الماتى قالاسىنىڭ اكىمى باۋىرجان بايبەك رەسەي فەدەراسياسىنىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكينمەن كەزدەستى، دەپ حابارلايدى Qamshy.kz اقپارات اگەنتتىگى. 

تاراپتار ساۋدا-ەكونوميكالىق، مادەني-گۋمانيتارلىق بايلانىستاردى نىعايتۋ ماسەلەلەرىن تالقىلادى.

رەسەي ءداستۇرلى تۇردە قازاقستاننىڭ نەگىزگى ەكونوميكالىق ارىپتەستەرىنىڭ ءبىرى سانالادى. الماتى مەن كورشى ەل اراسىنداعى تاۋار اينالىمى تۇراقتى دامۋدى كورسەتىپ كەلەدى. وتكەن جىلدىڭ وزىندە كورسەتكىش 22% -عا وسكەن. بۇگىنگى تاڭدا الماتى قالاسىنىڭ اكىمدىگى مەن ماسكەۋ، سانكت-پەتەربۋرگ جانە قازان قالالارىنىڭ مەرلەرى اراسىندا ءبىرقاتار باعىتتار بويىنشا ىنتىماقتاستىق تۋرالى كەلىسىم بار.

قالادا ساۋدا، قارجى، مەديسينا، يندۋستريا جانە ت.ب. سالالارىندا رەسەيلىك كاپيتالدىڭ قاتىسۋىمەن ەكى مىڭنان استام كاسىپورىن جۇمىس ىستەيدى. الاتاۋ اۋدانىنىڭ يندۋستريالدى اۋماعىندا «KMK Invest» رەسەيلىك زاۋىتىنىڭ كابەلدى جانە سىم ونىمدەرىن ءوندىرۋ بويىنشا قۇرىلىسى ءجۇرىپ جاتىر.

كەزدەسۋ بارىسىندا رەسەي ەلشىسى پرەزيدەنتتەر مەن ەكى ەل حالىقتارىنىڭ اراسىنداعى جىلى جانە سەنىمدى قارىم-قاتىناستىڭ ءاردايىم بولاتىندىعىنا توقتالدى.

«بۇگىنگى كۇنى ەاەو اياسىندا ءبىرقاتار بىرلەسكەن جوبالار جۇزەگە اسىرىلۋدا. سونىمەن بىرگە، ەكىجاقتى ءتۋريزمدى دامىتۋ مەن ءبىلىم بەرۋ باعدارلامالارىن كەڭەيتۋدىڭ ۇلكەن الەۋەتى بار. ورتالىق ازيا وڭىرىندەگى ەڭ ءىرى قالا رەتىندە الماتىدا ءتۇرلى حالىقارالىق فورۋمدار، كونفەرەنسيالار مەن فەستيۆالدار ۇيىمداستىرىلادى، وندا رەسەيدەن كەلگەن دەلەگاسيالار  قاتىسادى. بىرنەشە كۇن بۇرىن ۇقشۇ سىرتقى ىستەر مينيسترلەر ءسامميتى جانە ەۋرازيالىق مەديا فورۋم ءوتتى. وسىنىڭ ءبارى ءبىزدىڭ ەلدەرىمىز اراسىنداعى مادەني جانە ىسكەرلىك بايلانىستاردى ودان ءارى دامىتۋعا ىقپال ەتەدى »، - دەدى الەكسەي بوروداۆكين.