جەرگىلىكتى ءىىد قىزمەتىنىڭ پوليسياسى قوعامدىق كولىك جۇرگىزۋشىسىن ۇرعان جەڭىل كولىك يەسىن ۇستادى دەپ جازادى Qamshy.kz اقپارات اگەنتتىگى. 

«اتالمىش وقيعا كۇندىز الماتىداعى المالى ايماعىندا ورىن العان. بۇل جاعدايدىڭ بولعاندىعى تۋرالى الەۋمەتتىك جەلىلەردەن بەلگىلى بولدى. ويتكەنى پوليسياعا بۇل جاعداي جونىندە ەشكىم دە حابارلاسپاعان.

ناتيجەسىندە ىزدەستىرۋ ءبولىمىنىڭ قىزمەتكەرلەرى جەڭىل كولىكتىڭ جۇرگىزۋشىسى 1985 جىلى تۋعان ءابدىنازاروۆ ە.، دەگەن ازاماتتى ۇستاپ، جاۋاپكەرشىلىككە تارتتى. ونىڭ كورسەتكەن مىنەز-قۇلقىندا ءبىر ەمەس بىرنەشە زاڭ بۇزۋشىلىقتار بايقالعان.

وسىعان وراي، وعان قاتىستى ق ر اقبتك  601 بابى بويىنشا، جول بەلگىلەرى مەن تاڭبالاردى ەلەمەگەنى ءۇشىن، قوعامدىق كولىككە ارنالعان جولاقتا دۇرىس قوزعالماعانى ءۇشىن، ق ر اقبتك 606 بابى بويىنشا اپاتتىق جاعداي ورناتقانى ءۇشىن  جانە ق ر اقبتك  612 بابىنىڭ 2 تارماعى بويىنشا كولىكتى قۇجاتسىز جۇرگىزگەنى ءۇشىن ايىپتالدى. بەلگىلى بولعانداي، ءابدىنازاروۆ مىرزا 2017 جىلدىڭ مامىر ايىندا كولىك جۇرگىزۋ كۋالىگىنەن 9 ايعا ايىرىلعان»، دەپ مالىمدەدى الماتى ءىىد رەسمي وكىلى، پوليسيا پودپولكوۆنيگى سالتانات ازىربەك.

جەرگىلىكتى پوليسيا قىزمەتى ءابدىنازاروۆتىڭ بۇزاقىلىق جاساعانىن دالەلدەيتىن ماتەريالدار جيناعان.

سالتانات ازىربەكتىڭ ايتۋىنشا، بۇزاقى جاساعان ەرەجە بۇزۋشىلىقتارى ءۇشىن 10 اەك نەمەسە 10 تاۋلىك باس بوستاندىعىنان ايىرىلۋ جازاسى كەسىلۋى مۇمكىن.