«شەكارادان زاڭسىز ءوتتى» دەپ ايىپتالعان ەتنيكالىق قازاق سايراگۇل ساۋىتبايدىڭ ىسىنە قاتىستى سوت ۇكىم شىعاردى، دەپ حابارلايدى Qamshy.kz اقپارات اگەنتتىگى. سوت سايراگۇل ساۋىتبايدى ق ر قك 392 بابىنىڭ 1 بولىگى بويىنشا كىنالى دەپ تاۋىپ، 6 اي باس بوستاندىعىنان ايىرىپ، 63 بابىنىڭ نەگىزىندە ونى باس بوستاندىعىن شەكتەۋگە اۋىستىرىپ، سوت زالىنان بوساتۋ تۋرالى ۇكىم شىعاردى.
Qamshy.kz اقپارات اگەنتتىگى ەتنيكالىق قازاق سايراگۇل ساۋىتبايدى قىتايعا قايتارۋ تۋرالى ءىستى ءجىتى باقىلاپ، ەڭ ءبىرىنشى بولىپ اقپارات جاريالاعان بولاتىن.
ايتا كەتەيىك، بۇگىن سايراگۇل ساۋىتبايدى قىتايعا قايتارۋ ماسەلەسى الماتى وبلىسىنىڭ پانفيلوۆ اۋداندىق سوتىندا قارالىپ، ءجارىسسوز وتكەن.
پروكۋرور سوتتان ق ر قىلمىستىق كودەكسىنىڭ 392 بابى، 1 بولىگى بويىنشا 6 اي باس بوستاندىعىنان ايىرۋدى، جازاسىن وتەۋ مەرزىمىن تۇتقىندالعانىنان بەرى قارايعى 23 مامىردان باستاپ ەسەپتەپ، تۇرعىلىقتى مەكەنجايى بويىنشا پروباسيالىق باقىلاۋعا الۋدى جانە سوت زالىنان قاماۋدان بوساتۋدى سۇرادى.
ءسوز العان ايىپتالۋشى «قىتايدان قاتتى قىسپاق كورىپ، ادام نانعىسىز باستان كەشىردىم. تاريحي وتانىمىزدا ءومىر ءسۇرۋ ءۇشىن 2016 جىلى ەلگە كەلمەك بولدىق، مەنىڭ ءتولقۇجاتىمدى تارتىپ الماعان بولسا زاڭدى تۇردە وتباسىممەن بىرگە كەلگەن بولار ەدىم. وعان جۇڭگو جاق كىنالى دەپ ەسەپتەيمىن»، - دەپ ءوزىنىڭ ەلدەن جىراقتاپ قالۋى مەن شەكارادان زاڭسىز ءوتۋى تۋرالى ءتۇسىندىردى. «وسى قايعىنىڭ ءوزى دە ماعان جەتكىلىكتى، ەكى بالام ءۇشىن جانىمدى بەرۋگە بارمىن» دەپ اشىنا جاۋاپ بەردى.
ال، قورعاۋشى، ادۆوكات ابزال قۇسپان ايىپتاۋشىنىڭ سۇراعان جازاسىمەن كەلىسەتىنىن ايتتى. كەز كەلگەن قىلمىستىڭ جاسالۋ سەبەبىن انىقتامايىنشا سالدارىمەن كۇرەسۋدى ءمانى جوق ەكەنىن ايتتى. «نە سەبەپتى وسىنداي قىلمىس جاسالدى؟» دەگەن سۇراۋ تاستاي وتىرىپ، قازاقستان راتيفيكاسيالاعان حالىقارالىق زاڭدارعا نازار اۋداردى. بالالارى ۇكىلىاي مەن ۇلاعاتتان ءبولىنىپ قالۋى — انا بالا قۇقىعىن قورعايتىن حالىقارالىق شارتتاردىڭ جۇڭگو تاراپىنان بۇزىلعانى دەپ ءتۇسىندىردى. ادۆوكات شەتەلدىك قۇقىق قورعاۋ ۇيىمدارىنىڭ، HRW-دىڭ، گەرمانيانىڭ ادام قۇقىقتارىن قورعاۋ ۇيىمدارىنىڭ قازاقستان پرەزيدەنتىنە حات جازعانىن، New York Times، Washington Post سياقتى حالىقارالىق باسىلىمداردا 200-دەن استام ماقالا جازىلعانىن دا ايتا كەتتى. قورعاۋشى «پانا ىزدەۋشى تۇلعا» كۋالىگى تابىس ەتىلگەن سايراگۇل ساۋىتبايعا بۇۇ جانىنداعى بوسقىندار ءىسى جونىندەگى جوعارى كوميسساريات وكىلدەرىنىڭ الاڭداۋلى ەكەنىنە دە نازار اۋداردى. بۇل جەردە ءبىر عانا ادامنىڭ تاعدىرى ەمەس تاعدىر تارازىسىندا قىتايدا قىسپاق كورىپ جاتقان مىڭداعان قانداستىڭ ءومىرى تۇرعانىنا نازار اۋداردى.
ايتا كەتەر بولساق، سايراگۇل ساۋىتبايعا قازاقستان قىلمىستىق كودەكسىنىڭ 392 - بابى شەكارانى زاڭسىز بۇزىپ ءوتۋ بويىنشا ايىپ تاعىلعان. سوتقا حالىقارالىق باسىلىمداردان دا جۋرناليستەر قاتىسقان.
