باكۋدا قازاقستان رەسپۋبليكاسى مەن ازەربايجان رەسپۋبليكاسى اراسىنداعى ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ كەزەكتى 14-وتىرىسى ءوتتى دەپ حابارلايدى Qamshy.kz اقپارات اگەنتتىگى.

وتىرىسقا كوميسسيانىڭ تەڭ ءتوراعالارى – قازاقستاننىڭ ەنەرگەتيكا ءمينيسترى قانات بوزىمبايەۆ جانە ازەربايجاننىڭ ەنەرگەتيكا ءمينيسترى پيارۆيز شاحبازوۆ، كوميسسيا مۇشەلەرى، سونداي-اق ەكى ەلدىڭ ساراپشىلارى قاتىستى.

ءىس-شارا شەڭبەرىندە تاراپتار ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ 13-وتىرىسىندا قابىلدانعان شەشىمدەردىڭ جۇزەگە اسۋ بارىسىن قاراستىرىپ، ەكىجاقتى ىنتىماقتاستىقتىڭ ساۋدا-ەكونوميكالىق، وتىن-ەنەرگەتيكالىق، اۋىل شارۋاشىلىق، ترانزيتتىك- كولىكتىك، مادەني-گۋمانيتارلىق جانە تاعى باسقا سالالارىنداعى ماسەلەلەرىن تالقىلادى.

پ.شاحبازوۆ وتىرىستى اشۋ كەزىندە وتكەن جىلدان باستاپ ەكى ەلدىڭ ساۋدا-ەكونوميكالىق ىنتىماقتاستىعى وڭ سەرپىن كورسەتكەنىن اتاپ ءوتتى. سونداي-اق، قازاقستان پرەزيدەنتى ن.ءا.نازاربايەۆتىڭ اعىمداعى جىلعى ءساۋىر ايىندا باكۋعا جاساعان ساپارى اياسىندا ەكى ەل باسشىلارى ساۋدا-ەكونوميكالىق ىنتىماقتاستىقتى دامىتۋ مەن ونى ءارى قاراي ىلگەرىلەتۋ بويىنشا ءتيىستى «جول كارتاسىن» ازىرلەۋ تۋرالى تاپسىرما بەرگەنىن اتاپ ءوتتى.

ءوز كەزەگىندە ق.بوزۋمبايەۆ قازاقستان مەن ازەربايجاننىڭ ساۋدا-ەكونوميكالىق بايلانىستارى ەكى ەل قارىم-قاتىناستارىنىڭ نەگىزىن قالايتىنىن جانە وسى قاتىناستاردى ودان ءارى ۇلعايتۋ ءۇشىن ترانزيت، كولىك، ەنەرگەتيكا،  اۋىل شارۋاشىلىعى، تەمىر جول كولىك جاساۋ، تۋريزم جانە سپورت سالالارىندا ۇلكەن الەۋەتى بار ەكەنىن اتاپ ءوتتى. سونىمەن بىرگە، قازاقستان دەلەگاسياسىنىڭ باسشىسى عىلىمي-تەحنيكالىق جانە مادەني-گۋمانيتارلىق سالالارداعى ارىپتەستىك تە جاقسى دەڭگەيگە جەتكەنىنە ەرەكشە كوڭىل اۋداردى.

بۇعان قوسا، 2017 جىلدىڭ ءساۋىر ايىندا ق ر پرەزيدەنتى ن.ءا.نازاربايەۆتىڭ  ازەربايجانعا جاساعان رەسمي ساپارىنىڭ قورىتىندىسى بويىنشا ەكى ەلدىڭ مەملەكەت باسشىلارى قول جەتكىزگەن ۋاعدالاستىقتاردى ىسكە اسىرۋ ماقساتىندا تاراپتار 2020 جىلعا دەيىن ءوزارا ساۋدا اينالىمىن ەكى ەسەگە كوتەرۋ ماسەلەسىن، سونىڭ ىشىندە ەكىجاقتى نارىققا ەكسپورتتالاتىن تاۋارلار نومەنكلاتۋراسىن ۇلعايتۋ ءۇشىن قاجەتتى شارالاردى اتاپ ءوتتى.

ءىس-شارانىڭ ناتيجەسىندە وتىرىستىڭ قورىتىندى حاتتاماسىنا قول قويىلدى جانە ەكى ەل اراسىنداعى ساۋدا-ەكونوميكالىق ىنتىماقتاستىقتى كەڭەيتۋ بويىنشا «جول كارتاسى» ازىرلەنىپ، قابىلداندى. سونىمەن قاتار، تاراپتار  ۇكىمەتارالىق كوميسسياسىنىڭ كەزەكتى 15-وتىرىسىن 2018 جىلى استانا قالاسىندا وتكىزۋگە كەلىستى.

سونىمەن قاتار، 8 جەلتوقساندا باكۋدا قازاقستان رەسپۋبليكاسىنىڭ ەنەرگەتيكا ءمينيسترى ق.بوزىمبايەۆ ازەربايجان رەسپۋبليكاسىنىڭ ەكونوميكا ءمينيسترى شاحين مۋستافايەۆپەن كەزدەستى.

ونىڭ بارىسىندا تاراپتار ەكسپورتتىق-يمپورتتىق قيماداعى ەكىجاقتى ساۋدا-ەكونوميكالىق ماسەلەلەردى، ترانزيتتىك-كولىكتىك ىنتىماقتاستىعى جايلى پىكىر الماسىپ، قازاقستان مەن ازەربايجان اراسىنداعى ەكونوميكالىق ىنتىماقتاستىعى جونىندەگى ۇكىمەتارالىق كوميسسياسىنىڭ وتكەن 14-وتىرىسىنىڭ قورىتىندىلارىن تالقىلادى.

بۇدان باسقا، ازەربايجان ءمينيسترى «اقتاۋ تەڭىز پورتى» ەركىن ەكونوميكالىق ايماعىنداعى اۋىل شارۋاشىلىق ونىمدەردى قابىلداۋ، ساقتاۋ جانە قايتا وندەۋ بويىنشا لوگيستيكالىق ورتالىعىن بىرلەسە باسقارۋ مۇمكىندىگىن قاراستىرۋدى ۇسىندى.

سونىمەن قاتار، تاراپتار مۇناي كولىك جاساۋ سالاسىنداعى ءوزارا مۇمكىندىكتەردى قاراستىرۋدى ۋاعدالاستى.