الماتى قالاسى تىلدەردى دامىتۋ باسقارماسى «رۋحاني جاڭعىرۋ» باعدارلاماسى اياسىندا ءۇش ءتىلدى قاتار مەڭگەرگەن مەملەكەتتىك قىزمەتشىلەر اراسىندا «ءتىل شەبەرى» قالالىق بايقاۋىن وتكىزدى.

بايقاۋدىڭ ماقساتى جاس ماماندارعا قولداۋ كورسەتە وتىرىپ، ءتىل مادەنيەتىن كوتەرۋگە ىقپال ەتۋ، مەملەكەتتىك قىزمەتشىلەردىڭ ءتىلدى مەڭگەرۋگە دەگەن قىزىعۋشىلىعىن ارتتىرۋ جانە باسەكەگە قابىلەتتى تۇلعا تاربيەلەۋ بولىپ تابىلادى.

جالپى تالاپتارعا سايكەس بايقاۋعا قازاق، ورىس جانە اعىلشىن تىلدەرىن جەتىك مەڭگەرگەن 21-29 جاس ارالىعىنداعى جيىرمادان استام مەملەكەتتىك قىزمەتشىلەر قاتىستى. الماتى قالاسى تىلدەردى دامىتۋ باسقارماسى تىلدەردى دامىتۋ جانە ۇيلەستىرۋ ءبولىمىنىڭ باسشىسى ب.قالىمبەت، اباي اتىنداعى قازۇپۋ شەتەل تىلدەرى كافەدراسىنىڭ وقىتۋشىسى گ.سەيدالييەۆا، حالىقارالىق بيزنەس ۋنيۆەرسيتەتىنىڭ دوسەنتى م.قويشىبايەۆا، ج.ەلەبەكوۆ اتىنداعى رەسپۋبليكالىق ەسترادا-سيرك كوللەدجى ەسترادالىق اسپاپ ءبولىمىنىڭ مەڭگەرۋشىسى ە.ابىشيەۆ بايقاۋدىڭ قازىلار القاسىنىڭ قۇرامىندا تالاپكەرلەردىڭ بىلىكتىلىگىن باعالاپ، ءادىل باعاسىن بەرۋگە اتسالىستى.

الماتى قالاسىنىڭ التى اۋدانىنان جينالعان ۇمىتكەرلەر ءتورت كەزەڭ بويىنشا بايقاۋ مەجەسىنەن وتۋلەرى شارت. ءار جاۋاپقا ءۇش مينۋت ۋاقىت بەرىلدى. ءبىرىنشى كەزەڭ - «ۇلتتانىم». مۇندا قاتىسۋشىلار جەرەبە بارىسىندا العان نومىرلەرىنە سايكەس قازاق ەلى تاريحى مەن ۇلى تۇلعالارى جونىندەگى سۇراقتارعا قازاق تىلىندە جاۋاپ بەردى. ەكىنشى، «مادەنيەتتانىم» بويىنشا قازاق حالقىنىڭ ءسالت-داستۇرى، ءدىلى مەن ءتىلى جونىندەگى سۇراقتارعا ورىس تىلىندە جاۋاپ تالاپ ەتىلدى. ال «ەلتانىمدا» قاتىسۋشىلار ەلىمىزدىڭ ايماقتارى جونىندەگى سۇراقتارعا اعىلشىن تىلىندە، ال «ونەرتانىمدا»  ءوز تاڭداۋى بويىنشا ءان ايتۋ، كوركەمسوز وقىپ، بي بيلەپ، ۇلتتىق كيىم كيۋدەن جانە ەركىن ءيىم ۇلگىسىنە قاتىستى ونەرلەرىن كورسەتتى.

وزىق شىققان جەڭىمپازدار قاتارىندا ا.بودانوۆا بايقاۋدىڭ باس جۇلدەسىنە يە بولسا، ءى ورىندى ج.احانوۆا، ءىى ورىندى ا.يبادۋللا، ءىىى ورىندى ج.ەسماعامبەتوۆا ەنشىلەدى. كەستەلى ءسوز اتالىمىندا ا.جىلقايداروۆ، كەلەلى وي اتالىمىندا ل.جاپبار جەڭىمپاز دەپ تانىلدى. ەرەكشە جاۋاپتارى مەن ونەرلەرى ءۇشىن ق.ساۋلان، ە.انۋاربەك ىنتالاندىرۋ سىيلىعىنا يە بولدى.

بايقاۋ بارىسىندا قاتىسۋشىلارعا الدىن الا ازىرلەنگەن اۋديو جانە بەينە ماتەريالداردى قولدانۋىنا مۇمكىندىك بەرىلدى.