25 قىركۇيەكتە ەلورداداعى “Spectrum” حالىقارالىق مەكتەبىندە “ءبىلىم-يننوۆاسيا” حالىقارالىق قوعامدىق قورىنىڭ باسشىسى دارحان وتە جاھانعا “The Eagle Huntress” دەگەن اتپەن تانىمال بۇركىتشى قىز ايشولپان نۇرعايىپقىزىنا قوردىڭ ءبىلىم گرانتىن تابىستادى دەپ حابارلايدى Qamshy.kz اقپارات اگەنتتىگى kazaknews.kz-كە سىلتەمە جاساي وتىرىپ.

بۇعان دەيىن ايشولپان تۋرالى سيۋجەتتى كورىپ، جەتكىنشەكتىڭ ونەرىنە تاڭىرقاعانىن ايتقان د. وتە ۇلتتىق قۇندىلىعىمىزدى دارىپتەپ جۇرگەن ايشولپاننىڭ وتانىن ءبىر كورگىسى كەلگەن تىلەگىن ەسكەرىپ ءارى بولاشاقتا جاھانداعى ۇزدىك جوعارى وقۋ ورىندارىندا ءبىلىم الۋعا بار مۇمكىندىكتى جاساۋ ءۇشىن “ءبىلىم-يننوۆاسيا” حالىقارالىق قوعامدىق قورى ءبىلىم گرانتىن ۇسىنىپ وتىرعانىن اتاپ ءوتتى. ءبىلىم گرانتىنىڭ قۇنى 20 مىڭ دوللار تۇرادى.

ءوز كەزەگىندە ەلورداداعى “Spectrum” حالىقارالىق مەكتەبىنىڭ باسشىسى ارتۋر تولەپبەكوۆ ايشولپاننىڭ ءبىلىم الۋى ءۇشىن بار جاعدايدىڭ جاسالاتىنىن اتاپ ءوتتى. ايشولپان “Spectrum” حالىقارالىق مەكتەبىندە ءبىلىم الىپ، تىلدىك تانىمدارىن ۇشتايدى، سونداي-اق، جاتىن ورنى مەن تاماعى، وقۋ قۇرالدارىمەن دە قامتاماسىز ەتىلەدى، دەپ مالىمدەدى ا. تولەپبەكوۆ.

ايشولپان موڭعوليانىڭ بايان-ولگەي ايماعىندا جەرگىلىكتى مەكتەپتەردىڭ بىرىندە 12 سىنىپتا وقيدى. بالا كەزىنەن قۇسبەگىلىككە اكەسى باۋلىعان. ايشولپاننىڭ ءوزى Kazaknews.kz تىلشىسىنە بەرگەن سۇحباتى بارىسىندا قۇسبەگىلىك اتا-باباسىنان مۇراعا قالىپ كەلە جاتقان ونەر ەكەندىگىن ايتادى. ايشولپان بولاشاقتا جۋرناليست يا اۋدارماشى بولعىسى كەلەتىنىن دە جاسىرمادى.

2016 جىلدىڭ قازانىندا اتاقتى امەريكالىق رەجيسسەر وتتو بەلل ايشولپان تۋرالى  «بۇركىتشى قىز» (The Eagle Huntress) دەرەكتى ءفيلمىن  كوپشىلىكتىڭ نازارىنا ۇسىندى. فيلم جارىققا شىققاننان كەيىن ايشولپان الەمدىك ءبىلىم مەن عىلىم سالاسىندا كوشباسشى سانالاتىن گارۆارد جانە وكسفورد ۋنيۆەرسيتەتتەرىنە شاقىرتۋ الدى.

ءوز كەزەگىندە، بۇگىنگى ءبىلىم گرانتىن تابىستاۋ وتىرىسى بارىسىندا الماتى قالاسىنداعى سۇلەيمان دەميرەل اتىنداعى ۋنيۆەرسيتەت ايشولپانعا كەز كەلگەن ماماندىققا ءبىلىم گرانتىن ۇسىنىپ، كۋالىگىن تابىستادى.

“ءبىلىم-يننوۆاسيا” حقق باسشىسى دارحان وتەنىڭ سوزىنشە، ايشولپان ءوز قالاۋى بويىنشا حالىقارالىق مەكتەپتە 2 جىل ءبىلىم الادى.

ايشولپاننىڭ اناسى الماگۇل قىزىنا ءبىلىم الىپ، جان-جاقتى شىڭدالۋىنا بار مۇمكىندىك بەرىپ وتىرعان قازاقستانعا جانە “ءبىلىم-يننوۆاسيا” حالىقارالىق قوعامدىق قورىنا زور العىسىن ءبىلدىردى.