استانا قالاسى اكىمدىگى «1000 ساۋدا ورنى» باعدارلاماسىن ىسكە قوسقان بولاتىن. ەندى وسى باعدارلامانىڭ تاجىريبەسىن وسكەمەن اكىمدىگى دە قولدانىپ كورۋدى جوسپارلاپ وتىر. بۇل تۋرالى قالا اكىمدىگىنىڭ باسپا ءسوز قىزمەتى ءمالىم ەتتى.

ءقازىر قالادا زاڭسىز كوشە ساۋداسىمەن اينالىسىپ تۇرعان دۇڭگىرشەكتەر مەن پاۆيلوندار الىنىپ تاستالۋدا.

-وسكەمەندىك كاسىپكەرلەرگە 20 پاۆيلون ۇسىنىلادى. ال وندا ساۋدا جۇرگىزۋ قۇقىعىن اۋكسيون ارقىلى ۇتىپ الۋعا بولادى، — دەپ حابارلايدى باسپا ءسوز قىزمەتى.

اتالمىش باعدارلامانىڭ تيىمدىلىگى نەدە؟ ول — شاعىن بيزنەسكە دەمەۋ رەتىندە ۇسىنىلعان باعدارلاما. كوشەدەگى ساۋدانى ۇيىمداستىرۋ ءۇشىن ورىن تاپشىلىعىنا قاتىستى ماسەلەنى شەشۋ ماقساتىندا پايدا بولعان دەسە دە بولادى.

وسى باعدارلامانىڭ اياسىندا كاسىپكەرلەرگە كوشەدەگى ساۋدا ءۇشىن 1000 ورىن ۇسىنىلىپ، وعان بولىنگەن جەر ۋچاسكەسى بىردەن 7 جىلعا جالعا بەرىلەدى ەكەن. سونداي-اق، بۇل ورىندار ناقتى جەرلەردە بەلگىلەنەدى جانە ساۋدا قىزمەتىنىڭ ءتۇرى، ورىندار سانى مەن نىساننىڭ مەكەنجايى كورسەتىلەدى. وسى ورايدا ەسكەرىلگەن تاعى ءبىر ماڭىزدى ماسەلەلەردىڭ ءبىرى — بارلىق ساۋدا نۇكتەلەرى سانيتارلىق جانە ورتكە قارسى تالاپتارعا ساي بولادى ءارى قالانىڭ كەلبەتىن دە بۇزبايدى.

ايتا كەتسەك، كوشە ساۋداسىنىڭ بەكىتىلگەن تۇرلەرىنە جىلجىمالى اسحانالار، كوفەحانالار، نان-توقاش، بالمۇزداق، گازەت، جەمىستەر مەن كوكونىستەر ساتۋعا ارنالعان ورىندار، كادەسىيلار مەن گۇل ساتۋ دۇڭگىرشەكتەرى جاتادى.