ماقتارال اۋدانىندا سالىق تۇسىمدەرى قاداعالاۋعا الىنىپ، «سيفرلى قازاقستان» باعدارلاماسىنىڭ جۇزەگە اسىرۋ ماقساتىندا نەگىزگى 4 باعىتقا باسىمدىق بەرىلەتىن بولادى. سونىمەن قاتار، ماقتا داقىلىن زيانكەستەردەن قورعاۋ، تازارتۋ ماقساتىندا كەشەندى ءىس-شارالار جۇزەگە اسىرىلماق. بۇدان بولەك، اۋدان كولەمىندە ءوندىرىلىپ، شەتەل مەن سولتۇستىك وبلىستارعا جونەلتىلىپ جاتقان باقشا ونىمدەرى ەسەپكە الىنباق. بۇگىن بۇل تۋرالى اپپاراتتىڭ كەڭەيتىلگەن وتىرىسىندا ماقتارال اۋدانىنىڭ اكىمى جامانتاي بەيسەنبايەۆ ءمالىم ەتتى.

كۇن تارتىبىندەگى ءبىرىنشى ماسەلە – اۋدان بيۋدجەتىنىڭ يگەرىلۋى مەن ينديكاتورلاردىڭ مەرزىمدى ورىندالۋ بارىسى بولدى.  بۇل تۋرالى اۋان اكىمىنىڭ ورىنباسارى  ب.تورەبەكوۆ بايانداما جاسادى. ونىڭ ايتۋىنشا،    2016-2020 جىلدارعا ارنالعان «دامۋ»  باعدارلاماسىندا 35 نىسانالى ينديكاتور جانە 73 تىكەلەي ناتيجە بويىنشا كورسەتكىشتەر جامان ەمەس. الايدا، 2018 جىلدىڭ 5 ايىندا 4 ينديكاتور جانە 2 تۇپكىلىكتى ناتيجە كورسەتكىشىندە كورسەتكىشتەر تومەن بولىپ وتىرعاندىعىن جەتكىزدى. ول ءۇشىن اۋداندىق دەربەس ءبولىم مەن اۋىلدىق وكرۋگ اكىمدىكتەرىنىڭ ەسەپشىلەرى اۋداندىق ەكونوميكا قارجى ءبولىمىنىڭ ماماندارىمەن بىرلەسە وتىرىپ جۇمىس ىستەپ، ورىن الىپ وتىرعان كەدەرگىلەردى تەزدەتىپ شەشۋ كەرەك. ماسەلەگە قانىققان اۋدان باسشىسى ءتيىستى ءبولىم باسشىلارىنا ناقتى تاپسىرمالار جۇكتەدى.

 «جوعارىدا اتالعان ينديكاتورلار مەن تىكەلەي ناتيجە كورسەتكىشىنىڭ الداعى 6 ايدىڭ قورىتىندىسى شىققانعا دەيىن ورىندالۋى ءتيىس. وسى رەتتە قالا، كەنت، اۋىلدىق وكرۋگ اكىمدەرى بيۋدجەتتىڭ يگەرىلۋى مەن ينديكاتورلاردىڭ ورىندالۋىن قامتاماسىز ەتۋى كەرەك. ول ءۇشىن از عانا ۋاقىت بەرىلەدى. سوندىقتان بارشاڭىزدى قارجى يگەرۋدە بارىنشا مۇقيات ءارى زاڭ اياسىندا جۇمىس ىستەۋگە شاقىرامىن» ، - دەدى جامانتاي قاناي ۇلى.

جيىن بارىسىندا يگىلىرمەي قالۋ ءقاۋپى بار دەلىنگەن قارجىلاردىڭ سەبەپ-سالدارى تالقىلانىپ، ءتيىستى سالا باسشىلارىنىڭ ۋاجدەرى تىڭدالدى. اتاپ ايتقاندا، وڭدەۋ ونەركاسىبىنىڭ كولەمى، وڭدەۋ ونەركاسىبى ءونىمىنىڭ ناقتى كولەم يندەكسى، حالىقتىڭ تۋعان كەزدەگى كۇتىلەتىن ءومىر ءسۇرۋ ۇزاقتىعى جانە كوشەلەردە جاسالعان قىلمىستاردىڭ ۇلەس سالماعى جونىندەگى ينديكاتورلارعا نەگىزگى باسىمدىق بەرىلدى. 

جيىندى قورىتقان اۋدان اكىمى وڭىردەگى تازالىق ماسەلەسىن دە  ۇدايى باقىلاۋدا ۇستاۋدى  ەسكەرتىپ، تاپسىرمالاردىڭ ۋاقىتىلى ءارى ورىندالۋىن قاداعالاۋدى تاپسىردى.