2017 جىلدىڭ قورىتىندىسى بويىنشا اقتوبە وبلىسىندا ورتاشا جالاقى 7،3%-كە ءوسىپ، 126،1 مىڭ تەڭگەنى قۇرادى. ناقتى جالاقىنىڭ ءوسۋ قارقىنى بويىنشا ايماق قازاقستاننىڭ وڭىرلەرى اراسىندا جەتەكشى ورىنعا يە بولدى، دەپ حابارلايدى Qamshy.kz اقپارات اگەنتتىگى اقتوبە وبلىسى اكىمىنىڭ باسپا ءسوز قىزمەتىنە سىلتەمە جاساپ.

بۇل تۋرالى وبلىس اكىمى بەردىبەك ساپاربايەۆتىڭ توراعالىعىمەن وتكەن جيىندا اقتوبە وبلىسى ەڭبەك ينسپەكسياسىنىڭ باسشىسى ميربولات رايمقۇلوۆ مالىمدەدى.

جيىن بارىسىندا بىرنەشە ماسەلەلەر قارالدى. سولاردىڭ ءبىرى - اقتوبە كاسىپورىندارىنىڭ ءوندىرىس پروسەستەرىن تۇراقتاندىرۋ جانە جۇمىسشىلاردىڭ ەڭبەك قۇقىقتارىن قامتاماسىز ەتۋ تۋرالى مەموراندۋمداردىڭ ورىندالۋى.

بىرنەشە جىل بويى جەرگىلىكتى بيلىك ورگاندارى وڭىردەگى بارلىق ءىرى جانە ورتا كاسىپورىندارمەن وسىنداي مەموراندۋمدار جاساستى. ارنايى قۇرىلعان جۇمىس توبى ولاردىڭ ورىندالۋىن قاداعالايدى. وتكەن جىلى قابىلدانعان شارالار ناتيجەسىندە 53 ءىرى كاسىپورىندار مەن سەرۆيستىك كومپانيالاردا جالاقى 7% -دان 20% -عا دەيىن كوتەرىلىپ، كاسىپورىنداردا مەملەكەتتىك مەرەكەلەر كەزىندە سىياقىلار تولەپ وتىردى.

اعىمداعى جىلدىڭ قاڭتار ايىنان باستاپ وبلىستا 4771 مەموراندۋمعا قول قويىلدى، 500-گە جۋىق كاسىپورىندار جالاقىنى كوتەرۋ تۋرالى مىندەتتەمە الدى.

وبلىس اكىمى مەموراندۋمداردىڭ ورىندالۋ ماسەلەسىن تۇراقتى باقىلاۋدا ۇستاۋ تۋرالى تاپسىردى.

- وبلىستىڭ كاسىپورىندارىندا كەلىسىمدەردىڭ ساقتالۋىنا بايلانىستى تۇراقتى جاعداي ساقتالۋدا، قىزمەتكەرلەرگە تولەنەتىن جالاقى جانە الەۋمەتتىك تولەمدەر ۋاقتىلى تولەنەدى. ەڭبەكاقى مولشەرىن ارتتىرۋ بويىنشا اسىرەسە ءوندىرىس قىزمەتكەرلەرىنىڭ ەڭبەگىنە سونداي-اق ەڭ تومەنگى جالاقى الاتىندارعا اقى تولەۋ جۇمىسى جالعاسۋى كەرەك»، - دەپ اتاپ ءوتتى بەردىبەك ساپاربايەۆ.