2017 جىلى باتىس قازاقستان وبلىسىندا «نۇرلى جول» باعدارلاماسىنىڭ اياسىندا 985 پاتەردەن تۇراتىن 7 ءۇي سالىنعان دەپ حابارلايدى Qamshy.kz اقپارات اگەنتتىگى. سولاردىڭ ىشىندە اتالعان مەملەكەتتىك باعدارلامانىڭ «جەرگىلىكتى اتقارۋشى ورگاندار جەلىسى بويىنشا كرەديتتىك تۇرعىن ءۇي» باعىتى بويىنشا 481 پاتەرلىك 4 ءۇي، «بايتەرەك ديەۆەلوپمەنت» اق جەلىسى بويىنشا 504 پاتەرلىك 3 ءۇي بوي كوتەردى.
«تۇرعىن ءۇي قۇرىلىس جيناق بانكىنىڭ» وبلىستىق فيليالى جىلدىق جۇمىس قورىتىندىسى تۋراسىندا بقو وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا فيليال ديرەكتورى ايگۇل ناۋرىزالييەۆا تولىق ايتىپ ءوتتى. ودان بولەك بريفينگكە قاتىسقان بقو قۇرىلىس باسقارماسى باسشىسىنىڭ ورىنباسارى الىبەك انتازييەۆ اتالعان باعدارلاما اياسىندا اتقارىلعان جۇمىستارعا توقتالدى.
ايگۇل ناۋرىزالييەۆانىڭ ايتۋىنشا، بيىلعى جىلى وبلىستا 55 000-عا جۋىق ادام مەملەكەتتىڭ سىياقىسىن الادى. بۇل – تۇرعىن ءۇي قۇرىلىس جيناق بانكىنەن سالىم اشقان ايماق تۇرعىندارىنىڭ سانى. ولاردىڭ 18 722ء-سى كەلىسىمشارتتى 2017 جىلى رەسىمدەگەن.
2017 جىلى باتىس قازاقستان وبلىسىندا 2505 ادام 12،5 ملرد. تەڭگەنىڭ زايمىن الىپ، تۇرعىن ءۇي جاعدايىن جاقسارتىپتى.
كەلەسى جىلى بانك «نۇرلى جەر» باعدارلاماسىن جۇزەگە اسىرۋدى جالعاستىرادى. «قۇرىلىستى جەكە قۇرىلىس جۇرگىزۋشىلەر ارقىلى ىنتالاندىرۋ» باعىتىنىڭ اياسىندا 2018 جىلى وبلىستىڭ 173 تۇرعىنى قونىس تويىن تويلاماق. «قازاقستاننىڭ تۇرعىن ءۇي قۇرىلىس جيناق بانكى» اق مەن «قاز-حول» ج ش س جانە «كاراۆاننىي پۋت» ج ش س اراسىندا قول قويىلعان كەلىسىمدەرگە سايكەس، ورال قالاسىنداعى قۇرمانعازى كوشەسى، 198 مەكەنجايىندا 9 قاباتتى تۇرعىن ءۇيدىڭ جانە گاگارين كوشەسى، 2 مەكەنجايى بويىنشا 126 پاتەرلىك ءۇيدىڭ قۇرىلىسى جۇرۋدە. ۇيلەر 2018 جىلدىڭ تامىزىندا پايدالانۋعا بەرىلەدى دەپ جوسپارلانىپ وتىر.
«نۇرلى جەر» باعدارلاماسىنىڭ اياسىندا «جەكە تۇرعىن ءۇي قۇرىلىسىن دامىتۋ» باعىتىندا توقپاي، فەدوروۆكا، پەرەمەتنوە جانە داريان ەلدى مەكەندەرىندە جەر ۇيلەر قۇرىلىسىن جۇرگىزۋ جوسپارلانۋدا. اتالعان جوبالار بويىنشا بولمەلەردىڭ ورنالاسۋ رەتى جانە نىسانداردىڭ ءبىرىڭعاي ساۋلەتتىك ستيلدە بولاتىنى انىقتالدى. مۇنداعى ۇيلەردىڭ ءبىر شارشى مەترىنىڭ باعاسى 120 000 تەڭگەدەن اسپايتىن بولادى (ينجەنەرلىك-كوممۋنيكاسيالىق ينفراقۇرىلىمدى ەسەپتەمەگەندە).
تۇرعىن ءۇي قۇرىلىس جيناق بانكىنىڭ جەكە ءونىمى - «ءوز ءۇيىم» باعدارلاماسى دا ايماقتا ءساتتى ءجۇرىپ جاتىر. اتالعان جوبانىڭ اياسىندا 2018 جىلى بقو ءىىد قىزمەتكەرلەرى باسپانالى بولادى. سونىمەن قاتار، ورالدىڭ سولتۇستىك-شىعىس بولىگىندە «باتىس قازاقستان ەلەكتر تاراتۋ جەلىسى كومپانياسى» اق مەن «جايىقجىلۋقۋات» اق قىزمەتكەرلەرى ءۇشىن 9 قاباتتى تۇرعىن ءۇي سالۋ جوسپارلانۋدا. بۇل ۇيىمداردا ىستەيتىن قىزمەتكەرلەردىڭ جالپى سانى 800-دەن اسادى.
الىبەك انتازييەۆتىڭ ايتۋىنشا، «نۇرلى جەر» باعدارلاماسى اياسىندا تۇرعىن ءۇي قۇرىلىسى قارقىندى جۇرگىزىلۋدە. كۇنى بۇگىن وبلىستا 18 كوپپاتەرلى جانە 188 ءبىر قاباتتى تۇرعىن ۇيلەر سالىنۋدا. بۇل ماقساتقا قارجىلاندىرۋدىڭ بارلىق كوزدەرىنەن 15 ملرد. تەڭگە بولىنگەن. جىل اياعىنا دەيىن 10 كوپپاتەرلى تۇرعىن ءۇيدى پايدالانۋعا بەرۋ جوسپارلانۋدا (9 ءۇي ورال قالاسىندا، 1 ءۇي اقساي قالاسىندا). سونداي-اق اۋىلدىق جەردە 113 ءبىر قاباتتى ۇيلەر يەلەرىنە تاپسىرىلادى.
- «نۇرلى جەر» باعدارلاماسى بويىنشا تۇرعىن ءۇي سالۋ جوسپارى 278،1 مىڭ شارتى مەتر. الايدا، ءبىز ءقازىردىڭ وزىندە بۇل سالادا ۇلكەن العا باسۋشىلىقتى كورىپ وتىرمىز. ءبىز جوسپارلى مەجەنى 36%-عا اسىرا ورىندادىق، ياعني 300 مىڭ شارشى مەتردەن اسا ءۇي سالىندى. الداعى 2018 جىلى تۇرعىن ءۇي قۇرىلىس جيناق بانكى سالىمشىلارىنا ارنالعان 14 ءۇيدىڭ قۇرىلىسى باستالادى، - دەپ اتاپ ءوتتى ءا.انتازييەۆ.
