ەگدە كىسىلەردىڭ ارتەريالىق قان قىسىمى تۇسسە جاقىن ۋاقىتتا ءولىم قۇشۋى عاجاپ ەمەس. مۇنداي ۇيعارىمعا عالىمدار زەرتتەۋ ناتيجەسىندە كەلگەن دەپ جازادى Qamshy.kz اقپارات اگەنتتىگى JAMA Internal Medicine-گە سىلتەمە جاساپ.
ەكسەتەر ۋنيۆەرسيتەتىنىڭ عالىمدارى 60 جانە ودان جوعارى جاستا قايتىس بولعان 46 مىڭ بريتاندىقتىڭ مەديسينالىق جازبالارىن ساراپتادى. ونىڭ ىشىندە جۇرەك قان تامىرلارى اۋرۋلارى مەن جۇيكە اۋرۋلارى بارلار مەن دەنساۋلىعىندا ەشقانداي كىناراتى جوقتارى بار. وسى ەكى توپتا دا قايتىس بولعانعا دەيىن ارتەريالىق قان قىسىمىنىڭ ءتۇسۋى بايقالعان.
ماماندار مۇنداي مالىمەتتىڭ ەگدە جاستاعى ادامداردى ەمدەۋگە جانە ەم-دوم جۇرگىزۋدىڭ ءادىس تاسىلدەرىن قولدانۋعا كومەكتەسەتىنىن ايتادى.
