بۇگىن الماتىدا «تۇركىتىلدەس جۋرناليستەر قورى» قق ۇيىمداستىرۋىمەن وتكەن «ەركىن ءسوز» شىعارماشىلىق بايقاۋىنىڭ قورىتىندىسى شىقتى، دەپ جازادى qamshy.kz. جۋرناليستەردىڭ شىعارماشىلىق الەۋەتىن اشۋ جانە جۋرناليستەر قاۋىمىن ىنتالاندىرۋ ماقساتىندا قولعا الىنعان بايقاۋ  قارجىلىق (قازاقستان تاۋەلسىزدىك العالى بەرى 26 جىلدا قارجى سالاسىندا قول جەتكىزگەن جەتىستىكتەرى مەن پروبلەمالارى، شەشۋ جولدارى، قارجىلىق ساياسات، ۇلتتىق ۆاليۋتا، بانك قىزمەتى، نەسيەلەۋ ت.ب.) تاقىرىپتاعى ماتەريالداردى سارالادى.

«حالىق توبى» باس دەمەۋشىلىك ەتكەن جۋرناليستەر بايقاۋى قازاق تىلىندە جازاتىن جۋرناليستەر اراسىندا ءوتتى.  جۋرناليستەرگە وعان جەكەلەي «قازاقستان حالىق بانكى»، «كازكوممەرسبانك» قارجىلىق قولداۋ كورسەتكەن. ماراپاتتاۋعا ارنالعان سالتاناتتى كەشكە جۋرناليستەرمەن قوسا UNESCO مەن بۇۇ وكىلدەرى دە قاتىستى. 

بايقاۋدىڭ ۇيىمداستىرۋ كوميتەتى بەكىتكەن ءادىلقازىلار «ۇزدىك تەلەسيۋجەت»، «ۇزدىك ماقالا»، «ۇزدىك راديوحابار»، «ۇزدىك سايت ماقالاسى»، «ۇزدىك فوتورەپورتاج»، «ۇزدىك شىعارماشىلىق توپ» اتالاتىن 6 نوميناسيا بويىنشا جەڭىمپازداردى انىقتادى، تولىمدى ماتەريال بولماعانىنا بايلانىستى «ۇزدىك فوتورەپورتاج» نوميناسياسى بويىنشا جۇلدە بەرىلگەن جوق. كەشتى «تۇركىتىلدەس جۋرناليستەر قورى» باسشىسى نازيا جويامەرگەن قىزى بايقاۋدى ۇيىمداستىرۋعا قولداۋ بىلدىرگەن ۇيىمدار مەن جۋرناليستەرگە العىسىن ايتىپ، جۋرناليستەردى جەڭىسىمەن قۇتتىقتاۋىمەن باستادى.

جۋرناليستەردى ماراپاتتاۋ راسىمىندە ءسوز العان «حالىق بانك» PR مەنەدجەرى دوسبول ارىستانبەكوۆ: «ەركىن ءسوز» شىعارماشىلىق بايقاۋى رەسپۋبليكالىق دەڭگەيدە، ەلىمىز بويىنشا بارلىق ايماقتاردى، بارلىق وڭىرلەردى قامتىدى. تەك قانا ءقازاقتىلدى جۋرناليستەرگە ارنالعان بايقاۋعا تىكەلەي «حالىق توبى» بولىپ قولداۋ كورسەتۋ ءبىز ءۇشىن ۇلكەن قۇرمەت دەسەك بولادى. 2017 جىلى قازاقستاننىڭ قارجى سەكتورىندا ورىن العان ۇلكەن جاڭالىق «حالىق توبىنا»  «كازكوممەرسبانك» ەنگەنى.  «كازكوممەرسبانك» قازىرگى كەزدە بۇرىنعىداي ەركىن جۇمىس ىستەپ وتىر. ونىڭ ءبىر كورىنىسى وسى «ەركىن ءسوز» بايقاۋىنا تىكەلەي قولداۋ بىلدىرگەنى. بايقاۋعا قاتىسقان بارشا جۋرناليستەر ءوز سالاسىنىڭ كاسىبي ماماندارى. بۇل سايىستىڭ باستى ماقساتى جۋرناليستەردىڭ كاسىبي دەڭگەيىن كوتەرۋ. سونداي-اق وسى بايقاۋدى ۇيىمداستىرۋ ارقىلى ەلىمىزدەگى بارلىق جۋرناليستەردىڭ نازارىن قارجى سالاسىنا بۇرعىمىز كەلدى»، - دەيدى.

ال، ءادىل قازى قۇرامىندا بولعان اعا بۋىن جۋرناليست، مەملەكەت قايراتكەرى ءامىرجان قوسانوۆ: «قاراپايىم حالىقتىڭ قارجىلىق ساۋاتى تومەن" دەگەنگە كەلىسپەيمىن!  ساۋاتسىز بولسا، وسىناۋ قىمباتشىلىق جايلاعان زاماندا ماردىمسىز جالاقى مەن زەينەتاقىنى جىڭىشكەنى ۇزبەي، كەلەسى ايعا دەيىن جەتكىزە الار ما ەدى؟!

مىنە، سول تۋرالى اشىق تا كاسىبي تۇردە جازۋ كەرەك. ول، ءسوزسىز، جۋرناليستەردىڭ مىندەتى! بۇل - العاشقى بايقاۋ، قازىلار القاسىنىڭ وكىلى رەتىندە ايتاتىنىم - قازاق جۋرناليستەرى كەلەسى كەزەڭدە وسى بايقاۋعا بەلسەندىرەك قاتىسسا ەكەن!»، - دەدى ءوز سوزىندە.

«ۇزدىك تەلەسيۋجەت» استانا ارناسى ءتىلشىسى ەركىن قارينگە بۇيىرسا، «ۇزدىك ماقالا» بويىنشا جۇلدە «ايقىن» گازەتى ءتىلشىسى اباي ايماعامبەتكە، «ۇزدىك سايت ماقالاسى» Turaninform.kz سايتى باس رەداكتورى قۇرمانعالي نۇرعالييەۆكە بەرىلدى. ال، ۇزدىك شىعارماشىلىق توپ رەتىندە «قازاقستان» ارناسىنىڭ «پاراسات مايدانى» باعدارلاماسى ۇجىمى اتالسا، «ۇزدىك راديوحابار» جۇلدەسىن قازاق راديوسىنان گۇلباعىش بوستان الدى. جۇلدەگەرلەردىڭ ءارقايسىسى 150 مىڭ تەڭگە اقشالاي سىيلىق پەن باعالى ەستەلىكتەر الدى. سونداي-اق 5 نوميناسيا بويىنشا دا ىنتالاندىرۋ جۇلدەسى تاپسىرىلدى. تەلەسيۋجەتتەن ءامىربولات قۇسايىن، ۇزدىك ماقالادان تاڭشولپان تارعىن، ۇزدىك فوتورپەورتاج بويىنشا ماقسات قۇسايىنوۆ ىنتالاندىرۋ جۇلدەسىن الىپ، باعالى سىيلىقتارعا يە بولدى.

ايتا كەتسەك بايقاۋدى ۇيىمداستىرعان تۇركىتىلدەس جۋرناليستەر قورى وسىدان 3 جىل بۇرىن 2014 جىلى 30 قاراشادا قۇرىلعان.

فوتورەپورتاج: ماقسات قۇسايىنوۆ.