«جاس وتان» جق جانە «بولاشاق» قاۋىمداستىعى اۋىلدىق جەرلەردە اعىلشىن ءتىلىن وقىتاتىن ەرىكتىلەردى قابىلداپ جاتقانى تۋرالى حابارلايدى.

وقۋشىلاردىڭ اعىلشىن ءتىلى دەڭگەيىن ارتتىرۋ ماقساتىندا «جاس وتان» جق جانە «بولاشاق» قاۋىمداستىعى «English for Jastar» اتتى جوبانى ىسكە اسىرىپ جاتىر.

اعىمداعى جىلدىڭ قىركۇيەك ايىندا جوبا ىسكە قوسىلادى. وسىعان وراي، ۇيىمداستىرۋشىلار اعىلشىن ءتىلىن جەتىك بىلەتىن بارلىق ازاماتتاردى ىنتىماقتاستىققا شاقىرادى.

جوباعا قاتىسىپ، جاستاردىڭ ءبىلىمىن جەتىلدىرۋگە ۇلەسىمدى قوسامىن دەگەن جوعارى وقۋ ورىندارىنىڭ ستۋدەنتتەرى نەمەسە تۇلەكتەرى، كەز كەلگەن ماماندىق يەلەرى قاتىسا الادى. الايدا «شەت ءتىلى: ەكى شەت ءتىلى»، «شەتەل فيلولوگياسى»، «اۋدارما ءىسى»، «حالىقارالىق قاتىناستار» ماماندىعىنىڭ ستۋدەنتتەرى مەن تۇلەكتەرىنە باسىمدىق بەرىلەدى. باستى تالاپتارىنىڭ ءبىرى - اعىلشىن ءتىلى Intermediate دەڭگەيىنەن كەم بولماۋى، ورىس جانە قازاق تىلدەرىندە ەركىن سويلەي الۋى. بالالارمەن جۇمىس ىستەۋ تاجىريبەسى مەن ەرىكتى بولۋعا قۇلشىنىسى جوعارى ادامداردى شاقىرادى. جوباعا قاتىسۋعا مۇمكىندىك العان ەرىكتىلەر بەلگىلى ءبىر ۋاقىت ارالىعىندا سول ەلدى مەكەندە ءومىر ءسۇرىپ، وقۋشىلارعا ارنايى اعىلشىن تىلىنەن ۇيىمداستىرىلعان قوسىمشا ساباقتاردى جۇرگىزەدى.

«English for Jastar» جوباسى ەلىمىزدىڭ 14 وڭىرىندە ىسكە اسىرىلادى. جوباعا قاتىسۋعا شەتەلدەن بىرنەشە ەرىكتى قىزىعۋشىلىق ءبىلدىردى.