كحدر مەن وڭتۇستىك كورەيا بىر-بىرىنە قارسى قۇرلىقتا، تەڭىزدە جانە اۋەدە قاقتىعىسۋعا سەبەپ بولاتىن جاۋلاستىقتى جويادى. بۇل تۋرالى ەكى ەل باسشىلارى قاتىسقان سامميت قورىتىندىسى بويىنشا بىرىگىپ جازىلعان دەكلاراسيادا ايتىلعان. قۇجاتتا كورسەتىلگەندەي، وڭتۇستىك پەن سولتۇستىك كورەي تۇبەگىندەگى اسكەري قىسىمدى تۇسىرۋگە جانە سوعىس ءقاۋپىن تومەندەتۋگە بىرىگىپ ارەكەت ەتەدى.

وتكەن جۇمادا كيم چەن ىن دەماركاسيالىق اۋماق ارقىلى وڭتۇستىك كورەياعا اياق باسقان كحدر-دىڭ العاشقى باسشىسى بولدى. دەميليتاريزاسيالىق اۋماقتا ول وڭتۇستىك كورەيا باسشىسى مۋن چجە ينمەن كەزدەستى. ەكى ەلدىڭ باسشىلارىنىڭ كەزدەسۋى الەم ءۇشىن ۇلكەن تاريحي وقيعا بولدى.

كحدر مەن كورەيا رەسپۋبليكاسى اراسىنداعى گەوگرافيالىق سىزىق 1948 جىلى ەكى ەلدى ءبولىپ تۇراتىن شەكاراعا اينالدى. سول جىلداردان بەرى مەملەكەتتەر بىر-بىرىنە جاۋ سانالىپ ءارى ءبىرىنىڭ تۇرعىنى ەكىنشىسىنىڭ شەكاراسىنان اسىپ وتە الماعان.

ەندىگى ەكى ەل اراسىنداعى ءقاۋىپتى ءارى ەرەكشە شەكارا جايلى قىزىقتى دەرەكتەردى نازارلارىڭىزعا ۇسىنامىز.

1.قارۋسىزداندىرۋ ايماعىندا الەمدەگى ەڭ ءقاۋىپتى گولف الاڭى بار. گولف دوپتارىنىڭ سونداعى مينالى ايماقتارعا قاراي ۇشىپ كەتۋى ابدەن مۇمكىن.

گولف الاڭى بۇۇ-نىڭ بازالىق كۇشتەرى شوعىرلانعان ايماقتا ورنالاسقان. نەبارى ءۇش قۋىسى بار گولف الاڭىنىڭ جان-جاعى مينالارمەن قورشالعان.

2.ادامدارى سيرەك قارۋسىزداندىرۋ ايماعى جابايى تابيعات ءۇشىن قولايلى. وندا جابايى اڭدار مەن سيرەك كەزدەسەتىن قۇستار ءومىر سۇرەدى.  

قارۋسىزداندىرۋ ايماعىنىڭ ۇزىندىعى 148 شاقىرىم، ەنى 4 شاقىرىمعا دەيىن سوزىلىپ جاتىر. ول ايماققا وتۋگە قاتاڭ تىيىم سالىنعان. سونىڭ ارقاسىندا اڭدار مەن قۇستاردىڭ ەركىن شوعىرلانۋىنا ەشكىم بوگەت كەلتىرمەيدى.

وندا سيرەك كەزدەسەتىن جاپون تىرنالاردى، گيمالاي ايۋلارى مەن بۇعىلارىن جانە جولبارىستاردى كەزدەستىرۋگە بولادى. الايدا مينالى ايماق بولعاندىقتان اڭداردىڭ دا ومىرىنە ءقاۋىپ ءتونىپ تۇر. ال ءولىپ جاتقان اڭداردىڭ سانىن ەشكىم انىقتامايدى.

3.قارۋسىزداندىرۋ ايماعىندا ديۆەرسيا مەن كونتراباندانى جەتكىزۋ ءۇشىن توننەل قازىلعان.

سولتۇستىك كورەيالىقتار ءىرى توننەلدەردى سوعىس بولا قالعان ۋاقىتتا وڭتۇستىك كورەياعا جىلدام شىعۋ ماقساتىندا قازعان. توننەلدىڭ ءبىرى سەۋلگە 32 شاقىرىم جەتپەي اياقتالادى. الايدا پحەنيان تاراپى توننەلدەردىڭ سوعىس ماقساتىندا سالىنعانىن جاسىرىپ وتىر. كونتراباندالىق ماقسات تا بايقالمايدى. قازىرگى ۋاقىتتا ونداعى توننەلدەر تۋريستەرگە ارنالعان كورنەكى جەرگە جانە ەكى ەل اراسىنداعى قاقتىعىستىڭ سيمۆولىنا اينالدى.

4.وڭتسۇتىك كورەيا دەميليتاريزاسيالىق ايماققا شوعىرلانعان فەرمەرلەردى سالىقتان بوساتادى.

قارۋسىزداندىرۋ ايماعىنىڭ وڭتۇستىك كورەياعا قاراعان تۇسىندا كۇرىش وسىرەتىن فەرمالار بار. وندا ورنالاسۋ ءۇشىن تالاپ تا جوعارى. كورەيا سوعىسىنا دەيىن بۇل ايماقتاردا فەرمەرلەردىڭ جاقىن تۋىستارى تۇرعان بولۋى كەرەك.

ايماقتى بۇۇ باسقارعاندىقتان تۇرعىندار سالىق تولەمەيدى، ال جاستاردى اسكەرگە شاقىرمايدى.