ەلوردا اكىمى اسەت يسەكەشيەۆ «جاننۇر» ءسۇ الاڭىندا ورناتىلعان باتۋتتا ويناپ، زارداپ شەككەن بالالاردىڭ حال-جاعدايىن ءبىلۋ ماقساتىمەن قالالىق №2 بالالار اۋرۋحاناسىنا باردى.

بالالاردىڭ اتا-انالارىمەن اڭگىمەلەسۋ بارىسىندا اسەت يسەكەشيەۆ قالا بيلىگى، ءىىد مەن ءتجد-نىڭ وقيعانى ءوز باقىلاۋىنا العاندىعىن العا تارتتى.

ول، سونداي-اق، كىنالىلەردىڭ جازاعا تارتىلاتىندىعىن ايتتى.

ەستەرىڭىزگە سالايىق، وقىس وقيعا كەشە، 4 مامىردا ساۋدا ءۇيى ماڭىندا ورىن الدى. ۇستىندە بالالار ويناپ جاتقان باتۋت جەلمەن ۇشىپ كەتكەن بولاتىن. 5 بالا شۇعىل تۇردە اۋرۋحاناعا جەتكىزىلدى.

استانا قالاسى اكىمدىگىنىڭ سۇراۋى بويىنشا بالالاردى ۇزدىك ماماندار («نەيروحيرۋرگيا عىلىمي ورتالىعى» اق ءتوراعاسى سەرىك اقشۇلاقوۆ پەن تراۆموتولوگيا جانە ورتوپەديا عزي -نىڭ ديرەكتورى نۇرلان باتپەنوۆ)، سونداي-اق، انا مەن بالا ۇلتتىق عىلىمي ورتالىعىنىڭ دارىگەرلەرى كۇتۋدە.

ەلوردا پوليسەيلەرى ق ر قك 306 بابىنىڭ 2 تارماعىنا (قاۋىپسىزدىك تالاپتارىنا ساي كەلمەيتىن قىزمەت كورسەتۋ) سايكەس سوتقا دەيىنگى تەرگەۋدى باستاپ كەتتى.

ايتا كەتەيىك، 2018 جىلدىڭ 3 مامىرىندا توتەنشە جاعدايلار دەپارتامەنتى جەلدىڭ كۇشەيەتىندىگى تۋرالى حابارلاندىرۋدى تاراتقان بولاتىن.

باتۋت ورناتىلعان الاڭ جوعارىدا اتالعان ساۋدا ۇيىنە تيەسىلى.

ەلوردا اكىمدىگى قالانىڭ ساۋدا جانە ويىن-ساۋىق ورتالىقتارىنىڭ الاڭىنا اتتراكسيونداردى ورناتۋعا رۇقساتتامالاردى بەرمەيدى.

كاسىپكەرلىك سۋبەكتىلەرى شارۋاشىلىقتى جۇرگىزەتىن ەكى سۋبەكتىنىڭ اراسىنداعى جالعا الۋ جونىندەگى كەلىسىم-شارتتىڭ نەگىزىندە عانا باتۋتتاردى سوسو جانە ساۋدا ورتالىقتارىنىڭ الاڭدارىندا ورنالاستىرادى.

بۇل تۇستا زاڭدى تۇلعا، ياعني ساۋدا ورتالىعى يەسىنىڭ جارعىسىمەن نىسان جانىنداعى الاڭدى جالعا بەرۋ تەتىگى دە قاراستىرىلۋى قاجەت.

ەسكە سالساق، قازىرگى تاڭدا بيزنەس قىزمەتىنە ارالاسۋ شەكتەلىپ وتىر. دەگەنمەن، كاسىپكەرلىك سۋبەكتىلەرى (سوسو، قوعامدىق تاماقتانۋ ورىندارى جانە ت.ب) كەلۋشىلەردىڭ ىڭعايلىلىعى ءۇشىن ولاردى قاۋىپسىزدىكپەن قامتاماسىز ەتۋگە بارىنشا نازار اۋدارۋى ءتيىس.

قالا اكىمدىگى اتا-انالاردى قىراعىلىق تانىتىپ، قۇتقارۋشىلاردىڭ تاراتقان حابارلاماسىن نازارعا الۋعا، قاتتى جەل كەزىندە بالالاردىڭ دالاعا شىعۋىنا جول بەرمەۋگە شاقىرادى.