بۇگىن اقىن، نۇرسۇلتان نازاربايەۆقا پوەما ارناعان، پرەزيدەنتتىڭ قولىنان العىس حات العان ەرتاي سۇلتانبەكتىڭ قىتايدا ءىز-تۇسسىز جوعالىپ كەتۋىنە قاتىستى باسپا ءسوز ءماسليحاتى ءوتتى. وعان اقىننىڭ قارىنداسى نۇرگۇل سۇلتانبەك، اعاسى جەڭىسبەك سۇلتانبەك جانە بەلسەندى سەرىكجان ءبىلاش قىتىستى، دەپ حابارلايدى Qamshy.kz اقپارات اگەنتتىگى. 

ەرتاي سۇلتانبەكتىڭ جاقىندارى ونى 2018 جىلدىڭ 25 مامىردا جۇڭگو پوليسەيەرى ۇستاپ كەتتى دەگەن ويدا. سەبەبى ءدال سول كۇنى ەرتاي سۇلتانبەك ىنىسىنە Weسhat ارقىلى حات جولداعان. وندا ماسەلەنى ەلباسىعا جەتكىزۋىن سۇراپ، قۇجاتىنىڭ ءنومىرىن قوسا جىبەرگەن.

«دۇكەن اعا، مۇمكىندىك بولسا، ەلباسىنا جەتكىزىڭىز. جۇڭگو مەن قازاق ەلىنىڭ ۇلى دوستىعى تۇرعاندا مەنىڭ ەلباسىنان العىس حات العانىم كىنا ءما؟» دەپ جازىلعان حابارلامادا.

ءىنىسى قايتا حابارلاسقاندا تەلەفونى ءسوندىرىلۋ بولعان. سودان بەرى ونىڭ قايدا ەكەنى بەلگىسىز. 51 جاستاعى اقىننىڭ ايەلى مەن بالالارى تۋرالى دا ەشقانداي اقپارات جوق. قازاقستانعا كوشىپ كەلگەن، قازاقستاننىڭ ازاماتتىعىن العان جاقىندارى قىتايدا قالعان تۋىستارىنان ەرتاي سۇلتانبەك تۋرالى اقپارات سۇراعان، الايدا ەشقانداي مالىمەت بىلە الماعان. اعاسى مەن قارىنداسىنىڭ ايتۋىنشا، قىتايداعى جاقىندارى اقىن تۋرالى اقپارات بەرۋگە قورقىپ وتىر.

ەرتاي سۇلتانبەكتىڭ اعاسى مەن قارىنداسىنىڭ ويىنشا، ونى نازاربايەۆقا ارناپ پوەما جازعانى ءۇشىن ۇستاعان. «نۇر-اعانىڭ مونولوگى» پوەماسى 2008 جىلى 30 تامىزدا «ىلە» گازەتىندە قازاق جانە جۇڭگو تىلىندە جارىق كورگەن.

جەڭىسبەك سۇلتانبەك پەن نۇرگۇل سۇلتانبەك قازاقستان بيلىگىنەن اقىندى بوساتۋعا كومەك سۇرادى. 

اقىننىڭ تۋىستارىنىڭ ايتۋىنشا، ەرتاي سۇلتانبەك قازاقستان ازاماتتىعىن الماعان. 2001 جىلدان بەرى قازاقستانعا كەلىپ، كەتىپ جۇرگەن. 

بەلسەندى سەرىكجان ءبىلاشتىڭ ايتۋىنشا، جۇڭگو تۇرمەلەرىنىڭ 4 ءتۇرى بار. ءبىرىشىسى - "قايتا تاربيەلەۋ" ورتالىعى دەپ اتالادى. ەكىنشى ءتۇرى - "جابايى يمامدارى تاربيەلەۋ" ورتالىعى. ءۇشىنشىسى - كاسىبي بىلىكتى ارتتىرۋ ورتالىعى. ءتورتىنشىسى - "جىلى جۇرەك. مەيرىم. ماحاببات" ورتالىعى. اتى باسقا بولعانىمەن زاتى - تۇرمە. 

"ساياسي ۇيرەنۋ ورتالىعىنداعى ادامداردى جاقىندارىمەن كەزدەستىرمەيدى. قىتايدىڭ ساياسي ۇيرەنۋ ورتالىعىندا وتىرعان ازاماتتاردىڭ ايتۋىنشا، ول تۇرمەدەن دە بەتەر. ادام زات تاريحىنداعى سۇمدىق جەر. تۇرمەگە وتىرىپ شىققانداردىڭ ءوزى ساياسي ۇيرەنۋ ورتالىعى تۇرمەدەن اسىپ تۇسەتىنىن ايتتى"، - دەيدى سەرىكجان ءبىلاش. 

اسەم المۇحانبەت