اقتاۋداعى مۇگەدەك بالالارعا ارنالعان مەكتەپ-ينتەرناتىنىڭ ديرەكتورى ىدىس-اياق سىندىرىپ، داۋ شىعارعاننان سوڭ جۇمىسىنان بوساتىلدى، دەپ حابارلايدى Qamshy.kz اقپارات اگەنتتىگى.

بۇل تۋرالى ماڭعىستاۋ وبلىسى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باستىعى قۋانىش بەرىشبايەۆ مالىمدەدى.

بەرىشبايەۆتىڭ سوزىنشە، وقيعا 7 ماۋسىم كۇنى №3 ارنايى الەۋمەتتىك قىزمەت كورسەتۋ ورتالىعىندا بولعان. مەكەمە قىزمەتكەرلەرى مەن ديرەكتور اراسىنداعى قاقتىعىستىڭ ۆيدەوجازباسى Facebook-تە جاريالانعان.

«وقيعا بەيسەنبى كۇنى كەشكى ۋاقىتتا بولدى. مەن وسى ادامدارمەن جانە مەكەمە ديرەكتورىمەن كەزدەستىم. بولعان جاعداي بويىنشا كوميسسيا قۇرىلىپ، تولىق تەكسەرۋ ءجۇرىزىلدى. ديرەكتور شاتتىگۇل قاراكۇشىكوۆا 8 ماۋسىمدا قىزمەتىنەن بوساتىلدى. بۇل - ديرەكتور مەن 10 مەكەمە قىزمەتكەرلەرى اراسىنداعى ىشكى قاقتىعىس»، - دەپ اتاپ ءوتتى باسشى.

ونىڭ ايتۋىنشا ناقتى شەشىم كوميسسيانىڭ جۇمىسىنان كەيىن قابىلدانادى. «ونىڭ قىزمەتىنە قايتا ورالۋى كوميسسيانىڭ تەكسەرىسىنەن كەيىن بەلگىلى بولادى. مۇنىمەن قوسا ەڭبەك باسقارماسى ينتەرناتتى دا تەكسەرەدى. وسى ۋاقىتقا دەيىن ۇجىم ديرەكتوردىڭ اتىنا ارىز جازعان»، - دەدى بەرىشبايەۆ.

شاتتىگۇل قاراكۇشىكوۆا 2017 جىلدىڭ تامىز ايىنان بەرى پسيحونيەۆرولوگيالىق ۇي-ينتەرناتىن باسقارادى. «№3 ارنايى الەۋمەتتىك قىزمەت كورسەتۋ ورتالىعى» قمۋ پسيحونيەۆرولوگيالىق اۋرۋى بار 3 جاستان 18 جاسقا دەيىنگى مۇگەدەك بالالارعا تاۋلىك بويى تۇراقتى قىزمەت كورسەتىپ، ۋاقىتشا تۇرۋعا، ارنايى الەۋمەتتىك قىزمەتتەرگە ارنالعان.