سەمەيدە №28 مەكتەپتىڭ وقۋشىلارى سپورت جانە اكت زالى مەن مۇعالىمدەر بولمەسىندە وقىپ جاتىر، دەپ حابارلايدى قازاقپارات.

ءقازىر شاتىرى تەسىك مەكتەپكە جوندەۋ جۇمىستارى جۇرگىزىلۋدە. ۇزاق جىل جوندەۋ كورمەگەن ءبىلىم وشاعى بيىل جوندەلەتىن مەكتەپتەر تىزىمىنە ەنگەن. تەندەر جاريالانىپ، جەڭىمپاز انىقتالعاننان كەيىن مەردىگەر مەكەمە جۇمىستى باستاپ كەتكەن. سوندىقتان ەكى اۋسىمدا ءبىلىم الاتىن مىڭعا جۋىق وقۋشى سپورت جانە اكت زالى مەن مۇعالىمدەر بولمەسىندە وقۋعا ءماجبۇر. مەكتەپتىڭ شاتىرى ەسكىرگەن. جاڭبىر جاۋسا توبەسى تەسىك مەكتەپتىڭ ءىشى سۋعا تولادى. سوندىقتان كەلەر وقۋ جىلىنا دەيىن جۇمىستى اياقتاۋ ءۇشىن مەردىگەر جوندەۋدى ەرتە باستاعان كورىنەدى. الايدا اتا-انالار بالالارى ءۇشىن الاڭداۋلى.

«مەن وقۋشىلار ءۇشىن ۋايىمدايمىن. مەكتەپتىڭ توبەسى وتە جۇقا. ال جوعارى سىنىپ وقۋشىلارى ءقازىر سپورتزالدا ءبىلىم الۋدا. ال باستاۋىش سىنىپ وقۋشىلارى دالىزدە وقۋدا. ەڭ ۇلكەن ءقاۋىپ - بۇل شاتىردىڭ توبەسىنەن قۇلاپ جاتقان كىرپىش پەن تاستار. وقۋ جىلىنىڭ سوڭىن توسپاي جوندەۋدى باستاپ كەتكەندەرىنە نارازىمىز»،- دەيدى اتا-انالاردىڭ ءبىرى ۆالەنتين پيمونوۆ.

اتا-انالاردىڭ سوزىنشە، مەكتەپتەگى سوڭعى قوڭىراۋ دا جوندەۋ جۇمىستارىنا بايلانىستى مەرزىمىنەن بۇرىن وتپەك.