ەكسترەمالدى جۋرناليستيكا – بۇل ادەتتەن تىس فاكتىلەر مەن ءتۇرلى وقىس وقيعالاردى زەرتتەيتىن سالا. حالىققا شىنايى ءارى ساپالى اقپارات جەتكىزۋ ماقساتىندا جۋرناليست ءوزىنىڭ قارا باسىن قاتەرگە تىگەدى. بۇل سالاعا كوبى قىزىعادى، دەگەنمەن بەل شەشىپ بارا بەرمەيدى. سايتىمىزدا جارىق كورگەن «قانداي جاعداي بولماسىن، جۋرناليست قولىنا قارۋ الماۋى ءتيىس» دەگەن ماقالادا جەر بەتىندە ەشبىر اقپارات، سيۋجەت ءجۋرناليستىڭ ومىرىنەن ارتىق ەمەستىگىنە باسا نازار اۋدارىپ ايتقان بولاتىنبىز.  

ءيا، ناقتى اقپارات، شىنايى سيۋجەت جۋرناليست قىزمەتىندەگى ناقتىلىق ءارى جاۋاپكەرشىلىك. الايدا، مۇنىڭ بارلىعى دا ەگەر ءبارى ءساتتى بولسا...

اۋعانستان. سيريا. اتتاپ باسقان ءاربىر قادامىڭ قاۋىپ-قاتەرگە تولى بۇل ەلدەردە قاي ۋاقىتتا، قاي جەردە قانداي جاعداي بولارىن بىلمەيتىنىڭ راس. قانشاما جازىقسىز ادامداردىڭ قانىن جۇتىپ، قانشاما قاندى وقيعالارعا كۋا بولعان بۇل مەكەندە قالاي كۇنەلتىپ وتىرعان تۇرعىنداردىڭ ءومىرىن ءبىز كوگىلدىر ەكراننىڭ ار جاعىنان عانا كورىپ، شەتەلدىك ب ا ق بەتتەرىندە جاريالانعان ءتۇرلى ماقالالار مەن سيۋجەتتەر، دەرەكتى فيلمدەر ارقىلى ءبىلىپ وتىرامىز. دەگەنمەن، بەس-التى مينۋتقا، كوپ بولسا، 15-20 مينۋتقا سوزىلاتىن رەپورتاجدار جارىلىستان ابدەن زارداپ شەككەن ەلدەگى حالىقتىڭ جاعدايىن تولىققاندى شىنايى  جەتكىزە الا ما؟

قازاق جۋرناليستيكاسىندا ەكسترەمالدى جۋرناليستيكا، وزگە ەلدەرمەن سالىستىرعاندا، سونشالىقتى جاقسى دامىعان ەمەس. دەگەنمەن، سوعىس ءورتى تۇتانعان ەلدەگى حالىقتىڭ جاعدايىن ءوز كوزىمەن كورىپ قايتقان جۋرناليستەر مۇلدە جوق دەپ تە ايتا المايمىز.

1949 جىلى 12 تامىزدا ءىىى جەنيەۆا كونۆەنسياسىندا قابىلدانعان زاڭنىڭ 4ا بابىنا سايكەس "جۋرناليستەرگە وق اتۋعا، شابۋىلداۋعا بولمايدى" دەپ كورسەتىلگەن. بۇل زاڭدىلىق حح عاسىردا قۇقىقتىق مەملەكەتتەر اراسىندا سوعىس ءورتى تۇتانعان كەزدە ساقتالعان بولاتىن. الايدا، بۇگىندە تەررورلىق شابۋىلدار، تەرراكتىلەر، قارۋلانعان راديكالدى توپتاردىڭ شابۋىلى ءورشىپ تۇرعان زاماندا "پرەسسا" قالقانى ءجۋرناليستىڭ ءومىرىن ساقتاپ قالا المايدى.

Qamshy.kz اقپارات اگەنتتىگىنىڭ ءتىلشىسى 2015-2017 جىلدار ارالىعىندا اۋعانستان مەن سيريا ەلدەرىنە بارىپ، جەرگىلىكتى حالىقتىڭ جاعدايىن ءوز كوزىمەن كورىپ، تانىسىپ قايتقان جۋرناليست رۋسلان يدريسوۆتىڭ ءوز اۋزىنان ەستىپ، قازاقستانداعى ەكسترەمالدى جۋرناليستيكا مەن تەراكت، قارۋلى قاقتىعىستان زارداپ شەككەن حالىقتىڭ تۇرمىس-تىرشىلىگى جونىندە اڭگىمەلەسىپ قايتتى.

ونىڭ ەكسترەمالدى جۋرناليستيكاعا قىزىعۋشىلىعى قازاقستان رەسپۋبليكاسى  قورعانىس مينيسترلىگى ۇيىمداستىرعان اسكەري ديسكۋرستار مەن باسقا دا شارالارعا قاتىسقاننان كەيىن عانا ارتا باستاعان ەكەن.  

قارۋلى قاقتىعىس ايماعىندا نەمەسە وزگە دە ەكسترەمالدى سيتۋاسيا كەزىندە جۋرناليست قانداي جاعدايعا تاپ بولۋى مۇمكىن نارسەلەردى تەوريا جانە پراكتيكا ارقىلى كورسەتەتىن مۇنداي ديسكۋرستار قازاق جۋرناليستيكاسىنا جاڭا دەم بەرىپ، ونىڭ اياسىن كەڭەيتكەنى بەلگىلى. بۇل شارادا ۇيرەنگەن تاجىريبە كەز كەلگەن ومىرلىك جاعدايدا دا قاجەت بولىپ قالۋى ابدەن مۇمكىن. سونىمەن…

–اۋعانستان، سيريا ەلدەرىنە ساپارىڭىز جونىندە توقتالىپ وتسەڭىز. قاي جىلدارى باردىڭىز؟ قانداي ماقساتتا؟

–ءبىرىنشى رەت اۋعانستانعا 2016 جىلى سىرتقى ىستەر ءمينيسترىنىڭ اۋعانستان استاناسى كابۋل قالاسىنا ءىس-ساپارىن اقپاراتتىق سۇيەمەلدەۋ ماقساتىندا باردىق. بۇل رەسمي ساپار بولدى. اۋعانستانعا بارعاننان سوڭ، بۇل ەلگە قايتادان ورالۋىم  مۇمكىن ەكەندىگىن ءتۇسىندىم. دەلەگاسيا رەتىندە رەسمي ساپارمەن ەمەس، حالىقتىڭ تۇرمىسىمەن جاقىنىراق تانىسۋ ءۇشىن قاراپايىم جۋرناليست رەتىندە كەلۋدى ويلادىم. كەيىننەن سول جىلى 31 جەلتوقساندا پروديۋسەردەن «2 قاڭتار كۇنى سيرياعا ۇشۋىمىز كەرەك» دەگەن حابارلاما كەلدى. باس تارتقان جوقپىن. وپەراتور قانات ءابىلدين ەكەۋىمىز سيرياعا باراتىن بولىپ شەشتىك. ونداعى ماقساتىمىز – قازاقستاننان سيرياعا جونەلتىلگەن گۋمانيتارلىق كومەكتىڭ جەتكەنىن حابارلاۋ بولدى.

سيرياداعى ساپارىنان ورالعاننان كەيىن كابۋلعا قايتا بارۋدى ويلاپ، ءتۇرلى قۇزىرلى ورگاندارعا حات جولدادىق، ءوزىمىزدىڭ باسشىلىقپەن دە كەلىسىپ، جان-جاقتى قولداۋدىڭ ارقاسىندا 2017 جىلدىڭ مامىرىندا وپەراتور قانات ەكەۋىمىز كابۋل قالاسىنا ۇشىپ، ودان ءارى مازاري شاريف  اۋدانىنا كەلدىك.

جارتى عاسىر وتسە دە، سوعىس ءورتى ءالى باسىلماي كەلە جاتقان ەلدە ءقاۋىپتىڭ قايدان كەلەتىنىن بىلمەيسىڭ. كەز كەلگەن ۋاقىتتا ءتۇرلى جاعدايلار ورىن الۋى مۇمكىن.

–ەسىڭىزدە جاتتالىپ قالعان، ءوزىڭىز تاپ بولعان وقىس وقيعالار ورىن الدى ما؟

–ءيا، ەسىمدە قالىپ قويعان ءبىر وقيعا بار. دەگەنمەن، سونداي دا ءبىر  ءقاۋىپتى جاعداي دەپ تە ايتا المايمىن. حومس قالاسىنان ءوتىپ بارا جاتىپ، ۇيلەر مەن عيماراتتارى قيراپ قالعان اۋداندى كوردىك. بىر-ەكى ءۇي عانا ەمەس، بۇكىل اۋدان  قيراپ جاتىر. ەلشىلىكتەگى ارىپتەستەرىمىزگە ايتىپ، ءبىر ساعاتقا سول جەردى ءتۇسىرىپ الۋعا توقتادىق. تەرراكتىدەن زارداپ شەككەن ايماقتىڭ كورىنىسىن تولىقتاي ءتۇسىرىپ الۋ ءۇشىن بيىك عيماراتقا شىعۋ كەرەك بولدى، سول جەردەگى مەملەكەتتىك مەكەمەنىڭ عيماراتىن تاۋىپ الدىق تا، ىشىنە كىرىپ جوعارىعا كوتەرىلە باستادىق. جەردە شاشىلىپ جاتقان قۇجاتتار، كومپيۋتەرلەر – عيماراتتىڭ ىشىندەگى كورىنىس… جارىلىس باستالعاندا ادامدار ءومىرىن ساقتاپ قالۋ ءۇشىن ءبارىن تاستاپ قاشقاندىعى كورىنىپ تۇر. وسىنىڭ ءبارىن ءوز كوزىڭمەن كورىپ تۇرىپ، ءبىر ساتتە بۇتىندەي ءبىر حالىقتىڭ ءومىرىنىڭ استان-كەستەڭىن شىققانىن تۇسىنەسىڭ. وتە قورقىنىشتى كورىنىس. جوعارىعا كوتەرىلىپ، وپەراتورمەن ءتۇسىرىلىم جۇمىستارىن جۇرگىزىپ جاتقان كەزدە اتىلعان وقتىڭ داۋىسىن ەستىدىك. اۆتوماتتار بىرىنەن سوڭ ءبىرى اتىلىپ جاتتى. قانات ەكەۋىمىز بىر-بىرىمىزگە قارادىق تا، تۇرعان ورنىمىزدا قاتىپ قالدىق، نە بولىپ جاتقانىن بىردەن تۇسىنە المادىق. اسكەري ديسكۋرستاردا، پراكتيكادا ۇيرەتكەندە مۇنداي جاعدايدا بىردەن باسىڭدى بۇعىپ جەرگە جاتا قالۋىڭ كەرەك، الايدا ءدال سول مەزەتتە ءبارى ويىڭنان شىعىپ، نە ىستەرىڭدى بىلمەي قالادى ەكەنسىڭ. كەيىننەن ءبىزدىڭ قاسىمىزدا جۇرگەن جەرگىلىكتى سيريالىق ازامات «ءمان بەرمەڭىزدەر، بۇل كورشى اۋدانداعى بىر-بىرىمەن جاۋ توپتار اتىسىپ جاتىر، ۋايىمداماڭىزدار» دەپ ايتتى. قانداي وكىنىشتى... بۇل ەلدە اۆتوماتتاردىڭ داۋىسى، اتىس، ادام ءولىمى قالىپتى جاعدايعا اينالعان، وعان تۇرعىنداردىڭ ەتى ۇيرەنىپ كەتكەن.

بىردەن وپەراتورعا قاراپ، «ءتۇسىرىلىمدى جالعاستىرامىز با؟» دەپ سۇرادىم. سەبەبى، قارۋلى قاقتىعىس ايماعىندا جۋرناليسكە قاراعاندا قولىنا كامەرا ۇستاعان وپەراتورعا كوبىرەك ءقاۋىپ تونەدى. ءقاۋىپتى ايماقتا جۇمىس ىستەگەندە قاسىڭدا سەنىمدى ارىپتەسىڭنىڭ بولعانى وتە ماڭىزدى. سيرياعا، اۋعانستانعا ساپارعا شىعاتىن كەزدە قانات مەنىمەن بىرگە بارۋعا ءسوزسىز كەلىستى جانە ونىڭ «قازاقتار ەشقاشان دا ارتقا شەگىنبەيدى» دەگەن ءسوزى ءالى كۇنگە دەيىن ەسىمدە. كەيىن قاناتپەن بىرگە اۋعانستانعا دا بارىپ، بىرگە جۇمىس ىستەدىك.

سونىمەن قاتار، شەتەلدە ءجۇرىپ اقپارات تاراتۋ كەزىندە تەك ەفيرگە شىققان ءجۋرناليستىڭ عانا ەڭبەگى كورىنەدى، الايدا ودان بولەك "تىلدا"، ياعني ەكراننىڭ ارت جاعىندا دا قانشاما ادام ەڭبەكتەنەدى. سول سەكىلدى ارىپتەسىم ينديرا جىلقايداروۆا ءوزى قازاقستاندا وتىرىپ مەن سيريادا، اۋعانستاندا بولعانىمدا ماعان ۇلكەن كومەگىن تيگىزگەن بولاتىن. سيرياعا گۋمانيتارلىق كومەكتىڭ جەتكىزىلگەنى جايىندا اقپارات تاراتۋ بارىسىندا "حابار" ارناسىنىڭ شىعارۋشى رەداكتورى تەزدەتىپ ءبىر ءماتىن دايىنداپ جىبەرۋىمدى ايتىپ: "ءوزىمىز وسى جاقتا قازاق تىلىنە اۋدارىپ الامىز" دەگەن بولاتىن. قازاقستاننان كەلىپ تۇرعان جالعىز جۋرناليست بولا تۇرا قازاق تىلىندە ءبىر سيۋجەت تۇسىرە الماۋ ۇلكەن ۇيات بولادى دەپ ويلادىم، ءبىراق قازاق تىلىندە جاتىق سويلەي المايتىن ەدىم. سول كەزدە جوعارىدا اتاپ وتكەن ارىپتەسىم ينديرا جىلقايداروۆا قىسقا عانا ۋاقىتتىڭ ىشىندە ءماتىندى قازاق تىلىنە اۋدارىپ، ونى مەن ەفيردە دۇرىس وقىپ، جەتكىزۋىم ءۇشىن مەنى دايىنداپ، جاقسى سيۋجەت تۇسىرۋگە كومەكتەسكەن بولاتىن. قاتتى ريزا بولدىم. ول كەيىن دە باسقا ساپارلاردا ماعان از كومەگىن تيگىزگەن جوق.

–بولاشاقتا بۇل ەلدەرگە تاعى دا بارۋ جوسپارىڭىزدا بار ما؟

–ناقتى مىنانداي ۋاقىتتا بارامىن دەگەن جوسپارىم جوق. الايدا، مۇمكىندىك بولسا، اۋعانستان استاناسى كابۋل قالاسىنا قايتادان بارعىم كەلەدى. سەبەبى، اۋعانستان جايىندا ايتاتىن دۇنيە كوپ، ونىڭ حالقى، تۇرمىس-تىرشىلىگى، اۋعان ەلىنىڭ بۇگىنگى جاعدايى تۋرالى ءالى كوپ اڭگىمەلەۋگە ايتۋعا بولادى.

كابۋلعا بارعان ەكىنشى ساپارىمىزدا اۋعان حالقىنىڭ كۇندەلىكتى ءومىرىن كورسەتەتىن «گراني افگانا» دەگەن دەرەكتى ءفيلمدى تۇسىردىك. ول فيلم بىرنەشە ماراپاتقا دا يە بولدى. دەگەنمەن، ول جەردە ءبارى تولىققاندى قامتىلماعان، ءالى دە كورسەتەتىن جاعدايلار بار. سەبەبى تولىققاندى دەرەكتى فيلم ءتۇسىرۋ – بۇتىندەي ءبىر كوماندانىڭ جۇمىسى، ال ول ءبىر وپەراتور مەن ءبىر جۋرناليست قانا تۇسىرگەن سيۋجەت. سونىمەن قاتار، ەكسترەمالدى ايماقتا ءبىر سيۋجەتتى قايتا-قايتا دۇرىستاپ تۇسىرۋگە نەمەسە ىڭعايلى ورىن ىزدەپ ءتۇسىرىلىم جاساۋعا مۇمكىندىك بولا بەرمەيدى. قولىمىزدان كەلگەنشە، سول ەلدەگى شىنايى ءومىردى كورسەتۋگە تىرىستىق. ول جەردە راديكالدى توپتار، سودىرلار نەمەسە ەلدىڭ تىنىشتىعىن بۇزىپ وتىرعان ادامدار تۇرمايدى، ءبىز سەكىلدى قاراپايىم حالىق تۇرادى. ولار دا ءبىز سەكىلدى ءومىر سۇرگىسى كەلەتىن، تىنىشتىقتى جاقسى كورەتىن قاراپايىم تۇرعىندار. قانشالىقتى قايعىلى وقيعالارعا كۋا بولسا دا، ولار دا كۇلەدى، قالجىڭداسادى، بەيبىت كۇننىڭ تۋاتىنىنا سەنەدى. قانشالىقتى اۋىر كەزەڭدەردى باستارىنان وتكىزسە دە، ولار ءومىر ءسۇرۋىن توقتاتپايدى.

–قارۋلى قاقتىعىس ايماعىندا بولدىڭىز با؟ جارالانعان نەمەسە ءولىم اۋىزىندا جاتقان ادامداردى كورىپ، ولارعا كومەك كورسەتۋگە تۋرا كەلدى مە؟

–سوعىستىڭ بەل ورتاسىنا ءتۇسىپ، ناعىز قارۋلى قاقتىعىس ايماعىنا بارعان جوقپىن. سەبەبى، سيرياعا بارعان كەزىمدە الەپپو قالاسىنا اپاراتىن جولدى تەرروريستىك توپتار ءوز باقىلاۋىنا العان ەكەن، سوندىقتان ول اۋماققا اپاراتىن جول جابىق بولدى. تارتۋس قالاسىنا اينالما جول ارقىلى ءجۇرىپ باردىق. ءبىزدىڭ قاسىمىزداعى ەلشىلىكتەگى ازاماتتار جولدا ءتۇرلى جاعدايلار ورىن الۋى مۇمكىن ەكەندىگىن قايتا-قايتا ەسكەرتىپ وتىردى. قالاعا دەيىن جول ۇزاق، بىرنەشە ساعات جۇرۋگە تۋرا كەلدى. قولىندا اۆتوماتى بار، كوبىسىنىڭ جوعارى ءبىلىمى جوق ادامدار ەشنارسەدەن قايتپايدى جانە ولارعا بىرنارسەنى ايتىپ ءتۇسىندىرۋ مۇمكىن ەمەس. سوندىقتان دا ءبىز كەز كەلگەن جاعدايعا دايىن بولدىق. قازاقستاننىڭ يوردانياداعى ەلشىسى، سونىمەن قاتار، سيرياداعى جاعدايدى دا باقىلايتىن قىزمەتكەر ازامات بەردىباي بىزبەن بىرگە ءجۇردى جانە ءاربىر توقتاعان جەردە كولىكتەن ءتۇسىپ: «سەندەردى ۇيلەرىڭدە كۇتىپ وتىرعان جاندار بار ەكەنىن ۇمىتپاڭدار، باستارىڭدى قاتەرگە تىگەتىن جاعدايعا ىلىگىپ جۇرمەڭدەر» دەپ ءجيى ەسكەرتتى.

ەكسترەمالدى جاعدايدا جۇمىس جاساۋ ءۇشىن فيزيكالىق تا، پسيحولوگيالىق تا تۇرعىدان مىقتى بولۋ قاجەت. اسىرەسە، پسيحولوگيالىق دايىندىق وتە قاتتى قاجەت. ەكسترەمالدى ايماقتان ادامدار امان-ەسەن ورالسا دا، پسيحولوگيالىق زاقىم الاتىندار بار.

–ءسىز بۇل ورايدا مۇنداي جاعدايعا  تولىققاندى دايىن بولدىڭىز با؟

–ءقاۋىپتى ايماققا باراردا ەشكىم دە تولىققاندى دايىن بولا المايدى. ارينە، سەن قانداي جەرگە بارا جاتقانىڭدى بىلەسىڭ، امان-ەسەن ورالماۋىڭ دا مۇمكىن ەكەنىن دە تۇسىنەسىڭ، ءبىراق  الدا قانداي جاعدايلار كۇتىپ تۇرعانىنان بەيحابار بولاسىڭ. ەكىنشى رەت كابۋلعا بارعانىمىزدا ءبىر قوناق ۇيگە توقتادىق، ول جەردە ءوزىمىزدى تولىقتاي ءقاۋىپسىز سەزىندىك. سەبەبى، قوناق ۇيگە كىرۋ ءۇشىن كەز كەلگەن ادام تولىق باقىلاۋدان وتەدى، ماشينا، تەحنيكا، ءتىپتى، ادامداردىڭ ءبارىن قاتاڭ تەكسەرەدى. ءبىر كەزدەرى اۋعانستانعا كەلگەن اراب جۋرناليستەرىنىڭ كامەرالارىنا جارىلعىش زات ورناتىپ، جارىپ جىبەرگەننەن كەيىن ول ەلدە شەتەلدىك ب ا ق وكىلدەرىنە باسا نازار اۋدارىپ، تولىققاندى تەكسەرىستەن وتكىزەدى. كەيىننەن ول قوناق ۇيدەن كەتكەننەن سوڭ، شامامەن، ەكى كۇننەن كەيىن ەلشىلىكتەگى ارىپتەستەرىم مەن جاتقان بولمەنىڭ سۋرەتتەرىن جىبەردى. ىشىندە سىنعان اينەكتەر تولىپ جاتىر، قوناق ءۇيدىڭ استان-كەستەڭى شىققان. «نە بولعان؟» دەپ شوشىپ كەتتىم. سويتسەم، ءبىز توقتاعان قوناق ۇيدە تەرراكت ورىن العان ەكەن. مەن تۇرعان بولمەدە جاتقان ادام اۋىر جاراقاتپەن اۋرۋحاناعا ءتۇسىپتى. ءبىزدى قۇداي ساقتاپتى، ول ادامنىڭ ورنىندا مەنىڭ جاتۋىم دا ابدەن مۇمكىن ەدى.

–قارۋلى قاقتىعىس ايماعىنداعى تۇرعىنداردىڭ كوڭىل كۇيىن بايقادىڭىز با؟

–قورعانىس مينيسترلىگىنىڭ ۇيىمداستىرۋىمەن ب ا ق وكىلدەرىنە ارنالعان ەكسترەمالدى جۋرناليستيكا تاقىرىبىنداعى وقۋ-جاتتىعۋعا قاتىسقاننان كەيىن قىزىعۋشىلىعىم ارتا باستادى. دەگەنمەن، ناعىز ەاكسترەمالدى ايماققا بارىپ، سوعىستى ءوز كوزىمىزبەن كورىپ، بەل ورتاسىندا ءجۇرىپ قاتىسقان جوقپىز. ءبىز ەكسترەمالدى جۋرناليستيكانىڭ كىشكەنە عانا ءدامىن تاتتىق دەسەك بولادى. سەبەبى، ايتىپ وتكەنىمدەي، قارۋلى قاقتىعىس ايماعىنا بارعانىمىز جوق. ءبىز تەرراكت، راديكالدى توپتاردىڭ شابۋىلىنا تاپ بولعان حالىقتىڭ بۇگىنگى ءومىرىن، تۇرمىس-تىرشىلىگىن كورسەتتىك. سيريا مەن اۋعانستانداعى ومىردەن ءۇزىندى كەلتىردىك.

ۇنەمى دوستارىممەن، تانىستارىممەن وتىرىسقا، ءدامحانالارعا بارعاندا ءبىز داياشىنى شاقىرىپ، «مىنا تاماققا نە قوسىلادى، مىناۋ نەنىڭ ەتىمەن، مىنانىڭ قۇرامىندا نە بار؟» دەپ سۇرايمىز جانە تاڭدايمىز. بىزدە تاڭداۋ بار، ءوزىمىز قالاعان استى ىشە الامىز، قانداي ەت جەيتىنىمىزدى تاڭدايمىز. ال اۋعانستان مەن سيرياداعى ادامداردىڭ تاڭداۋى جوق. ولار نە تابادى، سونى قاناعات ەتەدى. سوعان قاراماستان  ولار – وتە قوناقجاي، «قازاقستاننان كەلگەن جۋرناليستەرمىز» دەگەنىمىزدە، جەرگە داستارحان جايىپ، اركىم ءوزىنىڭ بارىن قويىپ، الدىمىزعا توستى. ال ءبىر ايەل: «قازاقستاندى بىلەمىن، ءبىراق ول ەلدە ءبىزدىڭ جاعدايىمىزبەن تانىس ادامدار بار ەكەن دەپ ويلاماپپىن» دەپ جىلاپ جىبەردى. وتە قايعىلى كورىنىس... ءبىراق ولار دا ادام عوي،  تىنىش قالىپتا ءومىر ءسۇرۋدى ارماندايدى. سوندىقتان تۇراقتىلىقتىڭ قۇنى قاشان دا وتە جوعارى دەگىم كەلەدى.

اڭگىمەڭىزگە راقمەت!