ورتالىق كوممۋنيكاسيا قىزمەتىندە وتكەن باسپا ءسوز ءماسليحاتى بارىسىندا «نۇرلى جەر» باعدارلاماسى اياسىندا تالقىلاندى. باعدارلامانىڭ جۇزەگە اسىرىلۋى جانە 8 ايداعى جەتىستىكتەر جايىندا ق ر ينۆەستيسيا جانە دامۋ ءمينيسترى جەڭىس قاسىمبەك ايتىپ بەردى.

قۇرىلىس بويىنشا جوسپار 64 پروسەنتكە ورىندالدى

«نۇرلى جەر» اياسىندا جىل باستالعالى 7،7 ملن شارشى مەتردى قۇرايتىن تۇرعىن ءۇي ەكسپلۋاتاسياعا بەرىلدى. جەڭىس قاسىمبەكتىڭ ايتۋىنشا، بيىل 7،7 ملن شارشى مەتردى قۇرايتىن پاتەر ەكسپلۋاتاسياعا بەرىلىپ، جىلدىق جوسپاردىڭ 64 پايىزى ورىندالدى.

كوپپاتەرلى تۇرعىن ءۇي قۇرىلىسىنىڭ ءوسىمى

سپيكەردىڭ سوزىنە قاراعاندا، تۇرعىن ءۇي باعدارلاماسىن جۇزەگە اسىرۋ مەن نەسيەلەۋ بويىنشا جەڭىلدىكتەر ۇسىنۋ ارقىلى تۇرعىن ءۇي قۇرىلىسى ينۆەستيسياسىنىڭ ءوسىمى بايقالادى.

«8 ايدىڭ قورىتىندىسىنا سايكەس، 702 ملرد تەڭگە قاراجات جۇمسالدى. بىلتىرعى كورسەتكىشتەن 31 پروسەنتكە ارتتى. رەسپۋبليكا بويىنشا 67 055 تۇرعىن ءۇي بەرىلدى، سونىمەن قاتار 26 665 جەكە ءۇي دە بار»، - دەدى جەڭىس قاسىمبەك.

 «تۇرعىن ءۇي قۇرىلىس جيناق بانكى» ارقىلى بەرىلەتىن كرەديتتىك تۇرعىن ءۇي

2 جىلعا تولار-تولماس ۋاقىتتا 18 500 پاتەر بەرىلدى، بۇعان قوسا بيىلعى جىلدىڭ 8 ايىندا 1970 پاتەر وتكەن.

«اكىمدىكتەر سالىپ جاتقان قۇرىلىس كرەديتتىك تۇرعىن ۇيلەردىڭ قولجەتىمدى بولۋىن نيەت ەتتى. ءبىر شارشى مەترى 140-180 مىڭ تەڭگە بولاتىن بولادى. ساتىپ الۋشىلار تۇرعىن ءۇي قۇرىلىس جيناق جۇيەسىنە سالىمشى بولىپ تابىلادى. ولاردىڭ جارتىسى – اكىمدىكتەردەگى تولەم جاساۋعا مۇمكىندىگى بار كەزەكتە تۇرعان ازاماتتار. بۇل مەحانيزم قازاقستاندىقتار اراسىندا ۇلكەن سۇرانىسقا يە – العاشقى تولەمنىڭ تومەن باعاسى، مينيمالدى ۇستەمە باعالار. «تۇرعىن ءۇي قۇرىلىس جيناق بانكىنە» ءتيىستى قاراجاتتىڭ 50 پروسەنتىن جيناعان ۋاقىتتا نەسيە جىلدىق 4 پروسەنت ۇستەمەمەن بەرىلەدى، بۇل تيىسىنشە قولجەتىمدى. سونىمەن قاتار الدىن-الا جانە ارالىق قارىزداردا دا قاراستىرىلعان»، - دەدى مينيستر.

ءمينيستردىڭ سوزىنە سەنسەك، بۇگىندە جيناق مولشەرى 30 پايىزعا ازايعان، ال تابىسى تۇراقتى ءبىزدىڭ بيۋدجەتتىكتەر، مۇعالىمدەر، دارىگەرلەر، مەملەكەتتىك قىزمەتكەرلەر قۇرىلىس جيناق بانكى ارقىلى پاتەرگە قول جەتكىزە الاتىن مۇمكىندىككە يە بولدى.

بيىل 8 ايدىڭ ىشىندە «نۇرلى جەر» جالدامالى تۇرعىن ءۇي باعدارلاماسى اياسىندا 922 پاتەر بەرىلدى.

جالدامالى پاتەرلەردىڭ سانى ارتقان

ساتىپ الۋعا بولمايتىن جالدامالى پاتەرلەردىڭ قۇرىلىسى – «نۇرلى جەر» باعدارلاماسىنىڭ 4 باعىتىنىڭ ءبىرى.

«نەبارى 2 جىلدا 6182 جالدامالى پاتەردى وتكىزۋ جوسپارلانعان. بۇگىنگى كۇنى 3542 پاتەر بەرىلدى، 8 ايدا 922 پاتەر وتكىزدىك»، - دەدى جەڭىس قاسىمبەك.

رەكورد جاڭارتقان ەڭ تومەنگى باعالار

ءبىر شارشى مەترى 120 مىڭ تەڭگە تۇراتىن ەڭ ارزان باعاداعى تۇرعىن ءۇي – 14 وبلىستا دا جۇزەگە اسىرىلۋى ءتيىس الداعى جوسپار.

«ءبىرىڭعاي ارحيتەكتۋرالىق ستيلدەگى پاتەرلەردى تۇرعىزۋ بويىنشا پيلوتتىق جوسپاردى جۇزەگە اسىرۋ جالعاسىپ كەلەدى. ءبىر شارشى مەترى – 120 مىڭ تەڭگە. ايتا كەتۋ كەرەك، قۇرىلىس بارىسىندا وتاندىق قۇرىلىس ماتەريالدارى قولدانىلادى. جالپى پيلوتتىق ۇيلەردىڭ سانى 2 مىڭعا جۋىق، 2017 جىلى 184 ءۇي بەرىلدى»، - دەدى دامۋ جانە ينۆەستيسيا ءمينيسترى.

ءمينيستردىڭ ايتۋىنشا، پيلوتتىق ۇيلەردىڭ 353ء-ى اقتوبە وبلىسىندا، 200ء-ى سولتۇستىك قازاقستان وبلىسىندا، قوستاناي وبلىسىندا 219، جامبىلدا 565، الماتىدا 202 جانە وقو-دا 166 ءۇي بار.

ءتۇيىن

ءسوزىن قورىتىندىلاي كەلە، جەڭىس قاسىمبەك ەلباسىنىڭ جولداۋى بارىسىندا ايتقان تاپسىرماسىن ەسكە سالىپ ءوتتى. نۇرسۇلتان نازاربايەۆ ءوز جولاۋىندا 2030 جىلعا دەيىن ءبىر ادام 30 شارشى مەتر پاتەرمەن قامتاماسىز ەتىلەتىندەي دارەجەگە جەتكىزۋ كەرەكتىگىن تاپسىردى.

ايتا كەتەيىك، «نۇرلى جەر» باعدارلاماسىنا قاتىسامىن دەگەن ازاماتتار حالىققا قىزمەت كورسەتۋ ورتالىعىنا ءوتىنىش بەرۋى قاجەت. ودان كەيىن اكىمدىكتىڭ كەزەگىنە تۇرادى.

باياعدارلاما اياسىندا سوعىس ارداگەرلەرىنە، جەتىمدەرگە، الەۋمەتتىك جاعىنان از قامتىلعاندارعا جانە مەملەكەتتىك قىزمەتكەرلەرگە باسىمدىق بەرىلەدى. ولار دا ءوتىنىش جازىپ، كەزەككە تۇرۋى ءتيىس.

اتالعان ساناتتاعى ادامعا جاتساڭىز دا، «نۇرلى جەر» باعدارلاماسىمەن باسپانا الۋ ءۇشىن بىرنەشە تالاپقا ساي كەلۋىڭىز شارت.

بىرىنشىدەن، سوڭعى بەس جىلدا اتىڭىزدا باسپانا بولماۋى كەرەك. ەكىنشىدەن، استانا مەن الماتىدا ەڭ كەمى ەكى-ۇش جىل تىركەۋدە تۇرعان بولۋىڭىز قاجەت.

«نۇرلى جەر» باعدارلاماسى بويىنشا يپوتەكالىق تۇرعىن ءۇي جىلدىق مولشەرلەمەسى 10 پايىز جەڭىلدىكپەن بەرىلەدى. ول ءۇشىن مىناداي كەزەڭدەردەن وتەسىز:

ءبىرىنشى قادام: بانككە قارىز جونىندەگى قۇجاتتى جانە سۋبسيديا الۋ ءۇشىن جازعان ارىزىڭىزدى كورسەتەسىز. قاجەتتى قۇجات ءتىزىمىن بانكتەن بىلە الاسىز.

ەكىنشى قادام: بانك كەپىلدەمەڭىز مەن تولەم جۇرگىزۋ قابىلەتىڭىزدى تەكسەرەدى.

ءۇشىنشى قادام: ەگەر بانك ءسىزدىڭ ءوتىنىشىڭىزدى قابىل ەتسە، 3 جۇمىس كۇنى ىشىندە قازاقستان يپوتەكالىق كومپانياسىنا سۋبسيديانى بەرۋ تۋرالى قولداۋحاتىن (حوداتايستۆو) جىبەرەدى.

ءتورتىنشى قادام: قازاقستان يپوتەكالىق كومپانياسى 5 جۇمىس كۇنى ىشىندە قۇجاتتارىڭىزدى تەكسەرەدى.

بەسىنشى قادام: قازاقستان يپوتەكالىق كومپانياسى 5 جۇمىس كۇنى ىشىندە بانككە قابىلداعان شەشىمى جونىندە جازباشا جاۋاپ جىبەرەدى.

التىنشى قادام: بانك قازاقستان يپوتەكالىق كومپانياسىنىڭ قابىلداعان شەشىمى نەگىزىندە سىزبەن كەلىسىمشارتقا وتىرادى، يپوتەكالىق كەلىسىم، تولەم كەستەسى قۇرىلادى، ەكى تاراپ سۋبسيديالاۋ كەلىسىمىنە قول قويادى دا، ونى قازاقستان يپوتەكالىق كومپانياسىنا جونەلتەدى. كەلىسىمشارتقا قول قويعاننان كەيىن قازاقستان يپوتەكالىق كومپانياسى 2 جۇمىس كۇنى ىشىندە بانككە كەلىسىمشارتتىڭ ەكى داناسىن جىبەرەدى. ونىڭ ءبىرىن بانك سىزگە بەرەدى.

جەتىنشى قادام: كەلىسىمشارت قول قويعان كۇننەن باستاپ كۇشىنە ەنەدى. ءسىز «نۇرلى جەر» باعدارلاماسى بويىنشا جەڭىلدىكپەن يپوتەكا الاسىز.

نۇرلى جەر» باعدارلاماسى نەگىزگى 5 مىندەتتى ىسكە اسىرۋ ارقىلى حالىقتىڭ تۇرعىن ءۇي ماسەلەسىن كەشەندى شەشۋگە باعىتتالعان:

حالىقتىڭ الەۋمەتتىك جاعىنان وسال توپتارى ءۇشىن جالعا بەرىلەتىن تۇرعىن ءۇي قورىن قۇرۋ.

جەكە تۇرعىن ءۇي قۇرىلىسىن دامىتۋ.

تۇرعىن ءۇي قۇرىلىس جيناقتارى جۇيەسى ارقىلى وتكىزىلەتىن كرەديتتىك تۇرعىن ءۇي سالۋ.

جەكە قۇرىلىس سالۋشىلاردى تۇرعىن ءۇي سالۋعا ىنتالاندىرۋ.

يپوتەكالىق كرەديت بەرۋدىڭ قولجەتىمدىگىن ارتتىرۋ.