ۇلى جەڭىس مەرەكەسىنىڭ 73 جىلدىعى قارساڭىندا وتىرار اۋدانىنىڭ اكىمى ايتاحانوۆ ەرلان قۋانىش ۇلى ۇلى وتان سوعىسى ارداگەرلەرى سەيداحان داۋرەنبەكوۆ، نەسىپباي ناحىپوۆ پەن تۇرعانباي ءسابيتوۆتىڭ جانە  حاديشا بەكقۇلييەۆا اجەنىڭ شاڭىراقتارىنا بارىپ، تاريحي مەرەكەمەن قۇتتىقتادى.

تەك مەرەكە كەزىندە عانا ەمەس، ۇرپاق بالاسىنىڭ جارقىن بولاشاعى ءۇشىن جانقيارلىقپەن ەرلىك كورسەتىپ، جاستىق ءومىرىن مايدان دالاسىنىڭ ءومىر مەن ءولىم اراسىنداعى ارپالىسىنا ارناپ،  پاتريوتتىق سەزىمنىڭ جارقىن ۇلگىسىن كورسەتكەن ارداقتى جانداردىڭ جاعدايى مەن تىنىس-تىرشىلىگىنەن حابار الىپ، وتباسىلارىنا ءجيى باس سۇعىپ وتىراتىن اۋدان باسشىسىنا قاريالار دا شەكسىز العىسىن ءبىلدىرىپ، اق باتالارىن بەرىپ جاتتى.

زۇلمات شاقتا وتىرار اۋدانىنان 4000-نان اسا ازامات ۇرىس الاڭىنا اتتانسا، قازىرگى تاڭدا، ءۇش ۇلى وتان سوعىسى ارداگەرى مەن ءتورت ءجۇز جيىرما جەتى تىل ەڭبەككەرى بار.

"ەرلىك پەن قايسارلىقتىڭ، وجەتتىكتىڭ ارقاسىندا قاسىق قانى قالعانشا   جاۋىمەن ايقاسىپ، بولاشاعىنا كوز تىككەن تەرىس پيعىلدان ەل ەرتەڭىن ازات ەتۋ جولىندا پاتريوتتىق رۋحىنىڭ اسقاقتىعىن كورسەتكەن قارۋلاس دوستاردىڭ ءارقايسىسىنىڭ بەينەسى كوز الدىمدا. اق قار، كوك مۇزدا تۋعان جەر توپىراعىنا جەتە الماي كوز جۇمعانى دا قانشاما. ءبىز كورگەن سوعىستى ۇرپاعىمىز كورمەسىن. ەلىمىزدىڭ بەيبىت ءومىرى ماڭگىلىك بولسىن! بوزداقتاردىڭ ەرلىگىمەن كەلگەن باقىتتى ءومىردىڭ ءقادىرىن ۇعىنىپ، اماناتىنا ادال بولۋ ءاربىر ازاماتتىڭ باستى مىندەتى"-دەپ، 96 جاستاعى ناحىپوۆ نەسىپباي قاريا سوعىس جىلدارىن ەسكە الدى.

ەل ارداقتىلارىنا وبلىس اكىمى تۇيمەبايەۆ جانسەيىت  قانسەيىت ۇلىنىڭ دا ىزگى تىلەگى مەن سىي-سياپاتىن تابىس ەتكەن اۋدان اكىمى ارداگەرلەردىڭ يىعىنا زەرلى شاپان، اسىل انا باسىنا اق ورامال جاۋىپ، بۇگىنگىدەي بەيبىت كۇننىڭ جولىندا زۇلىم جاۋمەن جان اياماي شايقاسىپ، تىلدا دا كۇنى-تۇنى تىنباي ەڭبەك ەتكەن ابزال جاندارعا پەرزەنتتەرىمەن بىرگە باقىتتى دا باياندى عۇمىر سۇرۋلەرىنە تىلەكتەستىك ءبىلدىردى.

سونىمەن قاتار، وتىرار اۋدانىندا ايتۋلى مەرەكەلەرگە وراي اۋىل شارۋاشىلىعى مەن جەرگىلىكتى تاۋار وندىرۋشىلەرى ونىمدەرىنىڭ جارمەڭكەسى ۇيىمداستىرىلدى.

مەرەكەلىك جارمەڭكەدە كاسىپكەرلەر مەن ديحاندار تۇرعىنداردىڭ كۇندەلىكتى تۇرمىسىنا قاجەتتى ازىق-تۇلىك جانە اۋىل شارۋاشىلىعى ونىمدەرىن نارىقتاعى باعادان 10-15 پايىزعا تومەن باعادا ۇسىندى. تاڭەرتەڭنەن باستالعان يگى شارادا قۇس ەتى مەن جۇمىرتقا، بالىق ونىمدەرىمەن قاتار،  كارتوپ، قىزاناق، ەت-سۇت، قىمىران ونىمدەرىنە سۇرانىس ارتتى.

وتىرار اۋدانىندا ازىق-تۇلىك ونىمدەرىنىڭ جارمەڭكەسىن تۇراقتى تۇردە وتكىزۋ داستۇرگە اينالعان. ايتۋلى باستاماعا حالىقتىڭ دا ايتار العىسى مول.

سونداي-اق، وتىرارلىقتار 7 مامىر - وتان قورعاۋشىلار جانە 9 مامىر-ۇلى جەڭىس كۇنى مەرەكەلەرىنە ەرەكشە دايىندىق ۇستىندە. جالپى اۋداندىق دەڭگەيدە ۇيىمداستىرىلاتىن شارادا كوپتەگەن تاربيەلىك-تانىمدىق باعىتتى ايقىنداپ، ءاربىر جانعا ەرەكشە وي سالارلىق جاڭاشا باعدارلامالار كەڭ كولەمدە دايىندالۋدا.