م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ مۋزەيىنىڭ قۇرىلعان كۇنى. سونداي-اق، تەاتر مۋزەيىنە مەرەيلى 50 جىل تولىپ وتىر. بۇل اتاۋلى كۇنگە وراي م.اۋەزوۆ تەاترىنىڭ ۇجىمى «تەاتر مۋزەيىنىڭ ءتۋنى» شاراسىن ۇيىمداستىردى.
تەاتر مۋزەيى جارتى عاسىر ۋاقىت ىشىندە ءوزىنىڭ جادىگەرلەرىن تولىقتىرۋدان بولەك، حالىقتى تەاتردىڭ وتكەنىمەن تانىستىراتىن، اياۋلى دا ارداقتى اكتەرلەردىڭ ءومىرناماسىنىڭ ەل بىلە بەرمەيتىن بەتتەرىن جيناقتاپ، كورەرمەنگە جەتكىزەتىن ايرىقشا بەدەلگە يە بولا ءبىلدى.
شارا بارىسىندا تەاترىمىزدىڭ اكتەرلارى قويىلىمنان ۇزىندىلەر كەلتىرىپ، ونەرلەرىن كورسەتىپ، تەاتر مۋزەيى ءتۇنىن تاماشالاۋعا كەلگەن كورەرمەندەردى تامساندىرىپ، شارانىڭ كوركىن اشا ءتۇستى. قازاقستاننىڭ ەڭبەك سىڭىرگەن قايراتكەرى، تەاترىمىزدىڭ ديرەكتورى اسحات ماەميروۆ پەن «مۋزەي» ءبولىمىنىڭ جەتەكشىسى نارگيز تامابەك قىزىنىڭ العى سوزىنەن كەيىن كورمەنى كورەرمەدەرگە تانىستىرۋ باستالدى. مۋزەي كورمەسىنىڭ ەكىنشى بولىمىنە الپىسىنشى جىلداردان جوعارى، تاۋەلسىزدىككە دەيىنگى كەزەڭدى ارقاۋ ەتكەن دۇنيەلەر قويىلعان. بۇل جادىگەرلەر مەن تاريحي سۋرەتتەردى ابىز اكتەر كسرو حالىق ءارتيسى ءاسانالى ءاشىموۆ ءوزى باستاپ تانىستىرىپ، ودان كەيىن قازاقستاننىڭ حالىق ارتيستەرى ءسابيت ورازبايەۆ، ەسمۇحان وبايەۆ جانە تاعى باسقا تەاتردىڭ اعا بۋىن وكىلدەرى جالعاستىردى.
- بۇل تەاتر مۋزەي ءتۇنىن وتكىزۋ تۋرالى وي بىزگە، ەۋروپا كەڭىستىگىندە كوپ بولامىن. ول جاقتا مۋزەي تۇندەرىن وتكىزۋ جاقسى ۇيىمداستىرىلادى. كورولدىك شەكسپير تەاترىندا، ماسكەۋدەگى م.ەرمولوۆا تەاترلارىندا وسىنداي مادەنيەت بار. ەۋروپا تەاترلارىندا 200 جىل بۇرىنعى كوستيۋمدەر ساقتالعان. «اساۋعا - تۇساۋ» قويىلىمىندا اتاقتى شاكەن ايمانوۆ پەن حاديشا بوكەيەۆانىڭ قاتىسۋىمەن شەتەلدەرگە ايگىلى بولعان ەلىمىزدىڭ ۇلتتىق ساحناگەرلەرى. تەاتر ونەرىندە مىناداي ۇعىم بار. ايگىلى ادامداردىڭ ساحناداعى كوستيۋمدەرىنىڭ ءارقايسىسىندا كيە بار دەگەن. سول كيىمدەگى كيە، ونەرلەرى دارىسا ەكەن دەپ، ءبىز جاس اكتەرلارلىمىزعا جۇعىستى بولسىن دەپ كيگىزىپ جاتامىز. مىسالى، تەاترىمىزدىڭ اكتريساسى گۇلنۇر شىڭعىسوۆانىڭ كيىپ تۇرعان كوستيۋمى اتاقتى كسرو حالىق ءارتيسى فاريدا شاريپوۆانىڭ رولدەرىنىڭ ىشىندەگى شوقتىعى بيىك «قارا قىپشاق قوبلاندى» دراماسىنداعى «قارلىعا» ءرولىن سومداعاندا كيگەن كوستيۋمى. ولاردىڭ تۇتىنعان رەكۆيزيت زاتتارى، سۋرەتتەرى، ءتىپتى داپتەر، كۇندەلىكتەرىنە دەيىن بارلىعى ساقتاۋلى تۇر. ارحيۆتىك ماتەريالداردى ساقتاۋعا ارنالعان ارنايى بولمە بار. سوندىقتاندا ءبىز ماقتانا الامىز. قازاقستاندا بىردەن ءبىر ەرەكشە مۋزەي بار ول – م.اۋەزوۆ تەاترىنىڭ مۋزەيى دەپ. ەندى بولاشاقتا ءوزىمىزدىڭ تەاتر مۋزەيى بولىپ قۇرىلىپ جاتسا، نۇر ۇستىنە نۇر بولادى، - دەيدى تەاترىمىزدىڭ ديرەكتورى قازاقستاننىڭ ەڭبەك سىڭىرگەن قايراتكەرى اسحات ماەميروۆ.
جادىگەرلەردى ساقتاۋ ءۇشىن تەاتردا ارنايى مۋزەي ماماندارى قىزمەت ەتەدى. ولار جىل سايىن گازەت قيىندىلارىنا دەيىن بىرنەشە جىلدىق بارلىق سۇقباتتاردى، ءبارىن ساقتايدى. مۋزەيدەگى بۇل كوستيۋمدەر قازىرگى قويىلىمدارعا قولدانىلمايدى ەكەن. ەلىمىزدىڭ تاريحىن، قازاق تەاترىن اشقان ابىزدارىمىز، تەاترىمىزدىڭ العاشقى قارلىعاشتارى وسىنداي كوستيۋمدا بولعانىن جاس بۋىنعا كورسەتىپ، كورنەكىلىك قۇرالدارىمەن دە، دارىپتەي بىلگەندى ءجون سانايدى.
بۇگىندە مۋزەي قورى قازاقستانداعى وزگە تەاترلاردان كوش ىلگەرى، مۇنداعى زاتتاردىڭ سان الۋاندىعى، تاريحي قۇنى اسا جوعارى باعالى دۇنيەلەردىڭ مولدىعى كوڭىلگە مەدەۋ. سول جىلدارى قاپان بادىروۆ، نۇرمۇحان ءجانتورين، ءسابيرا مايقانوۆا، شاكەن ايمانوۆ، حاديشا بوكەيەۆا، شولپان جانداربەكوۆا، ءاسانالى ءاشىموۆ، ەسمۇقان وبايەۆ، اۋباكىر راحيموۆ باستاعان اعا-اپالارىمىز بار كۇشىن سالىپ، جادىگەرلەردىڭ جيناقتالۋىنا، كوبەيۋىنە، ولاردىڭ حرونولوگيالىق تارتىپپەن رەتتەلۋىنە زور ۇلەس قوسقان.
تەاتر ديرەكتورى اسحات ماەميروۆ تەاتر مۋزەيىنە جادىگەرلەرلەردى جيناقتاپ، كوزىنىڭ قاراشىعىنداي ساقتاپ مۋزەي جۇمىسىنا ۇلەسىن قوسقانى ءۇشىن زەينەش مولدابايقىزىنا تەاتر ۇجىمىنىڭ اتىنان قۇتتىقتاپ، العىس حات تابىس ەتتى.
سونداي-اق م.اۋەزوۆ تەاترىندا ءومىرىنىڭ سوڭىنا دەيىن، شيرەك عاسىرداي قىزمەت ەتىپ، ۇلكەندى-كىشىلى قىرىقتان اسا رولدەردى سومداعان، ءوز كاسىبىنە ادال، دارىندى اكتريسا راۋشان اۋەزبايەۆانىڭ قىزى بۇل شاراعا ارنايى كەلىپ، ۇجىمدى بۇگىنگى تەاتر مۋزەيىنىڭ كۇنىمەن قۇتتىقتاپ، تەاتر ديرەكتورى اسحات ماكسيمۇلىنا ەستەلىك سىيلىق تابىس ەتتى.
شارا سوڭىندا تەاتر مۋزەيىنىڭ 50 جىلدىعىنا ارنايى شاقىرىلعان قۇرمەتتى قوناقتار وزدەرىنىڭ ەستەلىك قولتاڭبا جازبالارىن قالدىرىپ، سۋرەتكە ءتۇستى.
