ساناۋلى كۇندەردەن كەيىن ەلىمىزدە ۇلتتىق ءبىرىڭعاي تەستلەۋ باستالادى. بيىل ماقتارال اۋدانىندا 2807 وقۋشى اتالعان سىناقتان وتكەلى وتىر. وسىعان وراي ۇبت وتەتىن ورىندا دايىندىق جۇمىستارىن كۇشەيتىپ، ناۋقاندى ءساتتى ۇيىمداستىرۋ مىندەتى تۇر. ول ءۇشىن وقۋشىلار مەن اتا-انالارعا بارلىق جاعداي جاسالۋى ءتيىس. بۇگىن بۇل تۋرالى اۋدان اكىمى جامانتاي بەيسەنبايەۆ اپپارات جينالىسىندا ءمالىم ەتتى.

ۇلتتىق ءبىرىڭعاي تەستلەۋگە مەكتەپ ءبىتىرۋشى تۇلەكتەر ارنايى كولىكتەرمەن تاسىمالدانىپ، 2 مەزگىل تاماقپەن قامتاماسىز ەتىلەدى. سىناق وتكىزۋ ءۇشىن اۋدانداعى №119 مەكتەپتە 12 اۋديتوريا مەن قوسىمشا 2 اۋديتوريا دايىندالىپ، تۇگەلدەي جەلدەتكىشتەر ورناتىلعان. سونداي-اق، اۋىز سۋ، اجەتحانا ماسەلەسى شەشىلىپ، ەلەكتر جارىعىمەن قاماتاماسىز ەتۋ ءۇشىن قوسىمشا ترانسفورماتور دايىندالعان.

"ۇبت كۇنى 1500-دەن استام اتا-انا وقۋشىلارعا قولداۋ كورسەتۋ ءۇشىن كەلەدى. ولاردىڭ وتىراتىن ورىندارى مەن ءجۇرىس-تۇرىستارىن ۇيىمداستىرىپ، اۋىز سۋمەن، تاماقپەن قامتاماسىز ەتۋ  كەرەك. ول ءۇشىن مەديسينالىق جەدەل جاردەم مەن ءورت ءسوندىرۋشى كولىكتەردى ارنايى بەكىتىپ، كىرىپ-شىققان كولىكتەردى رەتتەۋ ءۇشىن ىشكى ىستەر باسقارماسىنىڭ قىزمەتكەرلەرىن جۇمىلدىرۋىمىز ءتيىس. ۇبت وتەتىن نىساننىڭ تازالىعى ساقتالىپ، اتا-انالار بالالارىن كورىپ وتىرۋ ءۇشىن LED ەكرانداردى ورناتۋىمىز قاجەت. سونداي-اق، ۇبت وتەتىن ورىندا زاڭسىز ساۋدانى رەتتەپ، ارنايى اسحانالاردىڭ قىزمەتىن ۇيىمداستىرعانىمىز ءجون" - دەدى جامانتاي قاناي ۇلى.

جيىن بارىسىندا ۇبت كۇنى 30 ۇيالى تەلەفون سيگنالىن انىقتايتىن جانە 2 مەتالل انىقتايتىن قۇرىلعىلار پايدالانىلاتىنى ايتىلدى. سونىمەن قاتار، وقۋشىلار مەن اتا-انالاردىڭ قاۋىپسىزدىگى ءۇشىن 22 بەينەباقىلاۋ كامەرالارى ىسكە قوسىلاتىن بولادى.

ايتا كەتەيىك، بىلتىر 2648 ماقتارالدىق تۇلەكتەر ۇبت-عا قاتىسىپ، اۋداننىڭ ورتاشا كورسەتكىشى 70،5 بالل بولعان. ال، بيىل 2807 وقۋشى ورتاشا 81،5 بال جينايدى دەگەن بولجام بار.