ديماش قۇدايبەرگەن بەلارۋسيا تورىندە «سلاۆيان بازارى - 2018» حالىقارالىق فەستيۆالىندە شىرقاعان اندەرى رەسەيلىك «رتر» مەن «مير» تەلەارناسىنىڭ ەفيرىنەن الىنىپ تاستالدى، دەپ جازادى Qamshy.kz اقپارات اگەنتتىگى. مۇنداي جاعداي بۇعان دەيىن دە بولعان. بىلتىر ديماش «سلاۆيان بازارى» بايقاۋىنا قوناق رەتىندە بارىپ، ءان شىرقاعان، الايدا ديماشتى ەفيردەن قيىپ تاستاپ ءانشىنىڭ تىڭدارماندارىنىڭ شامبايىنا تيگەن ەدى. بيىل ءدال سونداي جاعداي قايتالانعاننان كەيىن ديماشتىڭ تىڭدارماندارى ءۇنسىز قالماي ديماشتىڭ ونەرىن تەلەارنالاردان تاماشالاۋ قۇقىعىن تالاپ ەتپەك.
«مير» تەلەارناسىنان بولەك، «رتر» ارناسى دا ديماشتى ەفيردەن الىپ تاستاعان. ديماشتىڭ رەسەيدە تىڭدارماندارى كوپ ەكەنىن ەسكەرسەك، اتالمىش تەلەارنا باسشىلىعى كورەرمەندەردىڭ قالاۋىن ەسكەرمەگەنى بايقالادى. ديماشتىڭ تىڭدارماندارى «مير» تەلەارناسىنىڭ ارەكەتىن مۇلدە تۇسىنبەي وتىر. سەبەبى اتالعان ارنا تمد ەلدەرىندە حابار تاراتادى. ونىڭ ىشىندە قازاقستان دا بار. ديماشتىڭ فاناتتارى «قازاقستاندا وتىرىپ قازاقستاندىق ءانشىنىڭ ونەرىن تەلەارنادان كورە الماساق، قازاقستاندا حابار تاراتاتىن تەلەارنا مادەني جاڭالىقتاردى تولىق بەرمەيتىن بولسا مۇنداي ارنانىڭ بىزگە قانداي قاجەتى بار؟» دەپ وتىر.
«ديماش دوستار» اتتى فانكلۋبتىڭ اكىمشىسى مادينا قۇرمانعالييەۆا اتالمىش جاعدايعا قاتىستى تىڭدارمانداردىڭ جوسپارىمەن ءبولىستى.
- ءقازىر ديماشتىڭ فاناتتارى اقىلداسىپ جاتىرمىز، ماسەلەنى كوتەرىپ «مير» تەلەارناسىنىڭ باسشىلىعىنا، ق ر مادەنيەت جانە سپورت مينيسترلىگىنە حات جازباقشىمىز. ديماش ەندى تانىلىپ كەلە جاتقان جاس ءانشى ەمەس قوي، ازيا جۇلدىزى. ونى كوپتەگەن ەلدە ءوز تىڭدارمانى بار. ول جەردە ديماشتى جاقسى كورەدى، ونەرىن جوعارى باعالايدى. ءقازىر رەسەيلىك تىڭدارماندار ديماشتىڭ ەفيردەن الىنىپ تاستالۋىنا قاتىستى الەۋلەمتتىك جەلىدە ءوز نارازىلىقتارىن ءبىلدىرىپ جاتىر. ديماشتى ەفيردەن الىپ تاستاعان پروديۋسەرلەر ميلليونداعان تىڭدارماندى ادەمى، جاندى داۋىستاعى ونەردى تاماشالاۋ قۇقىعىن ايىرىپ وتىر، دەيدى مادينا قۇرمانعالييەۆا.
ديماشتىڭ فاناتتارى مۇنىڭ استارىندا لاس ساياسات جاتۋى مۇمكىن ەكەنىن دە جوققا شىعارمايدى. ولاردىڭ ويىنشا، ەگەر ديماشتى ساياسات ءۇشىن ەفيردەن قيىپ تاستاسا مۇنداي ساياسات الىسقا بارمايدى. ال ساياسات بولماسا، ياعني تەلەارنا قىزمەتكەرلەرىنىڭ كاسىبيلىگىنىڭ تومەندىگى دەپ باعالاپ وتىر. سەبەبى ديماش قۇدايبەرگەننىڭ ونەرى – تىڭدارمانعا ەستەتيكالىق ءلاززات سىيلايتىن، تىڭدارمان سۇرانىسىنا يە.
- بۇل ءبىرىنشى رەت بولىپ وتىرعان جاعداي ەمەس. بىلتىر دا ديماش "سلاۆيان بازارىنا" قوناق رەتىندە كەلگەن، «رتر» مەن «مير» بىلتىر دا بيىل دا كورسەتپەدى. «رتر» - كوممەرسيالىق تەلەارنا. وندا فەستيۆالدىڭ قىسقارتىلعان نۇسقاسىن كورەرمەنگە ۇسىندى. كوپتەگەن ارتىستەردى الىپ تاستادى. ونىڭ ىشىندە ديماش تا بار. تەك تانىمال رەسەيلىك انشىلەردى عانا قوسقان. ال «مير» تەلەارناسى بايقاۋدىڭ رەسەيلىك ارنا كورسەتكەن قىسقارتىلعان نۇسقاسىن الا سالعانداي كورىندى، - دەيدى مادينا قۇرمانعالييەۆا.
شىلدەنىڭ 12ء-سى مەن 16-سى ارالىعىندا بەلارۋسيادا وتكەن «سلاۆيان بازارى – 2018» حالىقارالىق بايقاۋىنا الەمنىڭ تۇكپىر-تۇكپىرىنەن ديماشتىڭ فاناتتارى ءانشىنىڭ ونەرىن تاماشالاۋ ءۇشىن بارعان. ونىڭ ىشىندە رەسەيلىك تىڭدارماندار دا جەتەرلىك. مادينا قۇرمانعالييەۆانىڭ ايتۋىنشا، رەسەيلىك فاناتتار ۇيىمداستىرۋ جۇمىستارىنا بەلسەنە اتسالىسقان.
- «سلاۆيان بازارى – 2018» بايقاۋىنا «ديماش دوستار» اتتى ديماشتىڭ فان كلۋبىنىڭ اتىنان 10 ادام باردىق. شەتەلدەن دە فاناتتار كەلدى. بارلىعىمىز 80 ادامداي بولدىق. ءوزىمىز جينالىپ كەش ۇيىمداستىردىق. رەسەيدەن كەلگەن فاناتتار وتە كوپ بولدى. ولار بىزگە ديماشقا گۇل الۋ، پلاكات جازۋ سەكىلدى جۇمىستاردى ۇيىمداتىرۋعا كومەكتەستى. ديماشتى ەفيردەن الىپ تاستاسا دا رەسەيلىكتەر ونى Youtube جەلىسى ارقىلى جاقسى بىلەدى، تانيدى، ونىڭ اندەرىن تىڭدايدى، دەيدى «ديماش دوستار» فان كلۋبىنىڭ اكىمشىسى.
ديماشتىڭ ەفيردەن الىنىپ تاستالۋىنا قاتىستى اقىن وڭايگۇل تۇرجان دا نارازىلىعىن Facebook پاراقشاسىندا جازعان ەدى.
«سلاۆيان بازارىندا» ديماش قۇدايبەرگەن ءوزىنىڭ عاجايىپ ءانشى ەكەندىگىن تاعى دا دالەلدەگەنى سونشالىق، ونىڭ ءان ايتقان تۇسىن «رتر» مەن “مير" تەلەكانالدارى قيىپ تاستاپتى. ويتكەنى بۇل اتىشۋلى ونەر فەستيۆالىنە رەسەيدىڭ دە ماڭدايالدى انشىلەرى قاتىسقان ەدى. سولارعا كولەڭكە تۇسپەسىن دەگەندەرى مە ەكەن، ا؟ كونسەرتتى جۇرگىزۋشى دە قاتىردى: "ديماش يز كازاحستانا" دەدى دە، "باسكوۆقا گۇل قالمايتىن بولدى عوي" دەدى. كونسەرتتى لۋكاشەنكو دا تاماشالادى. ونىڭ ديماشقا دەگەن قۇرمەتى ەرەكشە»، - دەپ جازدى اقىن.
ايتا كەتەيىك، بەلارۋسيادا 12 مەن 16 شىلدە ارالىعىندا «سلاۆيان بازارى - 2018» حالىقارالىق كونكۋرسى وتكەن بولاتىن. ديماش بالالارعا ارنالعان كونكۋرستا قازىلار القاسىنىڭ مۇشەسى بولدى. «سلاۆيان بازارى - 2018» بايقاۋىنا قازاقستاننىڭ اتىنان 2-سىنىپ وقۋشىسى ءابىلقايىر جۇماباي قاتىسىپ، ۇزدىك ۇشتىكتەن كورىنىپ، جۇلدەلى ورىنعا يە بولدى.
ديماشتان بولەك حالىقارالىق بايقاۋدا روزا رىمبايەۆا دا قازىلىق ەتكەن. ءانشى ەرەسەكتەر اراسىندا بايقاۋعا قاتىسۋشىلاردىڭ ونەرىنە باعا بەردى. فەستيۆالگە ەلىمىزدىڭ اتىنان 23 جاستاعى ەرنار سادىربايەۆ قاتىستى. ول حالىق اراسىندا امىرە ەسىمىمەن تانىمال.
بەلارۋسيادا قازاقستاننىڭ تانىمال ءانشىسى روزا رىمبايەۆانىڭ ەسىمى جازىلعان جۇلدىز ورناتىلدى. سونىمەن قاتار، بەلارۋسيا پرەزيدەنتى الەكساندر لۋكاشەنكو قازاقستاندىق انشىگە ارنايى سىيلىق تابىستاعان بولاتىن.
