بۇگىن استانادا قازاقستان رەسپۋبليكاسى مەن موڭعوليا اراسىندا سوتتالعانداردى بەرۋ تۋرالى شارتقا قول قويۋ ءراسىمى ءوتتى، دەپ حابارلايدى Qamshy.kz اقپارات اگەنتتىگى ق ر باس پروكۋراتۋراسىنىڭ باسپا ءسوز قىزمەتىنە سىلتەمە جاساپ.

شارتقا باس پروكۋرور قايرات قوجامجاروۆ پەن قازاقستان رەسپۋبليكاسىنداعى موڭعوليانىڭ توتەنشە جانە ۋاكىلەتتى ەلشىسى لۋۆسانگيين باتتۋلگا قول قويدى.

حالىقارالىق قۇجات ەكى ەلدىڭ ازاماتتارىنا شەتەلدە قىلمىس  جاساپ،  باس بوستاندىعىنان ايىرىلعان جاعدايدا جازانى ءوز ەلىندە وتەۋگە مۇمكىندىك بەرەدى. بۇل ءوز كەزەگىندە سوتتالعان قازاقستان جانە موڭعول ازاماتىنا قوعامعا تەز بەيىمدەلۋگە كومەكتەسەدى.

وسىعان ۇقساس حالىقارالىق كەلىسىمدەر قازاقستان رەسپۋبليكاسى كونستيتۋسياسىنىڭ 11-بابىنىڭ تالاپتارىنا سايكەس جاسالادى جانە ءوز ازاماتتارىنا ەل ىشىندە، سونىمەن قاتار شەت ەلدەردە قامقورلىق جاسايتىنا  كەپىلدىك بەرەدى.  

اتاپ وتەتىن جايت، قازاقستان قىلمىس جاساعانداردى بەرۋ، قىلمىستىق جاۋاپكەرشiلiككە تارتۋ نەمەسە ۇكiمدi ورىنداۋ ءۇشىن، سونداي-اق قىلمىستىق ىستەر، ازاماتتىق-قۇقىقتىق قاتىناستار جانە قۇقىقتىق كومەك بويىنشا موڭعوليامەن شارت جاساسقان.

ناتيجەسىندە موڭعوليا قازاقستان ءۇشىن ەكى ەل ازاماتتارىنىڭ قۇقىقتارى مەن مۇددەلەرىن قورعاۋ، قىلمىسپەن كۇرەس، زاڭدىلىق پەن قۇقىقتىق ءتارتىپتى قامتاماسىز ەتۋ سالاسىندا ءتيىمدى قارىم-قاتىناس جاساۋعا قاجەتتى بارلىق حالىقارالىق-قۇقىقتىق قورى قۇرىلعان كەزەكتى ەلدىڭ ءبىرى بولدى.