«7-20-25» باعدارلاماسى اياسىندا 27 ميلليارد تەڭگەگە ءوتىنىش قابىلدانعان. بۇل تۋرالى ورتالىق كوممۋنيكاسيالار قىزمەتى ۇيىمداستىرعان باسپا ءسوز ءماسليحاتى بارىسىندا «باسپانا» يپوتەكالىق ۇيىمىنىڭ» باسقارما ءتوراعاسى قايرات التىنبەكوۆ مالىمدەدى، دەپ حابارلايدى Qamshy.kz اقپارات اگەنتتىگى.
«2018 جىلدىڭ 11 قىركۇيەگىندەگى كورسەتكىشىنە سايكەس، «7-20-25» باعدارلاماسى اياسىندا 27 ميلليارد تەڭگە قاراجات كولەمىندە ءوتىنىش قابىلدانعان. 18 ميلليارد تەڭگەلىك ءوتىنىش بانك تاراپىنان ماقۇلدانعان. ماقۇلدانعان نەسيەلەردىڭ تامىزداعى كورسەتكىشى شىلدەگە قاراعاندا ەكى ەسەگە وسكەن»، - دەپ حابارلادى قايرات التىنبەكوۆ.
سونىمەن قاتار ۇيىم باسشىسى جاڭا باعدارلاماعا بەلسەندى قاتىسىپ جاتقان وڭىرلەردى اتادى. ايتۋىنشا، الماتى، استانا قالالارى مەن ماڭعىستاۋ وبلىسى «7-20-25» بويىنشا كوش باستاپ تۇر. اقتوبە، شىعىس-قازاقستان جانە اقمولا وبلىستارى دا نەسيە وسىمىندە الدا كەلە جاتىر. ال سولتۇستىك قازاقستان جانە تۇركىستان وبلىستارىنىڭ تۇرعىندارى اراسىندا بەلسەندىلىك بايقامايدى. مۇنىڭ سەبەبىن التىنبەكوۆ اتالمىش وڭىرلەردە جەكە قۇرىلىس كومپانيالاردىڭ ازدىعىمەن ءتۇسىندىردى.
بۇعان قوسا قايرات التىنبەكوۆ قىركۇيەك ايىنىڭ ەڭ جوعارى كورسەتكىش كورسەتكەنىن مالىمدەدى.
«ماسەلەن، ەگەر «نۇرلى جەر» باعدارلاماسى بۇكىل تاريحىندا 37 ميلليارد تەڭگە كولەمىندە بولاتىن نەسيەلەۋ پروسەسىن ورىنداسا، «7-20-25» نەبارى ەكى ايدىڭ ىشىندە بۇل كورسەتكىشتىڭ جارتىسىنان اسىپ ءتۇستى. مەنىڭشە، باعدارلاما وتە ءتيىمدى، ءارى كوش باستاپ تۇر»، - دەدى قايرات التىنبەكوۆ.
باعدارلاماعا قاتىستى تۇرعىندار قىزىعۋشىلىق تانىتىپ وتىر. «باسپانا» باسشىسىنىڭ مالىمدەۋىنشە كليەنتتەرمەن ەشقانداي قيىندىقتار تۋمايدى.
«ايتارىم، تۇرعىندار اراسىندا دا قىزىعۋشىلىق ارتقان. بانك-سەرىكتەستەرىمىزگە سۇراۋ سالىپ، بىلگىسى كەلەتىن جانداردىڭ سانى كۇن ساناپ ارتىپ كەلەدى. الايدا باعدارلامانىڭ باستى تالاپتارى بارىنە ءمالىم. العاشقى جارنا 20 پايىز، جىلدىق مولشەرلەمە 7 پايىز، نەسيەنىڭ ەڭ ۇزاق مەرزىمى 25 جىلعا دەيىن»، - دەپ ءتۇسىندىردى «باسپانا» يپوتەكالىق ۇيىمىنىڭ» باسقارما ءتوراعاسى قايرات التىنبەكوۆ.
ءارى «باسپانا» باسشىسى «7-20-25» باعدارلاماسىنا بەلسەندى قاتىسىپ جۇرگەن كليەنتتەردىڭ قانداي بولاتىنىن دا سيپاتتاپ بەردى. ايتۋىنشا، كوبىنە 24-40 جاس ارالىعىنداعى ازاماتتار كەلەدى. تابىستارى تۇراقتى.
«7-20-25» باعدارلاماسى 4 شىلدەدەن باستاپ رەسمي تۇردە جۇمىسقا كىرىستى. بۇعان دەيىن ق ر ۇلتتىق بانكى باعدارلاماعا قاتىساتىن سەرىكتەس بانكتەردى اتاعان.
تىزىمگە 7 بانك ەندى. ولار: بانك سەنتركرەديت، ەۆرازيا بانكى، اتف بانك، حالىق بانكى، بانك RBK، سەسنابانك، تۇرعىن ءۇي قۇرىلىس جيناق بانكى.
جۋىردا سبەربانك پەن Forte بانك قوسىلدى.
ايتا كەتەيىك، «7-20-25» باعدارلاماسى ق ر پرەزيدەنتى نۇرسۇلتان نازاربايەۆتىڭ 5 ناۋرىزدا جاريالاعان «بەس الەۋمەتتىك باستاماسىن» جۇزەگە اسىرۋ اياسىندا جاسالدى. باعدارلاما بويىنشا يپوتەكالىق قارىزدار جىلىنا 7 پايىز ۇستەمەمەن 25 جىلعا بەرىلەدى. ءارى العاشقى جارنا – 20 پايىز.
باعدارلاماعا قازاقستاننىڭ كەز كەلگەن ازاماتى قاتىسا الادى. شارتتارى دا جەڭىل. ازاماتتىڭ باسىندا جىلجىمايتىن مۇلكى بولماۋى شارت. ءارى باعدارلاما بويىنشا قازاقستاننىڭ كەز كەلگەن وڭىرىنەن الماتى، استانا، اتىراۋ قالالارىنىڭ ەڭ ماكسيمالدى 25 ملن تەڭگەگە باسپانا ساتىپ الۋعا بولادى.
جالپى باعدارلاما ءتورت كەزەڭدە ىسكە اسىرىلادى:
بىرىنشىدەن، قارجى تارتۋدىڭ فورماسىن قالىپقا كەلتىرۋ كەرەك. ەكىنشىدەن، باعدارلامانى ءتيىمدى ىسكە اسىرۋ ءۇشىن كومپانيانى قارجى اگەنتتىگى تانۋى كەرەك. ءۇشىنشى كەزەڭدە، باعدارلامانىڭ جاڭا مۇمكىندىكتەرى اركىمگە جەڭىلدىك تالاپتارىن بەرەتىن مەملەكەتتىك تەڭدەسىز قادامى. تورتىنشىدەن، جەڭىلدىك بەرىلگەن يپوتەكالىق نەسيەلەر تولىق قامتاماسىز ەتىلگەن جانە تۇگەل قايتارىمدى بولۋعا ءتيىس ەكەندىگىنىڭ كورىنىسى.
