سەمەي ستانسياسىنان جالاڭاشكول ستانسياسىنا دەيىن الاكول جاعالاۋىنا جەتكىزەتىن قالارالىق پويىز كەستەسى ىسكە قوسىلىپ، جاڭا قالارالىق پويىز جولعا شىقتى.

پويىز سەمەي ستانسياسىنان 17 ساعات 45 مينۋتتا شىعىپ، جالاڭاشكولدە 8 ساعات 27 مينۋتتا بولادى. جولدا 14 ساعات 42 مينۋت جۇرەدى. كەرى قاراي جالاڭاشكولدەن سەمەيگە قاراي جولاۋشىلار جۇپ كۇندەرى شىعا الادى.

«پويىز جولاۋشىلاردى جالاڭاشكول ستانسياسىنا دەيىن جەتكىزەدى. ولار ءارى قاراي اۆتوكولىكپەن بارادى. ۇلكەن كىسىلەرگە بيلەت قۇنى 2862 تەڭگە تۇرادى. ءقازىردىڭ وزىندە 100 وتىراتىن ورىنعا بيلەت ساتىلدى»،-دەيدى «قالا ماڭى تاسىمالى» اق ساراپشىسى سەرىك دوڭبايەۆ.

قازىرگى تاڭدا «قالا ماڭى تاسىمالى» اق رەسپۋبليكامىزداعى 67 باعدارعا قىزمەت كورسەتەدى. ەندى شىعىس قازاقستانعا جاڭا باعدار اشىلدى.

تەمىرجولدا 26 جىلدان بەرى ەڭبەك ەتەتىن جولسەرىك زامزاگۇل مامانوۆا پويىزدا جولاۋشىلارعا قولايلى جاعداي جاسالعاندىعىن ايتادى. جولاۋشىلار جولسەرىكتەردىڭ قىزمەتىنە جانە سوڭعى ستانسياعا جايلا ۆاگونمەن جەتەتىندىگىنە ريزاشىلىقتارىن ءبىلدىرىپ جاتىر.

بۇرىن الاكولگە دەمالۋعا بارۋشىلار اۆتوكولىكپەن عانا شىعاتىن. ولار اۆتوبۋستا كوپ جول ازابىن شەگەتىن. سوندىقتان وسكەمەندىكتەر كوبىنە بۇقتىرما سۋ قويماسىنىڭ كوگىلدىر جايىلماسىنا دەمالۋعا باراتىن.

ءقازىر الاكولدىڭ شيپاجايىنا باراتىندار سانى كوبەيدى. ەندى جولاۋشىلاردىڭ سۇرانىسىنا وراي، وتباسىمەن دەمالۋشىلارعا جاقسى جاعداي جاسالۋدا.

اتاپ وتەرلىگى، بيىلعى 21 ماۋسىمدا وسكەمەن-1 ستانسياسىنان العاشقى پويىز ساپارعا شىعىپ، الاكول جاعالاۋىنا جولاۋشىلاردى جەتكىزدى.