شىعىس قازاقستان وبلىسى كاتونقاراعاي اۋدانى اققاينار اۋىلىنىڭ جۇمىسشىلارى قۇبىر تارتۋ كەزىندە ادامنىڭ باس سۇيەگى مەن كونە زاتتاردى تاۋىپ الدى، دەپ حابارلايدى Qamshy.kz اقپارات اگەنتتىگى. 

جۇمىسشىلار جەر قازىپ، قۇبىر تارتىپ جاتقان كەزدە ەكسكوۆاتورعا ادامنىڭ باس سۇيەگى مەن كونە زاتتار ىلىككەن.

بۇل تۋرالى Facebook الەۋمەتتىك جەلىسىندە الكەي مارعۇلان اتىنداعى ارحەولوگيا ينستيتۋتىنىڭ عىلىمي قىزمەتكەرى عالىمجان قياسبەك جازدى. بەرەل اۋماعىندا قازبا جۇمىستارىمەن اينالىسىپ جۇرگەن عىلىمي قىزمەتكەر جاڭالىقتى ەستي سالا ءبىر توپ مامانمەن اققاينار اۋىلىنا جەتكەن. 

"بەرەل قورىمىندا قازبادامىز. بۇگىن اياقاستى تەلەفون قوڭىراۋى شىر ەتتى. كاتونقاراعاي اۋدانى اققاينار (چەرنوۆا) اۋىلىندا سۋ قۇبىرىن تارتىپ جاتقان ەكسكوۆاتورشى كۇرەگىنە كىسى سۇيەگى مەن تاعى ءبىر زاتتار ىلىگىپتى. بەس قارۋىمىزدى اسىنىپ 5 ادام، جوق 6 ادام زۋ ەتە قالدىق: ەلدوس قارييەۆ (شقمۋ)، سامات ساماشيەۆ (تاريحي-اسكەري مۋزەي. استانا)، سەرگەي ۆيكتور ۇلى (پەتەربور)، مەن جەنە شقمۋ-دىڭ ەكى ستۋدەنتى: سۇڭعات پەن تۇلەك. بارساق ادامنىڭ باس سۇيەگىنىڭ جاعارعى بولىگى مەن قولا قازاندى جانە تەمىر بۇيىمنىڭ سىنىقتارىن اق ماتاعا جيناپ قويىپتى. قولا قازان ساق-سكيف (ىسكۋس) كەزەڭىنە جاتاتىن، ادەيى ىزدەپ ءجۇرىپ، قازىپ ءجۇرىپ تابا سالاتىن دۇنيە ەمەس!)) وتە تاماشا ولجا! وسىنداي دۇنيەلەردىڭ عىلىمي ارحەولوگيالىق قازبالاردان ەمەس، كەزدەيسوق قازبالاردان تابىلا كەتەتىنى قالاي قىزىق!) "التىن شىققان جەردى بەلدەن قاز!" دەمەكشى كەزدەيسوق بۇزىلعان ەسكەرتكىش ورنىن جاقسىلاپ ارشىپ، تازالاپ قازبا جاسادىق. كىسى سۇيەگى جەر بەتىنەن 20-30 سم-دەي عانا تەرەڭدىكتە جاتقان بولىپ شىقتى! جەر بەتىندە ەشبىر ءۇيىندىنىڭ ءىزى دە قالماعان. سول ماڭايدا تۇرىپ جاتقان اۋىل ادامدارىنىڭ ايتۋىنشا ءقازىر قۇبىر سالىنىپ جاتقان كوشە ءدال جولدىڭ ءۇستى بولماي تۇرعان جىلدارى (20-30 جىل بۇرىن، ءتىپتى ودان دا ەرەتەرەكتە) ءۇيدىڭ ورنى بولعان، باۋ-باقشا بولعان جەر ەكەن. ءبىز قازۋ بارىسىندا راسىندا ساق ادامىنىڭ سۇيەكتەرىنىڭ ءبىرازى سول ەرتەرەكتە ورنىنان قوزعالىپ قوپارىلعان، جان-جاعى قۇرىلىس قالدىقتارى مەن مال سۇيەكتەرى سياقتى قوقىسقا تولى بولىپ شىقتى. وبا ۇستىندەگى ۇيىگى، ءتىپتى ءقابىر شۇڭقىرىنىڭ ءبىراز بولىگى سول تالاي جىلداردان بەرگى جەردى يگەرۋ كەزەڭدەرىندە قىرىپ الىنىپ جۇقارىپ كەتە بەرگەن سىڭايلى. قالعان ءقابىردى قازۋ بارىسىندا ءبىر ەمەس ەكى كىسىنى قاتارىنان باسىن باتىسقا قاراتىپ قويعانى انىقتالدى"، - دەلىنگەن حابارلامادا. 

ءسوزىن تۇيىندەي كەلە عالىمجان قياسبەك قازبا جۇمىستارى تولىق اياقتالماعانىن، جاقسى جاڭالىقتان ءۇمىتتى ەكەنىن جەتكىزدى.