وقو اكىمى جانسەيىت تۇيمەبايەۆ پەن شىمكەنت قالاسىنىڭ اكىمى نۇرلان ساۋرانبايەۆتىڭ قالا تۇرعىندارىنا ارنالعان ۇندەۋى جاريالاندى، دەپ حابارلايدى Qamshy.kz اقپارات اگەنتتىگى. 

"قۇرمەتتى شىمكەنت قالاسىنىڭ تۇرعىندارى! شىمكەنت قالاسى قازاقستاننىڭ ءۇشىنشى  مەگاپوليسى اتاندى. سىزدەردى وسىناۋ تاريحي ماڭىزدى وقيعامەن قۇتتىقتايمىز!جۋىردا مەملەكەت باسشىسى ءوز سوزىندە «قازاقستان اگلومەراسيانى دامىتۋ ستراتەگياسىن جۇزەگە اسىرۋدى باستادى. ەگەر بىزدە بۇعان دەيىن ميلليون تۇرعىنى بار تەك الماتى قالاسى بولسا، ءقازىر ءۇش مەگاپوليسىمىز بار – الماتى، استانا جانە شىمكەنت قالالارى"،-دەلىنگەن حابارلامادا.

"ميلليوندى قالا – بۇل ءاردايىم جاڭا يدەيالار، جوبالار مەن جوسپارلار، اۋقىمدى ينۆەستيسيالار. بارلىعى قالانىڭ دامۋىنا جاڭا سەرپىن بەرەدى. شىمكەنت بۇل مارتەبەلى دەڭگەيگە عاسىرلار بويى جەتتى. ءبىزدى الدا ۇلكەن وزگەرىستەر كۇتىپ تۇر. ەڭ باستىسى - بۇل جاڭالىق شىمكەنت قالاسىن ودان ءارى دامىتۋعا جاڭا مۇمكىندىكتەر تۋعىزىپ، ءاربىر قالالىقتىڭ ومىرىنە جاڭا سەرپىن بەرەدى، وڭ اسەرىن تيگىزەدى دەپ سەنەمىز. بۇل – سونىمەن قاتار، ءبىز ءۇشىن اسقان جاۋاپكەرشىلىك"، - دەپ جازىلعان ۇندەۋدە.

سونىمەن قاتار، حابارلامادا اكىمدەر شىمكەنتتىڭ كەلەشەكتە ۇلگىلى قالاعا اينالارىنا سەنىم بىلدىرگەن.

"مەملەكەت باسشىسى مۇنداي قالالار تۇرعىندار ءۇشىن قولايلى، ءقاۋىپسىز، تۇرعىن ۇي-كوممۋنالدى شارۋاشىلىعى جاڭارتىلعان جانە مادەنيەتى جوعارى بولۋى ءتيىس دەپ كورسەتتى.شىمكەنت سونداي قالاعا اينالادى دەپ سەنەمىز. سەبەبى ءبىزدىڭ قالامىزدا قوناقجاي، قايىرىمدى، ەڭ باستىسى، ەڭبەكقور حالىق تۇرادى. ءبىز ءبارىمىز بىرگە شىمكەنتتى ەلباسى كۇتكەندەي «اقىلدى»، «جاسىل» ءارى ءقاۋىپسىز قالاعا اينالدىرامىز دەپ سەنەمىز. شىمكەنت جاڭا يدەيالار حالقىمىزدىڭ داستۇرىمەن قاتار دامىپ، وتكەنىن ۇمىتپايتىن، سونىمەن قوسا جاڭا تەحنولوگيالارعا ۇمتىلاتىن تۇرعىندار قالاسىنا اينالادى. شىمكەنت قالاسىنىڭ بارلىق تۇرعىنىن وسىناۋ تاريحي ساتپەن قۇتتىقتايمىز! بارشاڭىزعا باقىت پەن مولشىلىق تىلەيمىز!". - دەپ ايتىلعان ۇندەۋدە.