بۇگىن،  شىمكەنت قالاسىنداعى "تۇركىستان" سارايىندا قازاقستانعا العاش رەت كەلگەن امەريكا قۇراما شتاتتارىنىڭ  «دەيتون» زاماناۋي بي تەاترى جانە قازاقستاندىق «قازىنا» بي ءانسامبلىنىڭ بىرلەسكەن كونسەرتى ءوتتى.

شارا بارىسىندا شەتەلدىك بي ۇجىمىنا وبلىستىق مادەنيەت جانە تىلدەردى دامىتۋ باسقارماسىنىڭ مادەنيەت جانە ونەر ءبولىمىنىڭ باسشىسى شارافييەۆا عاليا اليكەن قىزى وڭتۇستىك قازاقستان وبلىسىنىڭ اكىمى تۇيمەبايەۆ جانسەيىت قانسەيىت ۇلىنىڭ ارنايى قۇتتىقتاۋى مەن سىي-سياپاتىن تابىس ەتتى. 

"بي تەاترى - كوپ ءناسىلدى امەريكا حالىقتارىنىڭ ەجەلگى بي ونەرىنىڭ ءداستۇرى مەن ورنەگىن ساقتاپ، ءوزىنىڭ رۋحاني قازىناسىمەن ۇشتاستىرا وتىرىپ، حالىقتىڭ تىنىس-تىرشىلىگىن، ادامنىڭ تابيعاتقا كوزقاراسىن، دۇنيەتانىمىن ايشىقتايتىن ونەر رەتىندە زاماناۋي باعىتتا وركەندەپ، دامۋدا.

سىزدەردىڭ مۋزىكا ىرعاعىن تەرەڭنەن سەزىنەتىن  كاسىبي شەبەرلىكتەرىڭىزدى تابيعاتتان بەرىلگەن ەرەكشە سىي دەپ بىلەمىز. ۇسىنعان بي قويىلىمدارىڭىزداعى دجاز، ەتنوگرافيالىق بي قيمىلدارى زاماناۋي مودەرن ەلەمەنتتەرىمەن اسەرلەنىپ، شىعارماشىل ترۋپپانىڭ شەبەرلىگىن پاش ەتتى.

بۇگىنگى بي كەشى – «بارلىق ءبيدى» بىرىكتىرۋگە قىزمەت ەتەتىن ەرەكشە مەرەكە. بۇل ونەر ءتۇرى ءار ءتۇرلى ۇلت وكىلدەرىنىڭ باسىن قوسىپ، ىنتىماقتاستىق پەن بەيبىتشىلىككە باۋلىپ، ەكى ەل اراسىنداعى مادەني  قارىم-قاتىناستى ودان ءارى نىعايتا تۇسەدى دەگەن سەنىمدەمىن"-دەپ، قۇتتىقتاۋ حاتتا وبلىس باسشىسى ىزگى نيەتىن بىلدىرگەن.
بىرلەسكەن جوبا كورەرمەنگە ەرەكشە اسەر قالدىردى.

«دەيتون» زاماناۋي بي تەاترى (Dayton Contemporary Dance Company – DCDC) شىعارماشىلىقتارىنىڭ ءتۇپ-تامىرى افروامەريكالىق مادەنيەتتەن باستاۋ الادى. 

«دەيتون» زاماناۋي بي تەاترىنىڭ نەگىزىن -  دەيتون قالاسىنىڭ وگايو شتاتىندا 1968 جىلى ءبيشى، وقىتۋشى، حورەوگراف، مارك-ارتۋر ستەپەندياسىنىڭ لاۋرەاتى دجەرالدينا بلاندەن قالاعان. بىرەگەي امەريكالىق بي تەاترى الەمگە تانىمال.

تەاتردىڭ كوركەمدىك جەتەكشىسى دەببي بلاندەن-ديگگس.

ولار عاجايىپ بي نومىرلەرىن قويۋ ارقىلى الەم بويىنشا ءىسساپار بارىسىندا تەاتر ونەرىنىڭ جەرگىلىكتى ءبىلىم بەرۋ مەكەمەلەرىندە شەبەرلىك ساباقتارىن وتكىزىپ كەلەدى.

«قازىنا» بي ءانسامبلى 1989 جىلى قۇرىلعان. ءانسابلدىڭ ۇيىمداستىرۋشىسى جانە كوركەمدىك جەتەكشىسى ق ر مادەنيەت قايراتكەرى - مۇسابەك جارقىنبەكوۆ. 2003 جىلدان بەرى ق ر مادەنيەت قايراتكەرى، پەداگوگيكا عىلىمدارىنىڭ كانديداتى زاۋرە اجيبەكوۆا جەتەكشىلىك جاساپ كەلەدى. ءانسامبلدىڭ قورجىنىندا 70-كە جۋىق فولكلورلىق جانە زاماناۋي جانردا، تمد ەلدەرى جانە الەم حالىقتارىنىڭ بيلەرى بار.

ايتا كەتسەك، «دەيتون» زاماناۋي بي تەاترى جانە قازاقستاندىق «قازىنا» بي ءانسامبلىنىڭ بىرلەسۋىمەن وڭىرىمىزدەگى بي ۇجىمدارىنىڭ جەتەكشىلەرى مەن مۇشەلەرىنە 13 مامىر كۇنى، ساعات 13:00-15:00 ارالىعىندا "Exclusive" بي ستۋدياسىندا شەبەرلىك ساباقتارى جۇرگىزىلەدى.