بۇگىن مەملەكەت باسشىسىنىڭ تاپسىرماسى بويىنشا ق ر پرەمەر-مينيسترى باقىتجان ساعىنتايەۆ اقمولا وبلىسىنا جۇمىس ساپارىمەن باردى، دەپ حابارلايدى Qamshy.kz اقپارات اگەنتتىگى. 

ۇكىمەت باسشىسى ساپار بارىسىندا ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى مەن «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى مىندەتتەردى ىسكە اسىرۋ جۇمىستارىمەن تانىسادى.

وڭىرگە بارعان باقىتجان ساعىنتايەۆ ەڭ الدىمەن «ەسىل اگرو» ج ش س ءسۇت-تاۋار فەرماسى مەن ەگىس القاپتارىن ارالادى. مۇندا ول اۋىل شارۋاشىلىعى ءوندىرىسىنىڭ تەحنولوگيالىق ەرەكشەلىكتەرىمەن جانە كاسىپورىندى ودان ءارى دامىتۋ كەلەشەگىمەن تانىستى.

باقىتجان ساعىنتايەۆ ءسۇت فەرماسىن ارالاۋ كەزىندە كاسىپورىننىڭ وندىرىستىك ۇدەرىستەرىمەن جانە دايىن ونىمدەر كورمەسىمەن تانىستى. ۇكىمەت باسشىسىنا وندىرىستىك قۋاتتىلىقتى 2 ەسەگە دەيىن ۇلعايتۋ جانە ساۋىن تابىنىن 2 400 باسقا دەيىن جەتكىزۋ جوسپارى تۋرالى اقپارات بەرىلدى.

بۇدان كەيىن باقىتجان ساعىنتايەۆ «ەسىل اگرو» ج ش س ەگىستىگىنە بارىپ، وندا اقمولا وبلىسىنىڭ اۋىل شارۋاشىلىعى باسقارماسىنىڭ باسشىسى مۇرات بالپاننىڭ ەگىن جاعدايى تۋرالى بايانداماسىن تىڭدادى.

ەسكە سالا كەتەيىك، باقىتجان ساعىنتايەۆ مەملەكەت باسشىسىنىڭ تاپسىرماسى بويىنشا قازاقستان وڭىرلەرىن جۇمىس ساپارىمەن ارالاپ ءجۇر. بۇعان دەيىن اتىراۋ، قاراعاندى، قوستاناي، قىزىلوردا، ماڭعىستاۋ جانە وڭتۇستىك قازاقستان وبلىستارىنا جۇمىس ساپارىمەن بارىپ قايتتى.