پرەزيدەنتتىڭ بەس الەۋمەتتىك باستاماسى ەلىمىزدىڭ ءار وڭىرلەرىندە قالاي جۇزەگە اسىپ جاتىر؟ قاي وبلىس، قاي قالا بەلسەندى؟ مۇنى سارالاۋ ماقساتىندا ۇكىمەت باسى وبلىس-وبلىستى ارالاپ، ەلباسى تاپسىرماسىنىڭ ورىندالىپ جاتقان-جاتپاعاندىعىن انىقتاپ جۇرەدى. بۇل جولى باقىتجان ساعىنتايەۆ جۇمىس ساپارىمەن الماتى وبلىسىنا باردى. وبلىستاعى كاسىپكەرلەرگە قىزمەت كورسەتۋ ورتالىعىنا بارىپ، ەلباسىنىڭ بەس الەۋمەتتىك باستاماسى مەن مەملەكەتتىك باعدارلامالاردىڭ ىسكە اسىرىلۋ پروسەسىن باقىلادى.

ساپارى بارىسىندا پرەمەر-مينيسترگە وڭىردەگى ەكونوميكالىق ءوسىم، جالپى وڭىرلىك ءونىم مولشەرى تۋراسىندا اقپارات تانىستىرىلدى. ماسەلەن سوڭعى ءتورت جىلدا الماتى وبلىسىنىڭ ەكونوميكالىق ءوسىمى 4،2 پايىزدى قۇراعان. ال جالپى وڭىرلىك ءونىم العاشقى جارتى جىلدىقتا-اق 1،09 تريلليون تەڭگەنى قۇراپ ۇلگەردى.

وبلىس اكىمىنىڭ ءبىرىنشى ورىنباسارى تۇرلاشوۆ اۋىل شارۋاشىلىعى سالاسى بويىنشا وبلىستىڭ جەتىستىكتەرىن اتادى. ايتۋىنشا، 2017 جىلعىمەن سالىستىرعاندا بيىل جالپى ءونىم كولەمى 3،5 پايىزدى قۇرادى. جالپى قاڭتار-قىركۇيەك ايلارىندا 488 ميلليارد تەڭگەگە جەتتى.

«وڭىردە قانت قىزىلشاسى، جۇگەرى القاپتارىن كوبەيتۋ جۇمىستارى جۇرگىزىلىپ جاتىر، بۇعان قوسا قانت ءوندىرۋ، جۇگەرى وڭدەۋ جۇمىستارى دا شەت قالعان دوق. مال شارۋاشىلىعى دا ايتارلىقتاي جەمىس بەردى»، - دەدى ل. تۇرلاشوۆ.

وبلىستا وڭدەۋ ونەركاسىبىنىڭ ەكسپورتى دا باسىم ەكەنىن ايتا كەتكەن ءجون. كوبىنە ەكسپورتتالاتىن ازىق-تۇلىك، حيميا جانە فارماسيەۆتيكا، قۇرىلىس جانە ماشينا جاساۋ سالالارى. ەلباسىنىڭ جولداۋىنداعى تاپسىرماعا سايكەس ەكسپورتقا باعدارلانعان كاسىپورىندارعا قارجىلاي نەمەسە قارجىلاي ەمەس قولداۋ كورسەتۋدى وبلىس باسشىلىعى قولىنا العان.

اۋىل شارۋاشىلىعىن دامىتۋداعى تاعى ءبىر ماڭىزدى فاكتور – اۋىل شارۋاشىلىعىنا سالىناتىن ينۆەستيسيا. وبلىس اكىمى ورىنباسارىنىڭ ايتۋىنشا، 2017 جىلى اوك-كە 42،7 ميلليارد تەڭگە، 2018 جىلى – 53،8 ميلليارد تەڭگە تارتىلدى. 2022 جىلعا قاراي وبلىس بيلىگى بۇل كورسەتكىشتى 99 ميلليارد تەڭگەگە دەيىن جەتكىزۋدى كوزدەپ وتىر.

باقىتجان ساعىنتايەۆقا كاسىپكەرلىكتى دامىتۋ تۋراسىندا باياندالدى. وڭىردە بيزنەستى قولداۋ ءۇشىن 11،1 ميلليارد تەڭگە ءبولۋ قاراستىرىلعان. وبلىس اكىمىنىڭ ورىنباسارى تۇياقوۆتىڭ بايانداماسىنا سايكەس، وبلىستا قاڭتاردان بەرى 1،5 مىڭنان استام جۇمىس ورنى اشىلعان. بۇگىنگى تاڭدا جوو-دەگى شاعىن جانە ورتا بيزنەس ۇلەسى 28 پايىزدى قۇرايدى، 2030 جىلى بيزنەس ۇلەسىن 40 پايىزعا دەيىن ۇلعايتۋ جوسپارلاندى.

مەملەكەت باسشىسىنىڭ بەس الەۋمەتتىك باستاماسىن جۇزەگە اسىرۋ تۋراسىندا دا باياندالدى. تۇرلاشوۆتىڭ حابارلاۋىنشا، «7-20-25» باعدارلاماسى بويىنشا وڭىردە تۇرعىن ءۇي الۋعا نيەتتى 56 ازامات ءوتىنىم جازعان.

133،5 مىڭ ادامنىڭ ەڭبەكاقىسى كوتەرىلدى. جوعارى ءبىلىم الۋ مۇمكىندىگى ۇلعايىپ، 2018-2019 وقۋ جىلىندا بارلىعى 5231 مەملەكەتتىك گرانت بەرىلدى. بۇدان بولەك 1930 ورنى بار 10 جاتاقھانا سالىندى.

«شاعىن نەسيە بەرۋ» باعدارلاماسىنا سايكەس، 2018 جىلى وبلىسقا قوسىمشا 1،3 ميلليارد تەڭگە ءبولىندى. 3 قالا مەن 12 اۋدان گازداندىرىلدى.

الماتى وبلىسىنىڭ جەتىستىكتەرىنە قانىققان باقىتجان ساعىنتايەۆ ساپارى سوڭىندا ءوڭىردىڭ كوركەم جەرلەرىن، جاڭا نىساندارىن ارالادى.

بيىل ناۋرىزدا ۇكىمەت وتىرىسىندا ساعىنتايەۆ ەلباسى جاريالاعان بەس الەۋمەتتىك باستاما بويىنشا مەملەكەتتىك ورگاندارعا ءتيىستى تاپسىرما بەرگەن ەدى.

«مەملەكەت باسشىسىنىڭ ءوز باستامالارىن ارنايى ۇندەۋ ارقىلى جاريالاپ، وندا قازاقستاندىقتارعا شىنايى العىسىن ءبىلدىرۋى ونىڭ ماڭىزدىلىعىن ارتتىرا تۇسەدى. بۇل – ەلباسىنىڭ حالقىنا ۇسىنعان پرەزيدەنتتىك ءارى پەرزەنتتىك سىيى. ول باستامالاردىڭ ءارقايسىسى بۇگىنگى تاڭدا حالىقتىڭ كوكەيىندە جۇرگەن ەڭ ماڭىزدى ماسەلەلەردى قامتيدى»، — دەگەن باقىتجان ساعىنتايەۆ حالىقتى قولجەتىمدى باسپانسمەن قامتۋ، سالىق جۇكتەمەسىن ازايتۋ، جوعارى ءبىلىم الۋدىڭ قولجەتىمدىلىگى، شاعىن نەسيە بەرۋ جۇيەسىن ۇلعايتۋ جانە ەلدى گازداندىرۋ سىندى ەلباسىنىڭ تاپسىرمالارىن ءار شەنەۋنىككە جۇكتەپ، جۇزەگە اسىرۋىن تاپسىردى.