بۇگىندە قازاقستان الدىندا اۋىل شارۋاشىلىعى سالاسىن دامىتۋ بويىنشا اۋقىمدى مىندەتتەرگە وراي FAO-مەن ۇسىنىلاتىن تەحنيكالىق جانە كەڭەستىك قولداۋ، اقپاراتتىق رەسۋرستاردى قولدانۋ مۇمكىندىگى ۇلكەن ماڭىزعا يە. 

بىرىككەن ۇلتتار ۇيىمىنىڭ ازىق-تۇلىك جانە اۋىلشارۋاشىلىق ۇيىمى (فاو) وڭىرلىك كونفەرەنسياسىنىڭ 31ء-شى سەسسياسى بولىپ ءوتتى. اتالعان ءىس-شارا بارىسىندا فاو باس ديرەكتورى جوزە گراسيانو دە سيلۆا مەن قازاقستان رەسپۋبليكاسىنىڭ اۋىل شارۋاشىلىعى ۆيسە-مينيسترى گ.يسايەۆا كەزدەستى، دەپ حابارلايدى Qamshy.kz اقپارات اگەنتتىگى. 

تاراپتار قازاقستانداعى ەتتى مال شارۋاشىلىعىن دامىتۋ باعدارلاماسىن تالقىلادى.

فاو-نىڭ باس ديرەكتورى اۋىل شارۋاشىلىعى مينيسترلىگىنىڭ اتالعان ماقساتتاعى پوزيسياسىن قولدادى جانە وسى ماقساتتارعا قول جەتكىزۋ ءۇشىن قازاقستاننىڭ اگرارلىق عىلىمى مەن ءبىلىمىن دامىتۋ قاجەت دەپ اتاپ ءوتتى.

قازاقستان مەن فاو اراسىنداعى ىنتىماقتاستىق كەڭەيۋدە جانە جاڭا دەڭگەيگە كوتەرىلۋدە. مىسالى، فاو قازاقستانداعى بىرنەشە جوبالاردى ىسكە اسىرادى، ولار: ورگانيكالىق اۋىل شارۋاشىلىعىن دامىتۋ، جايىلىمداردى باسقارۋ، شەگىرتكەمەن كۇرەس، تۇراقتى دامۋ ماقساتتارىن ۇلتتاندىرۋ، ازىق-تۇلىك تىزبەكتەرىنىڭ دامۋىن قولداۋ جانە ەكسپورت، سيفرلاندىرۋ جانە اقپاراتتىق-كوممۋنيكاسيالىق تەحنولوگيالاردى ەنگىزۋ.

 2015 جىلدىڭ سوڭىندا ءوندىرىستى دامىتۋعا جاعداي جاسايتىن جانە ورگانيكالىق ونىمدەردىڭ ەكسپورتىن ۇلعايتاتىن «ورگانيكالىق ونىمدەردى ءوندىرۋ تۋرالى» زاڭ قابىلداندى. جۇڭگو مەن ەۋروپالىق ەلدەر ءقازىردىڭ وزىندە قازاقستاندىق ورگانيكالىق ونىمدەرگە قىزىعۋشىلىق تانىتۋدا.

فاو ۇسىناتىن اقپاراتتىق رەسۋرستاردى پايدالانۋ، تەحنيكالىق جانە كونسۋلتاسيالىق قولداۋ، قازاقستاننىڭ اگروونەركاسىپ كەشەنى سالاسىن دامىتۋدا وتە ماڭىزدى ورىن الادى.
قازىرگى ۋاقىتتا قازاقستان مەن فاو اراسىنداعى سەرىكتەستىك باعدارلاماسى ازىرلەنۋدە.

ايتا كەتەيىك، بىرىككەن ۇلتتار ۇيىمىنىڭ ازىق-تۇلىك جانە اۋىلشارۋاشىلىق ۇيىمى (فاو) بۇۇ جۇيەسىنىڭ مۇشەسى بولىپ تابىلادى جانە حالىقارالىق ازىق-تۇلىك قاۋىپسىزدىگى مەن اۋىل شارۋاشىلىعىن دامىتۋ ماسەلەلەرىمەن اينالىسادى. فاو تاماقتانۋ، ازىق-تۇلىك جانە اۋىل شارۋاشىلىعى تۋرالى اقپاراتتى جينايدى، تالدايدى، تۇسىندىرەدى جانە تاراتادى. ۇيىمنىڭ فۋنكسياسىنا مۇشە ەلدەرگە تەحنيكالىق كومەك كورسەتۋ كىرەدى. قازىرگى ۋاقىتتا فاو-نىڭ قۇرامىنا 197 مەملەكەت كىرەدى.

ەسكە سالا كەتەتىن بولساق، قازاقستاندا بۇۇ-نىڭ ازىق-تۇلىك جانە اۋىل شارۋاشىلىعى ۇيىمىنىڭ (FAO) ءوفيسى 2 جىل بۇرىن، 2016 جىلى ساۋىردە اشىلعان بولاتىن.