Uber كومپانياسى اقش-تىڭ بارلىق قالاسىندا جۇرگىزۋشىسىز باسقارىلاتىن كولىك سىناۋدى ۋاقىتشا توقتاتتى دەپ جازادى Qamshy.kz اقپارات اگەنتتىگى ازاتتىقتىڭ دەرەگىنە سۇيەنىپ. بۇعان ناۋرىزدىڭ 19-ى كۇنى اريزونا شتاتىنىڭ تەمپە قالاسىندا جۇرگىزۋشىسىز باسقارىلاتىن كولىكتىڭ جولدان ءوتىپ بارا جاتقان ايەلدى قاعىپ كەتكەنى سەبەپ بولىپ وتىر.

پوليسيانىڭ مالىمەتىنشە، اۆتوپيلوت رەجيمىندە كەتىپ بارا جاتقان كولىك كوشەدە جاياۋ جۇرگىنشى وتۋگە بولمايتىن جەردە كەتىپ بارا جاتقان 49 جاستاعى ايەلدى قاعىپ وتكەن. ايەل جارالانىپ، اۋرۋحاناعا جەتكىزىلگەن سوڭ قايتىس بولعان.

كومپانيا باسشىسى دارا حوسروۋشاحي قايعىلى وقيعاعا قاتتى قايعىراتىنىن مالىمدەدى. كومپانيا شتات بيلىگىمەن قايعىلى وقيعانى تەكسەرىپ جاتىر.

كولىك قۇراستىراتىن كومپانيالار، ونىڭ ىشىندە Ford پەن General Motors جۇرگىزۋشىسىز باسقارىلاتىن كولىكتەر جاساۋعا كوپ قارجى قۇيىپ وتىر. وسىعان دەيىن دە وزگە كومپانيالار جاساپ شىعارعان جۇرگىزۋشىسىز باسقارىلاتىن كولىكتەر اپاتقا ۇشىراعان. مىسالى، 2016 جىلى Google كورپوراسياسى سىناعان كولىك اۆتوبۋستى سوعىپ وتكەن. ءبىراق ول كەزدە ەشكىم زارداپ شەكپەگەن.