ەلىمىزدە جاڭا تۇرعىن ءۇي باعدارلاماسى ىسكە قوسىلدى. بۇل تۋرالى بۇگىن «باسپانا» يپوتەكالىق ۇيىمىنىڭ باسقارما ءتوراعاسى قايرات التىنبەكوۆ مالىمدەدى، دەپ جازادى.

باعدارلامانىڭ اتاۋى – «باسپانا حيت».

بۇدان بۇرىن «7-20-25» باعدارلاماسى بويىنشا ءبىرىنشى تۇرعىن ءۇي نارىعىنداعى جاڭا باسپانانى الۋعا بولاتىن. ال التىنبەكوۆتىڭ مالىمدەۋىنشە، ەندىگى ەكىنشى تۇرعىن ءۇي نارىعىنداعى باسپانانى نەسيەلەۋگە باعىتتالعان ارنايى ءونىم ازىرلەندى. ءارى ماماندار قازاقستاندىقتاردىڭ تابىسىنا قاتىستى ساراپتاما جۇرگىزىپ، 60 مىڭ تەڭگە ايلىق الاتىن ءار وتباسى «7-20-25» باعدارلاماسى بويىنشا پاتەر ساتىپ الۋىنا مۇمكىندىك تۋاتىن جاعداي جاسادى.

«ەكى ادامنان تۇراتىن وتباسى قۇنى 10 ميلليون تەڭگە بولاتىن پاتەر ساتىپ الۋ ءۇشىن باستاپقى جارنا رەتىندە 2 ميلليون اقشا تولەۋ كەرەك. ولارعا بۇل جاعدايدا 8 ميلليون تەڭگە نەسيە بەرىلەدى. سوندا اي سايىنعى تولەم 56 مىڭ تەڭگە بولادى. سوندىقتان دا ەكى ادامنان تۇراتىن وتباسى مۇشەلەرىنىڭ تابىسى 120 مىڭ تەڭگە بولۋى ءتيىس. ءارقايسىسى ورتاشا ەسەپپەن 60 مىڭ تەڭگە جالاقى السا، وندا ولار پاتەر الۋى مۇمكىن»، - دەدى التىنبەكوۆ.

بۇعان قوسا، التىنبەكوۆ جاڭا باعدارلامانىڭ شارتتارىمەن دە تانىستىردى. ونىڭ ايتۋىنشا، باستاپقى جارنا باسپانا باعاسىنىڭ 20 پايىزىنان باستالادى. پايىزدىق مولشەرلەمەسى - ۇلتتىق بانكتىڭ بازالىق ستاۆكاسى + 1،75 پايىزدى قۇرايدى. قازىرگى تاڭدا ۇلتتىق بانكتىڭ بازالىق ستاۆكاسى - 9 پايىز. سايكەسىنشە، اتالعان باعدارلامانىڭ پايىزدىق مولشەرلەمەسى 10،75 پايىزدى قۇرايتىن بولادى. نەسيە مەرزىمى - 15 جىلعا دەيىن.