قىرعىز رەسپۋبليكاسىنىڭ پرەزيدەنتى سوورانباي جەەنبەكوۆ شىۇ-عا مۇشە مەملەكەت باسشىلارىنىڭ كەڭەيتىلگەن وتىرىسىندا تەرروريزم مەن ەكسترەميزمدى ناسيحاتتاۋ ماسەلەسىنە الاڭدايتىنىن مالىمدەدى.

جەەنبەكوۆتىڭ ايتۋىنشا، شىۇ-عا مۇشە مەملەكەتتەردىڭ بەرىك ىنتىماقتاستىعى ساۋدا-ەكونوميكالىق سەرىكتەستىكتىڭ نىعايۋىنا سەپتىگىن تيگىزەدى. سول سەبەپتى ساۋدا مەن ينۆەستيسيا ءۇشىن ءتيىمدى جاعداي جاساۋ كەرەك. سونىمەن قاتار اۋىلشارۋاشىلىق سالاسىنا دە ەلەۋلى نازار اۋدارۋ كەرەك ەكەنىن ەسكەردى.

«ەكونوميكالىق جوبالاردىڭ ءتيىمدى جۇزەگە اسۋى ءۇشىن قىرعىز تاراپى شىۇ دامۋ بانكى مەن دامۋ قورىن قۇرۋعا نيەتتى. قىرعىزستان اۋماعىنداعى شىۇ بانكىن قۇرۋ ماسەلەسىن قوزعاپ، كەلىسىمگە كەلۋدى ۇسىنامىز»، - دەدى جەەنبەكوۆ.

قىرعىز رەسپۋبليكاسى ءۇشىن حالىقارالىق ءاۆتوموبيلدى تاسىمال ءۇشىن ءتيىمدى جاعداي جاساۋ ماسەلەسى دە باستى ورىندا. سول سەبەپتى «ترانسپورتقا قولجەتىمدىلىك پەن ترانسپورت بايلانىسىن جانداندىرۋ ءۇشىن ءاۆتوموبيلدى جولداردى دامىتۋ باعدارلاماسىن» قابىلداۋدى جەدەلتەتۋدى العا تارتىپ وتىر.

«مەملەكەتىمىز جۇڭگو – قىرعىزستان – وزبەكستان تەمىرجولى قۇرىلىسىنىڭ جوباسىن جۇزەگە اسىرۋدى كوزدەيدى. بۇل جوبانىڭ شىۇ مەملەكەتتەرىنىڭ ءترانزيتتى جانە ەكسپورتتىق الەۋەتىن دامىتۋدا ۇلەسى زور»، - دەدى قىرعىز باسشىسى.

ايتا كەتەيىك، قىتايدىڭ سينداو قالاسىندا شانحاي ىنتىماقتاستىق ۇيىمىنىڭ رەسمي جينالىسى باستالدى.

سينداو ءسامميتى سەگىزدىك فورماتتا العاش رەت ءوتىپ جاتىر. وتىرىسقا قازاقستان پرەزيدەنتى نۇرسۇلتان نازاربايەۆ، رەسەي پرەزيدەنتى ۆلاديمير پۋتين، قىرعىز پرەزيدەنتى سوورونباي جەەنبەكوۆ، پاكىستان پرەزيدەنتى مامنۋن حۋسەين، تاجىكستان پرەزيدەنتى ەمومالي راحمون، وزبەكستان پرەزيدەنتى شاۆكات ميرزيەيەۆ، ءۇندىستان پرەمەر-مينيسترى نارەندرا مودي، شىۇ-عى بايقاۋشى مارتەبەسى بار اۋعانستان پرەزيدەنتى اشراف عاني، بەلارۋس پرەزيدەنتى الەكساندر لۋكاشەنكو، يران پرەزيدەنتى حاسان روۋحاني جانە موڭعوليا پرەزيدەنتى حالتمااگيين باتتۋلا جانە ءبىرقاتار حالىقارالىق ۇيىمنىڭ باسشىلارى قاتىستى.

جيىن قورىتىندىسىنا سايكەس، شانحاي ىنتىماقتاستىق ۇيىمىنىڭ كەلەسى ءتوراعاسى قىرعىزستان بولدى. شي جين پيڭ قىرعىز رەسپۋبليكاسىنىڭ ۇيىمعا ءتوراعالىعىنا قولداۋ كورسەتەتىنىن مالىمدەدى.

كەڭەيتىلگەن قۇرامداعى وتىرىستان كەيىن ءسامميتتىڭ باستى قۇجاتى سينداو دەكلاراسياسى قابىلدانىپ، 20-دان استام قۇجاتقا قول قويىلماق. ونىڭ 17ء-سىن مەملەكەت باسشىلارى راسىمدەيدى.