وتكەن جىلى ەلەكتروندى ساۋدا كولەمى 30%-عا ءوسىپ 1 ميلليارد دوللاردى قۇرادى. بۇل تۋرالى الماتىدا «ەلەكتروندىق كوممەرسيانى دامىتۋ ءۇردىسى: ميف نەمەسە شىندىق» بيزنەس-فورۋمىنا قاتىسۋشىلار مالىمدەدى.

قازاقستانداعى ەلەكتروندى ساۋدا نارىعى وتاندىق ينتەرنەت-دۇكەندەرىندە جانە ەلەكتروندىق قىزمەتتەر سايتتارىندا ساتىپ الۋ سانى بويىنشا تمد ەلدەرى ۇشتىگىنىڭ قاتارىنا ەندى.

بيىلعى جىلى مامانداردىڭ ايتۋىنشا ونلاين ساتىلىم مەن ونلاين قىزمەت كورسەتۋ كەم دەگەندە ەكى ەسە ۇلعايادى. ەلەكتروندى ساۋدا سالاسىندا الدىڭعى رولگە شاعىن جانە ورتا بيزنەس وكىلدەرى شىعادى.

نازار اۋداراتىن تاعى ءبىر ءۇردىس - ورتالىق ازيا ەلدەرىنىڭ نارىعىندا ينتەرنەت-دۇكەندەر جەلىسى دامىپ، اقشاسىز تولەم پلاتفورمالارى قۇرىلۋدىڭ ناتيجەسىندە قازاقستاندىق كاسىپكەرلەر بۇل باعىتتا جۇمىس جاساۋدا.

قازاقستاندىق ينتەرنەت بيزنەس اسسوسياسياسىنىڭ پرەزيدەنتى كونستانتين گوروجانكيننىڭ ايتۋىنشا، قازاقستان، وزبەكستان، تاجىكستان، قىرعىزستاننىڭ ينتەرنەت-دۇكەندەرى ورتالىق ازيانىڭ نارىعىنا شىعىپ اياققا نىق تۇرعاننان كەيىن، جاھاندىق ءىرى ويىنشىلار قاتارىنان كورىنۋدىڭ مۇمكىندىگى جوعارى. بۇل ءوز كەزەگىندە ەلدەردەگى ەلەكتروندى ساۋدانى دامىتا قويماي، كومپانيالاردىڭ دارەجەسىن ارتتىرادى. نارىقتا جوق جاڭا قىزمەتتەردىڭ پايدا بولۋىنا مۇمكىندىك بەرىپ، ونىڭ باعىتىن انىقتايتىن بولادى.  

بۇدان وزگە، كونستانتين گوروجانكين ستارتاپ-قوزعالىستاردى الماتى، استانا، اقتاۋ قالالارىندا عانا قولداۋ ارقىلى جاقسى ناتيجەگە جەتۋ مۇمكىن ەمەس ەكەنىن ايتتى.  

«قازاقستاندا ءقازىر 3 ميلليونەر قالا بار. ينتەرنەت ساۋدانى ەندى قولعا العاندارعا كاسىپتەرىڭدى ميلليونەر-قالالاردا باستاڭدار دەپ كەڭەس بەرەمىن. بۇل بيزنەستە تەك قازاقستاننىڭ نارىعىمەن شەكتەلىپ قالۋعا بولمايدى. 16-34 جاستاعى تۇتىنۋشىلار سانى 1 ملن ادام بولاتىن تاشكەنتتىڭ مۇمكىندىگىن دە ەسكەرگەن دۇرىس. ەگەر وسى قالالار نىساناعا الىنسا، ورتالىق ازيا ەلدەرىنىڭ ينتەرنەت نارىعى ءبىزدىڭ قولىمىزدا بولادى. بۇل نارىقتا كوشتىڭ سوڭىندا ەمەس، الدىندا جۇرگەندەر عانا ۇتادى»، – دەدى كونستانتين گوروجانكين. 

سونداي-اق، ۇكىمەت 2021 جىلعا قاراي قازاقستانداعى ساۋدا-ساتتىقتىڭ
2-3%-ى ە-كوممەرسيا نارىعىنىڭ ۇلەسىندە بولادى دەپ ۇمىتتەنىپ وتىر. قازىرگى كورسەتكىش 1،9% عانا. ۇلىبريتانيادا بۇل كورسەتكىش - 17، گەرمانيادا – 21،  رەسەيدە - 6%-عا جەتكەن. ينتەرنەت-ساۋدانىڭ دامۋىنا ۇلەس قوساتىن توپ 16-34 جاس ارالىعىنداعى جاستار. قازاقستاندا وسى جاستاعى تۇتىنۋشىلاردىڭ ۇلەسى 12%-عا دا جەتپەيدى. ال كورشىلەس وزبەكستاندا جاستاردىڭ ۇلەسى 27%-دان اسىپ كەتكەن ەكەن.