. ءبىرىڭعاي تەست 16-شى قاراشادا وتەدى دەپ جوسپارلانعاندىقتان، 700 ادام سول كۇنى بوستاندىققا شىعامىز دەپ ۇمىتتەنگەن. جەر سىلكىنىسىنە بايلانىستى،  ەمتيحان ءبىر اپتاعا شەگەرىلگەندىكتەن ولار 1 اپتا قاماۋدا بولۋعا ءماجبۇر.

وقۋشىلار تەست تاپسىرعاندا  وقۋشىلاردىڭ قاۋىپسىزدىگىن ون مىڭ پوليسەي مەن ءورت ءسوندىرۋشى قورعايدى.

مەكتەپ وقۋشىلارىنىڭ ءبىرى قۇجاتتارىن ۇمىتىپ كەتكەن جاعدايدى ونى جەدەل تۇردە ۇيىنە جەتكىزىپ، الىپ كەلەتىن ارنايى كولىكتەر بولىنەدى.

وسى جىلى 18 مىڭنان استام پوليسيا تەست تاپسىرۋ ورتالىقتارىن كۇزەتتى. سونىمەن قاتار، توتەنشە جاعداي بولعان جاعدايدا ارنايى جاساق تا وقۋشىلار قاۋىپسىزدىگى ءۇشىن دايىن تۇردى.

جەر سىلكىنىسى بولعان اۋدانداردا تابيعات اپاتى قايتالانعان جاعدايدا وقۋشىلارعا كومەك كورسەتۋ ءۇشىن ساربازدار مەن دارىگەرلەر جاساقتالدى.

سەۋل اكىمشىلىگى قوعامدىق كولىكتەردىڭ ادەتتەگى ۋاقىتتان ەرتە شىعۋعا بۇيرىق بەردى. بۇل وقۋشىلاردىڭ ەمتيحان تاپسىراتىن ورىنعا ۋاقىتىلى جەتۋ ءۇشىن جاسالدى. قوسىمشا تاكسي مەن جەكە كولىكتەر دە جۇمىس ىستەدى.  

ءتىپتى KOSPI يندەكسى بويىنشا 1،6 تريلليون اقش دوللارىن ساۋدالايتىن كورەيانىڭ قور بيرجاسى دا ساۋدانى ءبىر ساعاتقا كەش باستادى.

كورەيانىڭ بانك فەدەراسياسى تاڭ ەرتەڭ قوعامدىق كولىكتە بالالارىن شىعارىپ سالاتىن اتا-انا مەن مۇعالىمدەردىڭ كوپ بولاتىنىن ەسكەرىپ، جۇمىس كۇنىن 9-دان 10-عا اۋىستىردى. باسقا دا جەكەمەنشىك مەكەمەلەر ءدال سولاي ىستەدى.