الماتىدا ق ر ۇلتتىق بانكى وكىلدەرى قارجى ساراپشىلارىمەن كەزدەستى دەپ حابارلايدى Qamshy.kz اقپارات اگەنتتىگى ق ر ۇلتتىق بانك باسپا ءسوز قىزمەتىنە سىلتەمە جاساپ.

كەزدەسۋ بارىسىندا اقشا-كرەديت ساياساتى، اقشا جانە ۆاليۋتا نارىعىنداعى جاعداي، سونداي-اق قارجى رەتتەۋشىسىنىڭ بازالىق مولشەرلەمە دەڭگەيىن 9،75%-دان 9،5%-عا دەيىن تومەندەتۋ ماسەلەلەرى تالقىلاندى.

ۇلتتىق بانكتىڭ زەرتتەۋلەر جانە ستاتيستيكا دەپارتامەنتىنىڭ ديرەكتورى ۆيتاليي تۋتۋشكين قاتىسۋشىلارعا جىلدىق ينفلياسيانىڭ 2018 جىلعا ارنالعان نىسانالى ءدالىز ىشىندە باياۋلاۋى جالعاساتىنىن ايتتى. ول ينفلياسيانىڭ 2018 جىلدىڭ اقپان ايىنان 6،5% بولعانىن اتاپ ءوتتى.

«باعانىڭ مۇنداي سەرپىنى سىرتقى ينفلياسيا جانە ىشكى نارىقتاعى جيىنتىق ۇسىنىستىڭ وسۋىنە نەگىزدەلدى. ساۋدا ارىپتەس ەلدەردەگى ينفلياسيانىڭ تومەن دەڭگەيى يمپورتتىق
تاۋارلار باعالارىنىڭ تومەندەۋىنە ىقپال ەتۋدە. بۇدان باسقا، حالىقتىڭ ناقتى اقشالاي تابىستارىنىڭ تەرىس سەرپىنى ساقتالعان كەزدە ىشكى تۇتىنۋدىڭ قالپىنا كەلۋى باياۋ
قارقىنمەن ءجۇرىپ جاتىر»، - دەپ ءتۇسىندىردى ۆ. تۋتۋشكين.

ۇلتتىق بانكتىڭ باعالاۋىنشا، 2018 جىلدىڭ 4-توقسانىندا ينفلياسيا 5%-دان از (نىسانالى ءدالىزدىڭ تومەنگى شەگىنەن تومەن) بولۋى مۇمكىن.

«وتكەن جىلى تاۋارلار باعاسى بۇرىنعىعا قاراعاندا تەزىرەك ءوستى دەپ ەسەپتەيتىن
رەسپوندەنتتەردىڭ ۇلەسى جىل باسىنان بەرى 52،1%-دان 47%-عا دەيىن تومەندەدى، بۇل حالىقتىڭ ينفلياسيانى قابىلداۋىنىڭ جالعاسىپ كەلە جاتقان جاقسارۋىن كۋالاندىرادى»، - دەدى ۆ. تۋتۋشكين جانە اعىمداعى جىلى ەكونوميكالىق بەلسەندىلىك سەنىمدى ءوسۋىن
جالعاستىراتىنىن اتاپ ءوتتى.

ءسوزىن قورىتىندىلاي كەلە قارجى رەتتەۋشىسىنىڭ وكىلى ينفلياسيانىڭ باياۋلاۋى جانە ەكونوميكانىڭ ورنىقتى ءوسۋ باعىتىنا بىرتىندەپ شىعۋ اياسىندا اقشا-كرەديت تالاپتارى
بەيتاراپتىققا ۇمتىلۋىن جالعاستىراتىنىن اتاپ كەتتى. «بازالىق مولشەرلەمەنى ودان ءارى
تومەندەتۋ جونىندەگى ساياسات ينفلياسيانىڭ بولاشاق دەڭگەيىنىڭ ورتا مەرزىمدى نىسانالى دالىزگە سايكەستىگىن جانە 2018 جىلى ينفلياسيانىڭ بارىنشا تەز تومەندەۋ تاۋەكەلدەرىنە،
ولاردىڭ شەكتەۋلى جانە قىسقا مەرزىمدى سيپاتىنا قاراماستان 2020 جىلعا قاراي 4%-دىق ماقساتقا جەتۋىن قامتاماسىز ەتەدى».

ءوز كەزەگىندە، قرۇب مونەتارلىق وپەراسيالار دەپارتامەنتىنىڭ ديرەكتورى ءاليا
مولدابەكوۆا ەلدىڭ ۆاليۋتا جانە اقشا نارىقتارىنداعى احۋالعا تۇسىنىكتەمە بەردى.

«ىشكى ۆاليۋتا نارىعىنداعى احۋال شەتەل ۆاليۋتاسى سۇرانىسى مەن ۇسىنىسىنىڭ تەڭگەرىمدىلىگىمەن سيپاتتالادى. سىرتقى ىرگەلى فاكتورلاردىڭ سەرپىنى جەتكىلىكتى تۇردە جاعىمدى. اقشا نارىعىندا تەڭگە وتىمدىلىگىنىڭ قۇرىلىمدىق ءپروفيسيتى ساقتالۋدا».

تانىستىرىلىمنان كەيىن ۇلتتىق بانك وكىلدەرى وسىنداي كەزدەسۋلەردى وتكىزۋدىڭ
ماڭىزدىلىعىن اتاپ وتكەن ساراپشىلاردىڭ سۇراقتارىنا جاۋاپ بەردى.
قازاقستان ۇلتتىق بانكىنىڭ ساراپشىلارمەن كەزدەسۋدى تۇراقتى نەگىزدە قارجى
رەتتەۋشىسىنىڭ نارىقپەن جانە قوعامداستىقپەن بەلسەندى كوممۋنيكاسيالارى ساياساتىنىڭ شەڭبەرىندە وتكىزەتىنىن ەسكە سالامىز.