استانا قالاسىنىڭ 20 جىلدىعىنا وراي بۇگىن الماتىداعى اراتتا «مۇمكىندىكتەر ۋاقىتى» اتتى بوس ورىندار جارمەڭكەسى ۇيىمداستىرىلدى.

اتالمىش شارانى الماتى قالاسىنىڭ اكىمدىگىمەن بىرلەسە وتىرىپ الماتى قالالىق جۇمىسپەن قامتۋ جانە الەۋمەتتىك باعدارلامالار باسقارماسى، الماتى قالاسىنىڭ حالىقتى جۇمىسپەن قامتۋ ورتالىعى ۇيىمداستىردى.

بوس ورىندار جارمەڭكەسىنىڭ ماقسات – مۇددەلى جۇمىس بەرۋشىلەر مەن جۇمىس ىزدەۋشىلەردى جۇمىسقا ورنالاستىرۋ، حالىقتى جۇمىسپەن قامتۋ ماسەلەلەرى بويىنشا ازاماتتارعا كەڭەستەر بەرۋ، مۇمكىندىكتەردى جاريالاۋ – جۇمىسقا ورنالاستىرۋ، قىزمەتكەرلەر تاڭداۋ، كاسىپتىك باعدارلاۋ مەن وقىتۋ جانە جۇمىسسىز ازاماتتاردى قولداۋ ماسەلەلەرىنە نازار اۋدارتۋ بولىپ تابىلادى.

الماتىدا وتكەن «مۇمكىندىكتەر ۋاقىتى» اتتى بوس ورىندار جارمەڭكەسىنە ءبىر مىڭنان اسا بوس جۇمىس ورىندارىن ۇسىناتىن 150 جۇمىس ەرۋشى قاتىستى.

سونىمەن قاتار، بۇگىنگى شارادا استانانىڭ مەرەيتويىنىڭ قارساڭىندا قالا تۇرعىندارى مەن قوناقتارى ءتاتتى تورتتان ءدام تاتىپ، استانا كۇنىن تويلاۋدى باستاپ كەتتى.

اربات الاڭىندا قالا تۇرعىندارى مەن قوناقتارعا مەرەكەگە تارتۋ رەتىندە 20 مەترلىك تورت پەن 500 كگ پالاۋ تارتۋ ەتىلىپ، مىڭداعان ادام دامنەن اۋىز ءتيدى.

كەڭ اۋقىمدا وتكەن جارمەڭكەدە استانا مەن الماتى تاريحىنان سىر شەرتەتىن فوتوكورمە ۇيىمداستىرىلدى. مەرەكەلىك شارا اياسىندا ۇيىمداستىرىلعان فوتوكورمەدە جارمەڭكەگە كەلۋشىلەر 9 وتاندىق سۋرەتشىنىڭ 30-عا جۋىق تۋىندىسىن تاماشالادى. ولاردىڭ اراسىندا استانانىڭ 10 جىل بۇرىنعى كورىنىستەرى دە ورىن تاپتى.

مەرەكەلىك شارانى تاماشالاۋعا كەلگەن قوناقتار، سونىمەن قاتار، كونسەرتتىك باعدارلامانى تاماشالادى. ەلىمىزدىڭ جاس تالانتتارى بۇگىنگى مەرەكەلىك شارادا ءوز ونەرلەرىن كورسەتىپ، استاناعا قۇتتىقتاۋ تىلەكتەرىن جەتكىزدى.