قازىرگى تاڭدا قازاقستاندا پوليسەيلەردىڭ جۇمىسىنا كوڭىلى تولمايتىندار جەتىپ ارتىلادى. اسىرەسە دەنيس تەننىڭ ولىمىنەن كەيىن «الماتىنىڭ ءدال ورتاسىندا، تاپا-تال تۇستە ادامدى پىشاقتاپ، كولىگىنىڭ ايناسىن ۇرلاپ كەتكەنى – پوليسيا جۇمىسىنىڭ وسالدىعىنان» دەگەن پىكىر ءورشي ءتۇستى.

بۇدان بولەك پوليسەيلەردىڭ كۇدىكتىلەردى ۇرىپ-سوعۋ سەكىلدى زاڭسىزدىقتار ورىن الاتىنىن تۋرالى دا اقپارات ءجيى شىعىپ تۇرادى.

الەۋمەتتىك جەلىدە وسىدان ءبىراز ۋاقىت تارالسا دا ءوز ءمانىن جوعالتپاعان ۆيدەو كوپتىڭ جۇرەگىنە جىلۋ سىيلادى. سەبەبى قانداي مامان بولماسىن، ول مەيلى پوليسەي بولسىن ول ەڭ الدىمەن – ادام. ادامعا ءتان جاناشىرلىق، ادامنىڭ جاعدايىن تۇسىنە ءبىلۋ، مەيىرىمدىلىك تانىتۋ سەكىلدى ۇعىمدار باستى ورىندا تۇراتىنىن تاعى ءبىر كورسەتتى.

بانگكوك تۇرعىنى پوليسيا بولىمشەسىنە پىشاقپەن پوليسيا قىزمەتكەرلەرىنە شابۋىل جاساماق بولعان. انيرۋت مالي ەسىمدى وفيسەر تاپانشامەن قورعانۋدىڭ ورنىنا ەر ادامعا قاراما-قارسى باعىتتا وتىرىپ، ونىمەن سويلەسۋگە تىرىستى. سۋىق قارۋدى بەرۋگە كوندىردى. ودان كەيىن ەشكىم كۇتپەگەن جاعداي بولدى. پوليسەي ەر ادامدى قۇشاقتاپ ونى تىنىشتاندىرۋعا تىرىستى.

45 جاستاعى ءتارتىپ بۇزۋشى ەسىن جيا باستادى. پوليسەيلەر وعان سۋ اكەلىپ بەرىپ، ونىڭ نەندەي جاعدايدى باستان وتكەرگەنىنە قۇلاق استى.

«ول مۋزىكانت، ءبىراق كۇزەتشى بولىپ جۇمىس ىستەۋگە ءماجبۇر بولعان. بىرنەشە كۇن وعان جالاقى تولەمەگەن. وعان قوسا گيتاراسىن ۇرلاپ كەتكەن. وسى جاعدايلاردىڭ بارلىعى وعان اسەر ەتكەن»، دەيدى وفيسەر انيرۋت مالي.

مالي ەر اداممەن بىرگە تۇستەنىپ، وعان گيتارا سىيلاعان ەكەن.