قاسيەتتى رامازان ايىندا الماتىداعى قوعامدىق كولىكتەر ءۇش ماگيسترال بويىنشا جانە ۆوكزال باعىتىندا ساعات 00:00-گە دەيىن جۇرەتىن بولادى، دەپ حابارلايدى Qamshy.kz اقپارات اگەنتتىگى قمدب-عا سىلتەمە بەرىپ.

17 مامىردان باستالاتىن قاسيەتتى رامازان ايىندا قالاداعى بارلىق 49 مەشىتتە تاراۋيح نامازى وقىلادى، ال 45 مەشىتتە قۇران حاتىم شىعارىلادى.

«تاراۋيح نامازىنىڭ تۇنگى 12-گە دەيىن سوزىلۋىنا بايلانىستى اكىمشىلىكتىڭ ىقپال ەتۋىمەن 16 مامىر مەن 14 ماۋسىم ارالىعىندا اۆتوبۋستاردىڭ كەستەسى  وزگەرتىلدى. ساين كوشەسى مەن دوستىق داڭعىلى، الماتى-1 ۆوكزالى مەن تالعار تاس جولىنا دەيىنگى 4 باعىتتاعى اۆتوبۋستار ساعات 00:00-گە دەيىن جۇرەتىن بولادى. سونىمەن قاتار ءار مەشىتتە جاماعاتتىڭ ءبىلىمىن جەتىلدىرۋ ماقساتىندا زياتكەرلىك سايىستار وتەدى. ال ورتالىق مەشىتتە ەكىنتى مەن بەسىن نامازى ارالىعىندا «ۋمرا كىشى قاجىلىعى كىمگە بۇيىرادى؟» اتتى بايقاۋ ۇيىمداستىرىلادى»، - دەدى قمدب الماتىداعى وكىلى ەركىنبەك شوقايەۆ.

رامازان ايىندا بارلىق مەشىتتەردە قاۋىپسىزدىك كۇشەيتىلەدى.