جۋىردا پروديۋسەر بايان الاكوزوۆا «قوزى كورپەش - بايان سۇلۋ» حيكاياسىنىڭ ءتۇسىرىلىمىن اياقتادى.   اتالمىش كينوتۋىندىنىڭ  قويۋشى-وپەراتورى - الەكساندر رۋبانوۆ. كارتينانىڭ قويۋشى-رەجيسسەرى - دارحان ساركەنوۆ. 

 كوگىلدىر ەكراننان كورىنىس العان اتالمىش كينوتۋىندىعا كورەرمەندەر تاراپىنان ءتۇرلى پىكىرلەر ايتىلۋدا. جولىمبەت ماكىش ەسىمدى Facebook قولدانۋشىسى ءوز پاراقشاسىندا وتاندىق كينوعا قاتىستى پىكىرىن جازدى، دەپ جازادى Qamshy.kz اقپارات اگەنتتىگى. 

«قوزى كورپەش-بايان سۇلۋ» دەيتىن ءفيلمنىڭ العاشقى ءۇش مينۋتىن كوردىم. سول دا جەتەدى ەكەن. كينونىڭ باسىنداعى ەكى قىزدىڭ ءسوز ساپتاعانى دا، ءتىلى ورىسشا شىققان ادام قۇساپ ەجىكتەپ سويلەگەنى دە سۇمدىق ەندى. تاپ-تازا كالكا! پروديۋسەر بايانعا ولار قازاقشا كەرەمەت سويلەپ تۇرعانداي بولىپ كورىنگەن شىعار. ويتكەنى ونىڭ ءوزىنىڭ ءتىلى دە جەتىسىپ تۇرعان جوق قوي. فيلمگە ول تۋرا سونداي «راكۋرسپەن» قاراپ، سۇمدىق اسەر العان سەكىلدى. كينونىڭ ءتىلى وسىنداي كەمتار، ءدۇبارا بىردەمە بولىپ شىعىپتى. ءتىپتى، انا قىزدىڭ كوزىن توڭكەرگەن قىلىعىنا دەيىن قالانىڭ ورىستانعان ورتاسىنداعى قىزداردىڭ قىلىعى تۋرا. اكتريسالار دا وبرازعا كىرە الماعان. «وبرازعا كىرە الماعان» دەيمىن، مىنا ءفيلمنىڭ سەنارييىن دە ورىسشا جازىپ الىپ، قازاقشا اۋدارعان با، نەمەنە؟ تىلدەرى دە، سويلەگەن سوزدەرى دە جاتىق ەمەس، جاتتاندى. كينودا دا «وتقان، جاتىرعان، وياق، بۇياق» دەيتىن ءبىرتۇرلى ماقاممەن وتتاپ وتىر. اكتريسالاردىڭ جۇزىندە ۇياڭدىق جوق. تۇرلەرىنەن ورىستانعان ورتانىڭ بەتباق بولمىسى عانا بايقالادى. باياندى مۇنداي نارسەگە جولاتپاۋ كەرەك ەدى. قازىرگى ءومىردىڭ بۇكىل «قوقسىعىن» كينوعا اكەپ توگە سالىپتى. ۇيات-اي، اكەڭ! بايان، بايان دەگەنگە..... ءبارىن قۇرتىپتى عوي...» دەپ جازدى جەلى قولدانۋشىسى.